શ્રીમદ્વાલ્મીકીય રામાયણે સુંદરકાંડમ્ ।
અથ ષટ્ષષ્ટિતમસ્સર્ગઃ ।
એવમુક્તો હનુમતા રામો દશરથાત્મજઃ ।
તં મણિં હૃદયે કૃત્વા પ્રરુરોદ સલક્ષ્મણઃ ॥ 1 ॥
તં તુ દૃષ્ટ્વા મણિશ્રેષ્ઠં રાઘવ શ્શોકકર્શિતઃ ।
નેત્રાભ્યામશ્રુપૂર્ણાભ્યાં સુગ્રીવમિદમબ્રવીત્ ॥ 2 ॥
યથૈવ ધેનુ સ્સ્રવતિ સ્નેહાદ્વત્સસ્ય વત્સલા ।
તથા મમાપિ હૃદયં મણિરત્નસ્ય દર્શનાત્ ॥ 3 ॥
મણિરત્નમિદં દત્તં વૈદેહ્યાશ્શ્વશુરેણ મે ।
વધૂકાલે યથાબદ્ધમધિકં મૂર્ધ્નિ શોભતે ॥ 4 ॥
અયં હિ જલસંભૂતો મણિસ્સજ્જનપૂજિતઃ ।
યજ્ઞે પરમતુષ્ટેન દત્તશ્શક્રેણ ધીમતા ॥ 5 ॥
ઇમં દૃષ્ટ્વા મણિશ્રેષ્ઠં યથા તાતસ્ય દર્શનમ્ ।
અદ્યાસ્મ્યવગતસ્સૌમ્ય વૈદેહસ્ય તથા વિભોઃ ॥ 6 ॥
અયં હિ શોભતે તસ્યાઃ પ્રિયાયા મૂર્ધ્નિ મે મણિઃ ।
અસ્યાદ્ય દર્શને નાહં પ્રાપ્તાં તામિવ ચિંતયે ॥ 7 ॥
કિમાહ સીતા વૈદેહી બ્રૂહિ સૌમ્ય પુનઃ પુનઃ ।
પિપાસુમિવ તોયેન સિંચંતી વાક્યવારિણા ॥ 8 ॥
ઇતસ્તુ કિં દુઃખતરં યદિમં વારિસંભવમ્ ।
મણિં પશ્યામિ સૌમિત્રે વૈદેહીમાગતાં વિના ॥ 9 ॥
ચિરં જીવતિ વૈદેહી યદિ માસં ધરિષ્યતિ ।
ક્ષણં સૌમ્ય ન જીવેયં વિના તામસિતેક્ષણામ્ ॥ 10 ॥
નય મામપિ તં દેશં યત્ર દૃષ્ટા મમ પ્રિયા ।
ન તિષ્ઠેયં ક્ષણમપિ પ્રવૃત્તિમુપલભ્ય ચ ॥ 11 ॥
કથં સા મમ સુશ્રોણી ભીરુભીરુ સ્સતી સદા ।
ભયાવહાનાં ઘોરાણાં મધ્યે તિષ્ઠતિ રક્ષસામ્ ॥ 12 ॥
શારદ સ્તિમિરોન્મુક્તો નૂનં ચંદ્રં ઇવાંબુધૈઃ ।
આવૃતં વદનં તસ્યા ન વિરાજતિ રાક્ષસૈઃ ॥ 13 ॥
કિમાહ સીતા હનુમંસ્તત્ત્વતઃ કથયાદ્ય મે ।
એતેન ખલુ જીવિષ્યે ભેષજેનાતુરો યથા ॥ 14 ॥
મધુરા મધુરાલાપા કિમાહ મમ ભામિની ।
મદ્વિહીના વરારોહા હનુમન્ કથયસ્વ મે ॥ 15 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે ષટ્ષષ્ટિતમસ્સર્ગઃ ॥
