śrīmadvālmīkīya rāmāyaṇē sundarakāṇḍam ।
atha saptaṣaṣṭitamassargaḥ ।
ēvamuktastu hanumān rāghavēṇa mahātmanā ।
sītāyā bhāṣitaṃ sarvaṃ nyavēdayata rāghavē ॥ 1 ॥
idamuktavatī dēvī jānakī puruṣarṣabha ।
pūrva vṛttamabhijñānaṃ chitrakūṭē yathātatham ॥ 2 ॥
sukhasuptā tvayā sārdhaṃ jānakī pūrvamutthitā ।
vāyasa ssahasōtpatya vidadāra stanāntarē ॥ 3 ॥
paryāyēṇa cha suptastvaṃ dēvyaṅkē bharatāgraja ।
punaścha kila pakṣī sa dēvyā janayati vyathām ॥ 4 ॥
punaḥ punarupāgamya vidadāra bhṛśaṃ kila ।
tatastvaṃ bōdhitastasyāśśōṇitēna samukṣitaḥ ॥ 5 ॥
vāyasēna cha tēnaiva satataṃ bādhyamānayā ।
bōdhitaḥ kila dēvyā tvaṃ sukhasuptaḥ parantapa ॥ 6 ॥
tāṃ tu dṛṣṭvā mahābāhō dāritāṃ cha stanāntarē ।
āśīviṣa iva kruddhō niśvasannabhyabhāṣathāḥ ॥ 7 ॥
nakhāgraiḥ kēna tē bhīru dāritaṃ tu stanāntaram ।
kaḥ krīḍati sarōṣēṇa pañchavaktrēṇa bhōginā ॥ 8 ॥
nirīkṣamāṇassahasā vāyasaṃ samavaikṣathāḥ ।
nakhai ssarudhiraistīkṣṇaistāmēvābhimukhaṃ sthitam ॥ 9 ॥
sutaḥ kila sa śakrasya vāyasaḥ patatāṃ varaḥ ।
dharāntaracharaśśīghraṃ pavanasya gatau samaḥ ॥ 10 ॥
tatastasminmahābāhō kōpasaṃvartitēkṣaṇaḥ ।
vāyasē tvaṃ kṛthāḥ krūrāṃ matiṃ matimatāṃ vara ॥ 11 ॥
sa darbhaṃ saṃstarādgṛhya brahmāstrēṇa hyayōjayaḥ ।
sa dīpta iva kālāgnirjajvālābhimukhaḥ khagam ॥ 12 ॥
kṣiptavāṃstvaṃ pradīptaṃ hi darbhaṃ taṃ vāyasaṃ prati ।
tatastu vāyasaṃ dīptassa darbhō'nujagāma ha ॥ 13 ॥
sa pitrā cha parityaktassuraiścha samaharṣibhiḥ ।
trīn lōkān samparikramya trātāraṃ nādhigachChati ॥ 14 ॥
punarēvāgatastrastastvatsakāśamarindama ।
sa taṃ nipatitaṃ bhūmau śaraṇyaśśaraṇāgatam ॥ 15 ॥
vadhārhamapi kākutstha kṛpayā paryapālayaḥ ।
mōghamastraṃ na śakyaṃ tu kartumityēva rāghava ॥ 16 ॥
bhavāṃstasyākṣi kākasya hinasti sma sa dakṣiṇam ।
rāma tvāṃ sa namaskṛtya rājñē daśarathāya cha ॥ 17 ॥
visṛṣṭastu tadā kāka pratipēdē svamālayam ।
ēvamastravidāṃ śrēṣṭhassattvavān śīlavānapi ॥ 18 ॥
kimarthamastraṃ rakṣassu na yōjayati rāghavaḥ ।
na nāgā nāpi gandharvā nāsurā na marudgaṇāḥ ॥ 19 ॥
na cha sarvē raṇē śaktā rāmaṃ pratisamāsitum ।
tasya vīryavataḥ kaśchidyadyasti mayi sambhramaḥ ॥ 20 ॥
kṣipraṃ suniśitairbāṇairhanyatāṃ yudhi rāvaṇaḥ ।
bhrāturādēśamājñāya lakṣmaṇō vā parantapaḥ ॥ 21 ॥
sa kimarthaṃ naravarō na māṃ rakṣati rāghavaḥ ।
śaktau tau puruṣavyāghrau vāyvagnisamatējasau ॥ 22 ॥
surāṇāmapi durdharṣau kimarthaṃ māmupēkṣataḥ ।
mamaiva duṣkṛtaṃ kiñchinmahadasti na saṃśayaḥ ॥ 23 ॥
samarthau sahitau yanmāṃ nāvēkṣētē parantapau ।
vaidēhyā vachanaṃ śrutvā karuṇaṃ sāśru bhāṣitam ।
punarapyahamāryāṃ tāmidaṃ vachanamabruvam ॥ 24 ॥
tvachChōkavimukhō rāmō dēvi satyēna tē śapē ॥ 25 ॥
rāmē duḥkhābhibhūtē tu lakṣmaṇaḥ paritapyatē ।
kathañchidbhavatī dṛṣṭā na kālaḥ pariśōchitum ॥ 26 ॥
asminmuhūrtē duḥkhānāmantaṃ drakṣyasi bhāmini ।
tāvubhau naraśārdūlau rājaputrāvaninditau ॥ 27 ॥
tvaddarśanakṛtōtsāhau laṅkāṃ bhasmīkariṣyataḥ ।
hatvā cha samarē raudraṃ rāvaṇaṃ saha bāndhavam ॥ 28 ॥
rāghavastvāṃ varārōhē svāṃ purīṃ nayatē dhruvam ।
yattu rāmō vijānīyādabhijñānamaninditē ॥ 29 ॥
prītisañjananaṃ tasya pradātuṃ tvamihārhasi ।
sābhivīkṣya diśassarvā vēṇyudgrathitamuttamam ॥ 30 ॥
muktvā vastrāddadau mahyaṃ maṇimētaṃ mahābala ।
pratigṛhya maṇiṃ divyaṃ tava hētō raghūdvaha ॥ 31 ॥
śirasā tāṃ praṇamyāryāmahamāgamanē tvarē ।
gamanē cha kṛtōtsāhamavēkṣya varavarṇinī ॥ 32 ॥
vivardhamānaṃ cha hi māmuvācha janakātmajā ।
aśrupūrṇamukhī dīnā bāṣpasandigdhabhāṣiṇī ॥ 33 ॥
mamōtpatanasambhrāntā śōkavēgasamāhatā ।
hanuman siṃhasaṅkāśāvubhau tau rāmalakṣmaṇau ॥ 34 ॥
sugrīvañcha sahāmātyaṃ sarvān brūyā hyanāmayam ।
yathā cha sa mahābāhurmāṃ tārayati rāghavaḥ ।
asmāddhuḥkhāmbusaṃrōdhāttvaṃ samādhātumarhasi ॥ 35 ॥
imaṃ cha tīvraṃ mama śōkavēgaṃ rakṣōbhirēbhiḥ paribhartsanaṃ cha ।
brūyāstu rāmasya gatassamīpaṃ śivaścha tē'dhvāstu haripravīra ॥ 36 ॥
ētattavāryā nṛparājasiṃha sītā vachaḥ prāha viṣādapūrvam ।
ētachcha buddhvā gaditaṃ mayā tvaṃ śraddhatsva sītāṃ kuśalāṃ samagrām ॥ 37 ॥
ityārṣē śrīmadrāmāyaṇē vālmīkīya ādikāvyē sundarakāṇḍē saptaṣaṣṭitamassargaḥ ॥
