śrīmadvālmīkīya rāmāyaṇē sundarakāṇḍam ।
atha ṣaṭṣaṣṭitamassargaḥ ।
ēvamuktō hanumatā rāmō daśarathātmajaḥ ।
taṃ maṇiṃ hṛdayē kṛtvā prarurōda salakṣmaṇaḥ ॥ 1 ॥
taṃ tu dṛṣṭvā maṇiśrēṣṭhaṃ rāghava śśōkakarśitaḥ ।
nētrābhyāmaśrupūrṇābhyāṃ sugrīvamidamabravīt ॥ 2 ॥
yathaiva dhēnu ssravati snēhādvatsasya vatsalā ।
tathā mamāpi hṛdayaṃ maṇiratnasya darśanāt ॥ 3 ॥
maṇiratnamidaṃ dattaṃ vaidēhyāśśvaśurēṇa mē ।
vadhūkālē yathābaddhamadhikaṃ mūrdhni śōbhatē ॥ 4 ॥
ayaṃ hi jalasambhūtō maṇissajjanapūjitaḥ ।
yajñē paramatuṣṭēna dattaśśakrēṇa dhīmatā ॥ 5 ॥
imaṃ dṛṣṭvā maṇiśrēṣṭhaṃ yathā tātasya darśanam ।
adyāsmyavagatassaumya vaidēhasya tathā vibhōḥ ॥ 6 ॥
ayaṃ hi śōbhatē tasyāḥ priyāyā mūrdhni mē maṇiḥ ।
asyādya darśanē nāhaṃ prāptāṃ tāmiva chintayē ॥ 7 ॥
kimāha sītā vaidēhī brūhi saumya punaḥ punaḥ ।
pipāsumiva tōyēna siñchantī vākyavāriṇā ॥ 8 ॥
itastu kiṃ duḥkhataraṃ yadimaṃ vārisambhavam ।
maṇiṃ paśyāmi saumitrē vaidēhīmāgatāṃ vinā ॥ 9 ॥
chiraṃ jīvati vaidēhī yadi māsaṃ dhariṣyati ।
kṣaṇaṃ saumya na jīvēyaṃ vinā tāmasitēkṣaṇām ॥ 10 ॥
naya māmapi taṃ dēśaṃ yatra dṛṣṭā mama priyā ।
na tiṣṭhēyaṃ kṣaṇamapi pravṛttimupalabhya cha ॥ 11 ॥
kathaṃ sā mama suśrōṇī bhīrubhīru ssatī sadā ।
bhayāvahānāṃ ghōrāṇāṃ madhyē tiṣṭhati rakṣasām ॥ 12 ॥
śārada stimirōnmuktō nūnaṃ chandraṃ ivāmbudhaiḥ ।
āvṛtaṃ vadanaṃ tasyā na virājati rākṣasaiḥ ॥ 13 ॥
kimāha sītā hanumaṃstattvataḥ kathayādya mē ।
ētēna khalu jīviṣyē bhēṣajēnāturō yathā ॥ 14 ॥
madhurā madhurālāpā kimāha mama bhāminī ।
madvihīnā varārōhā hanuman kathayasva mē ॥ 15 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ṣaṭṣaṣṭitamassargaḥ ॥
