ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ସପ୍ତଷଷ୍ଟିତମସ୍ସର୍ଗଃ ।
ଏଵମୁକ୍ତସ୍ତୁ ହନୁମାନ୍ ରାଘଵେଣ ମହାତ୍ମନା ।
ସୀତାୟା ଭାଷିତଂ ସର୍ଵଂ ନ୍ୟଵେଦୟତ ରାଘଵେ ॥ 1 ॥
ଇଦମୁକ୍ତଵତୀ ଦେଵୀ ଜାନକୀ ପୁରୁଷର୍ଷଭ ।
ପୂର୍ଵ ଵୃତ୍ତମଭିଜ୍ଞାନଂ ଚିତ୍ରକୂଟେ ୟଥାତଥମ୍ ॥ 2 ॥
ସୁଖସୁପ୍ତା ତ୍ଵୟା ସାର୍ଧଂ ଜାନକୀ ପୂର୍ଵମୁତ୍ଥିତା ।
ଵାୟସ ସ୍ସହସୋତ୍ପତ୍ୟ ଵିଦଦାର ସ୍ତନାଂତରେ ॥ 3 ॥
ପର୍ୟାୟେଣ ଚ ସୁପ୍ତସ୍ତ୍ଵଂ ଦେଵ୍ୟଂକେ ଭରତାଗ୍ରଜ ।
ପୁନଶ୍ଚ କିଲ ପକ୍ଷୀ ସ ଦେଵ୍ୟା ଜନୟତି ଵ୍ୟଥାମ୍ ॥ 4 ॥
ପୁନଃ ପୁନରୁପାଗମ୍ୟ ଵିଦଦାର ଭୃଶଂ କିଲ ।
ତତସ୍ତ୍ଵଂ ବୋଧିତସ୍ତସ୍ୟାଶ୍ଶୋଣିତେନ ସମୁକ୍ଷିତଃ ॥ 5 ॥
ଵାୟସେନ ଚ ତେନୈଵ ସତତଂ ବାଧ୍ୟମାନୟା ।
ବୋଧିତଃ କିଲ ଦେଵ୍ୟା ତ୍ଵଂ ସୁଖସୁପ୍ତଃ ପରଂତପ ॥ 6 ॥
ତାଂ ତୁ ଦୃଷ୍ଟ୍ଵା ମହାବାହୋ ଦାରିତାଂ ଚ ସ୍ତନାଂତରେ ।
ଆଶୀଵିଷ ଇଵ କ୍ରୁଦ୍ଧୋ ନିଶ୍ଵସନ୍ନଭ୍ୟଭାଷଥାଃ ॥ 7 ॥
ନଖାଗ୍ରୈଃ କେନ ତେ ଭୀରୁ ଦାରିତଂ ତୁ ସ୍ତନାଂତରମ୍ ।
କଃ କ୍ରୀଡତି ସରୋଷେଣ ପଂଚଵକ୍ତ୍ରେଣ ଭୋଗିନା ॥ 8 ॥
ନିରୀକ୍ଷମାଣସ୍ସହସା ଵାୟସଂ ସମଵୈକ୍ଷଥାଃ ।
ନଖୈ ସ୍ସରୁଧିରୈସ୍ତୀକ୍ଷ୍ଣୈସ୍ତାମେଵାଭିମୁଖଂ ସ୍ଥିତମ୍ ॥ 9 ॥
ସୁତଃ କିଲ ସ ଶକ୍ରସ୍ୟ ଵାୟସଃ ପତତାଂ ଵରଃ ।
ଧରାଂତରଚରଶ୍ଶୀଘ୍ରଂ ପଵନସ୍ୟ ଗତୌ ସମଃ ॥ 10 ॥
ତତସ୍ତସ୍ମିନ୍ମହାବାହୋ କୋପସଂଵର୍ତିତେକ୍ଷଣଃ ।
ଵାୟସେ ତ୍ଵଂ କୃଥାଃ କ୍ରୂରାଂ ମତିଂ ମତିମତାଂ ଵର ॥ 11 ॥
ସ ଦର୍ଭଂ ସଂସ୍ତରାଦ୍ଗୃହ୍ୟ ବ୍ରହ୍ମାସ୍ତ୍ରେଣ ହ୍ୟୟୋଜୟଃ ।
ସ ଦୀପ୍ତ ଇଵ କାଲାଗ୍ନିର୍ଜଜ୍ଵାଲାଭିମୁଖଃ ଖଗମ୍ ॥ 12 ॥
କ୍ଷିପ୍ତଵାଂସ୍ତ୍ଵଂ ପ୍ରଦୀପ୍ତଂ ହି ଦର୍ଭଂ ତଂ ଵାୟସଂ ପ୍ରତି ।
ତତସ୍ତୁ ଵାୟସଂ ଦୀପ୍ତସ୍ସ ଦର୍ଭୋଽନୁଜଗାମ ହ ॥ 13 ॥
ସ ପିତ୍ରା ଚ ପରିତ୍ୟକ୍ତସ୍ସୁରୈଶ୍ଚ ସମହର୍ଷିଭିଃ ।
ତ୍ରୀନ୍ ଲୋକାନ୍ ସଂପରିକ୍ରମ୍ୟ ତ୍ରାତାରଂ ନାଧିଗଚ୍ଛତି ॥ 14 ॥
ପୁନରେଵାଗତସ୍ତ୍ରସ୍ତସ୍ତ୍ଵତ୍ସକାଶମରିଂଦମ ।
ସ ତଂ ନିପତିତଂ ଭୂମୌ ଶରଣ୍ୟଶ୍ଶରଣାଗତମ୍ ॥ 15 ॥
ଵଧାର୍ହମପି କାକୁତ୍ସ୍ଥ କୃପୟା ପର୍ୟପାଲୟଃ ।
ମୋଘମସ୍ତ୍ରଂ ନ ଶକ୍ୟଂ ତୁ କର୍ତୁମିତ୍ୟେଵ ରାଘଵ ॥ 16 ॥
ଭଵାଂସ୍ତସ୍ୟାକ୍ଷି କାକସ୍ୟ ହିନସ୍ତି ସ୍ମ ସ ଦକ୍ଷିଣମ୍ ।
ରାମ ତ୍ଵାଂ ସ ନମସ୍କୃତ୍ୟ ରାଜ୍ଞେ ଦଶରଥାୟ ଚ ॥ 17 ॥
ଵିସୃଷ୍ଟସ୍ତୁ ତଦା କାକ ପ୍ରତିପେଦେ ସ୍ଵମାଲୟମ୍ ।
ଏଵମସ୍ତ୍ରଵିଦାଂ ଶ୍ରେଷ୍ଠସ୍ସତ୍ତ୍ଵଵାନ୍ ଶୀଲଵାନପି ॥ 18 ॥
କିମର୍ଥମସ୍ତ୍ରଂ ରକ୍ଷସ୍ସୁ ନ ୟୋଜୟତି ରାଘଵଃ ।
ନ ନାଗା ନାପି ଗଂଧର୍ଵା ନାସୁରା ନ ମରୁଦ୍ଗଣାଃ ॥ 19 ॥
ନ ଚ ସର୍ଵେ ରଣେ ଶକ୍ତା ରାମଂ ପ୍ରତିସମାସିତୁମ୍ ।
ତସ୍ୟ ଵୀର୍ୟଵତଃ କଶ୍ଚିଦ୍ୟଦ୍ୟସ୍ତି ମୟି ସଂଭ୍ରମଃ ॥ 20 ॥
କ୍ଷିପ୍ରଂ ସୁନିଶିତୈର୍ବାଣୈର୍ହନ୍ୟତାଂ ୟୁଧି ରାଵଣଃ ।
ଭ୍ରାତୁରାଦେଶମାଜ୍ଞାୟ ଲକ୍ଷ୍ମଣୋ ଵା ପରଂତପଃ ॥ 21 ॥
ସ କିମର୍ଥଂ ନରଵରୋ ନ ମାଂ ରକ୍ଷତି ରାଘଵଃ ।
ଶକ୍ତୌ ତୌ ପୁରୁଷଵ୍ୟାଘ୍ରୌ ଵାୟ୍ଵଗ୍ନିସମତେଜସୌ ॥ 22 ॥
ସୁରାଣାମପି ଦୁର୍ଧର୍ଷୌ କିମର୍ଥଂ ମାମୁପେକ୍ଷତଃ ।
ମମୈଵ ଦୁଷ୍କୃତଂ କିଂଚିନ୍ମହଦସ୍ତି ନ ସଂଶୟଃ ॥ 23 ॥
ସମର୍ଥୌ ସହିତୌ ୟନ୍ମାଂ ନାଵେକ୍ଷେତେ ପରଂତପୌ ।
ଵୈଦେହ୍ୟା ଵଚନଂ ଶ୍ରୁତ୍ଵା କରୁଣଂ ସାଶ୍ରୁ ଭାଷିତମ୍ ।
ପୁନରପ୍ୟହମାର୍ୟାଂ ତାମିଦଂ ଵଚନମବ୍ରୁଵମ୍ ॥ 24 ॥
ତ୍ଵଚ୍ଛୋକଵିମୁଖୋ ରାମୋ ଦେଵି ସତ୍ୟେନ ତେ ଶପେ ॥ 25 ॥
ରାମେ ଦୁଃଖାଭିଭୂତେ ତୁ ଲକ୍ଷ୍ମଣଃ ପରିତପ୍ୟତେ ।
କଥଂଚିଦ୍ଭଵତୀ ଦୃଷ୍ଟା ନ କାଲଃ ପରିଶୋଚିତୁମ୍ ॥ 26 ॥
ଅସ୍ମିନ୍ମୁହୂର୍ତେ ଦୁଃଖାନାମଂତଂ ଦ୍ରକ୍ଷ୍ୟସି ଭାମିନି ।
ତାଵୁଭୌ ନରଶାର୍ଦୂଲୌ ରାଜପୁତ୍ରାଵନିଂଦିତୌ ॥ 27 ॥
ତ୍ଵଦ୍ଦର୍ଶନକୃତୋତ୍ସାହୌ ଲଂକାଂ ଭସ୍ମୀକରିଷ୍ୟତଃ ।
ହତ୍ଵା ଚ ସମରେ ରୌଦ୍ରଂ ରାଵଣଂ ସହ ବାଂଧଵମ୍ ॥ 28 ॥
ରାଘଵସ୍ତ୍ଵାଂ ଵରାରୋହେ ସ୍ଵାଂ ପୁରୀଂ ନୟତେ ଧ୍ରୁଵମ୍ ।
ୟତ୍ତୁ ରାମୋ ଵିଜାନୀୟାଦଭିଜ୍ଞାନମନିଂଦିତେ ॥ 29 ॥
ପ୍ରୀତିସଂଜନନଂ ତସ୍ୟ ପ୍ରଦାତୁଂ ତ୍ଵମିହାର୍ହସି ।
ସାଭିଵୀକ୍ଷ୍ୟ ଦିଶସ୍ସର୍ଵା ଵେଣ୍ୟୁଦ୍ଗ୍ରଥିତମୁତ୍ତମମ୍ ॥ 30 ॥
ମୁକ୍ତ୍ଵା ଵସ୍ତ୍ରାଦ୍ଦଦୌ ମହ୍ୟଂ ମଣିମେତଂ ମହାବଲ ।
ପ୍ରତିଗୃହ୍ୟ ମଣିଂ ଦିଵ୍ୟଂ ତଵ ହେତୋ ରଘୂଦ୍ଵହ ॥ 31 ॥
ଶିରସା ତାଂ ପ୍ରଣମ୍ୟାର୍ୟାମହମାଗମନେ ତ୍ଵରେ ।
ଗମନେ ଚ କୃତୋତ୍ସାହମଵେକ୍ଷ୍ୟ ଵରଵର୍ଣିନୀ ॥ 32 ॥
ଵିଵର୍ଧମାନଂ ଚ ହି ମାମୁଵାଚ ଜନକାତ୍ମଜା ।
ଅଶ୍ରୁପୂର୍ଣମୁଖୀ ଦୀନା ବାଷ୍ପସଂଦିଗ୍ଧଭାଷିଣୀ ॥ 33 ॥
ମମୋତ୍ପତନସଂଭ୍ରାଂତା ଶୋକଵେଗସମାହତା ।
ହନୁମନ୍ ସିଂହସଂକାଶାଵୁଭୌ ତୌ ରାମଲକ୍ଷ୍ମଣୌ ॥ 34 ॥
ସୁଗ୍ରୀଵଂଚ ସହାମାତ୍ୟଂ ସର୍ଵାନ୍ ବ୍ରୂୟା ହ୍ୟନାମୟମ୍ ।
ୟଥା ଚ ସ ମହାବାହୁର୍ମାଂ ତାରୟତି ରାଘଵଃ ।
ଅସ୍ମାଦ୍ଧୁଃଖାଂବୁସଂରୋଧାତ୍ତ୍ଵଂ ସମାଧାତୁମର୍ହସି ॥ 35 ॥
ଇମଂ ଚ ତୀଵ୍ରଂ ମମ ଶୋକଵେଗଂ ରକ୍ଷୋଭିରେଭିଃ ପରିଭର୍ତ୍ସନଂ ଚ ।
ବ୍ରୂୟାସ୍ତୁ ରାମସ୍ୟ ଗତସ୍ସମୀପଂ ଶିଵଶ୍ଚ ତେଽଧ୍ଵାସ୍ତୁ ହରିପ୍ରଵୀର ॥ 36 ॥
ଏତତ୍ତଵାର୍ୟା ନୃପରାଜସିଂହ ସୀତା ଵଚଃ ପ୍ରାହ ଵିଷାଦପୂର୍ଵମ୍ ।
ଏତଚ୍ଚ ବୁଦ୍ଧ୍ଵା ଗଦିତଂ ମୟା ତ୍ଵଂ ଶ୍ରଦ୍ଧତ୍ସ୍ଵ ସୀତାଂ କୁଶଲାଂ ସମଗ୍ରାମ୍ ॥ 37 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ସପ୍ତଷଷ୍ଟିତମସ୍ସର୍ଗଃ ॥
