ശ്രീമദ്വാല്മീകീയ രാമായണേ സുംദരകാംഡമ് ।
അഥ സപ്തഷഷ്ടിതമസ്സര്ഗഃ ।
ഏവമുക്തസ്തു ഹനുമാന് രാഘവേണ മഹാത്മനാ ।
സീതായാ ഭാഷിതം സർവം ന്യവേദയത രാഘവേ ॥ 1 ॥
ഇദമുക്തവതീ ദേവീ ജാനകീ പുരുഷര്ഷഭ ।
പൂർവ വൃത്തമഭിജ്ഞാനം ചിത്രകൂടേ യഥാതഥമ് ॥ 2 ॥
സുഖസുപ്താ ത്വയാ സാര്ധം ജാനകീ പൂർവമുത്ഥിതാ ।
വായസ സ്സഹസോത്പത്യ വിദദാര സ്തനാംതരേ ॥ 3 ॥
പര്യായേണ ച സുപ്തസ്ത്വം ദേവ്യംകേ ഭരതാഗ്രജ ।
പുനശ്ച കില പക്ഷീ സ ദേവ്യാ ജനയതി വ്യഥാമ് ॥ 4 ॥
പുനഃ പുനരുപാഗമ്യ വിദദാര ഭൃശം കില ।
തതസ്ത്വം ബോധിതസ്തസ്യാശ്ശോണിതേന സമുക്ഷിതഃ ॥ 5 ॥
വായസേന ച തേനൈവ സതതം ബാധ്യമാനയാ ।
ബോധിതഃ കില ദേവ്യാ ത്വം സുഖസുപ്തഃ പരംതപ ॥ 6 ॥
താം തു ദൃഷ്ട്വാ മഹാബാഹോ ദാരിതാം ച സ്തനാംതരേ ।
ആശീവിഷ ഇവ ക്രുദ്ധോ നിശ്വസന്നഭ്യഭാഷഥാഃ ॥ 7 ॥
നഖാഗ്രൈഃ കേന തേ ഭീരു ദാരിതം തു സ്തനാംതരമ് ।
കഃ ക്രീഡതി സരോഷേണ പംചവക്ത്രേണ ഭോഗിനാ ॥ 8 ॥
നിരീക്ഷമാണസ്സഹസാ വായസം സമവൈക്ഷഥാഃ ।
നഖൈ സ്സരുധിരൈസ്തീക്ഷ്ണൈസ്താമേവാഭിമുഖം സ്ഥിതമ് ॥ 9 ॥
സുതഃ കില സ ശക്രസ്യ വായസഃ പതതാം വരഃ ।
ധരാംതരചരശ്ശീഘ്രം പവനസ്യ ഗതൌ സമഃ ॥ 10 ॥
തതസ്തസ്മിന്മഹാബാഹോ കോപസംവര്തിതേക്ഷണഃ ।
വായസേ ത്വം കൃഥാഃ ക്രൂരാം മതിം മതിമതാം വര ॥ 11 ॥
സ ദര്ഭം സംസ്തരാദ്ഗൃഹ്യ ബ്രഹ്മാസ്ത്രേണ ഹ്യയോജയഃ ।
സ ദീപ്ത ഇവ കാലാഗ്നിര്ജജ്വാലാഭിമുഖഃ ഖഗമ് ॥ 12 ॥
ക്ഷിപ്തവാംസ്ത്വം പ്രദീപ്തം ഹി ദര്ഭം തം വായസം പ്രതി ।
തതസ്തു വായസം ദീപ്തസ്സ ദര്ഭോഽനുജഗാമ ഹ ॥ 13 ॥
സ പിത്രാ ച പരിത്യക്തസ്സുരൈശ്ച സമഹര്ഷിഭിഃ ।
ത്രീന് ലോകാന് സംപരിക്രമ്യ ത്രാതാരം നാധിഗച്ഛതി ॥ 14 ॥
പുനരേവാഗതസ്ത്രസ്തസ്ത്വത്സകാശമരിംദമ ।
സ തം നിപതിതം ഭൂമൌ ശരണ്യശ്ശരണാഗതമ് ॥ 15 ॥
വധാര്ഹമപി കാകുത്സ്ഥ കൃപയാ പര്യപാലയഃ ।
മോഘമസ്ത്രം ന ശക്യം തു കര്തുമിത്യേവ രാഘവ ॥ 16 ॥
ഭവാംസ്തസ്യാക്ഷി കാകസ്യ ഹിനസ്തി സ്മ സ ദക്ഷിണമ് ।
രാമ ത്വാം സ നമസ്കൃത്യ രാജ്ഞേ ദശരഥായ ച ॥ 17 ॥
വിസൃഷ്ടസ്തു തദാ കാക പ്രതിപേദേ സ്വമാലയമ് ।
ഏവമസ്ത്രവിദാം ശ്രേഷ്ഠസ്സത്ത്വവാന് ശീലവാനപി ॥ 18 ॥
കിമര്ഥമസ്ത്രം രക്ഷസ്സു ന യോജയതി രാഘവഃ ।
ന നാഗാ നാപി ഗംധർവാ നാസുരാ ന മരുദ്ഗണാഃ ॥ 19 ॥
ന ച സർവേ രണേ ശക്താ രാമം പ്രതിസമാസിതുമ് ।
തസ്യ വീര്യവതഃ കശ്ചിദ്യദ്യസ്തി മയി സംഭ്രമഃ ॥ 20 ॥
ക്ഷിപ്രം സുനിശിതൈര്ബാണൈര്ഹന്യതാം യുധി രാവണഃ ।
ഭ്രാതുരാദേശമാജ്ഞായ ലക്ഷ്മണോ വാ പരംതപഃ ॥ 21 ॥
സ കിമര്ഥം നരവരോ ന മാം രക്ഷതി രാഘവഃ ।
ശക്തൌ തൌ പുരുഷവ്യാഘ്രൌ വായ്വഗ്നിസമതേജസൌ ॥ 22 ॥
സുരാണാമപി ദുര്ധര്ഷൌ കിമര്ഥം മാമുപേക്ഷതഃ ।
മമൈവ ദുഷ്കൃതം കിംചിന്മഹദസ്തി ന സംശയഃ ॥ 23 ॥
സമര്ഥൌ സഹിതൌ യന്മാം നാവേക്ഷേതേ പരംതപൌ ।
വൈദേഹ്യാ വചനം ശ്രുത്വാ കരുണം സാശ്രു ഭാഷിതമ് ।
പുനരപ്യഹമാര്യാം താമിദം വചനമബ്രുവമ് ॥ 24 ॥
ത്വച്ഛോകവിമുഖോ രാമോ ദേവി സത്യേന തേ ശപേ ॥ 25 ॥
രാമേ ദുഃഖാഭിഭൂതേ തു ലക്ഷ്മണഃ പരിതപ്യതേ ।
കഥംചിദ്ഭവതീ ദൃഷ്ടാ ന കാലഃ പരിശോചിതുമ് ॥ 26 ॥
അസ്മിന്മുഹൂര്തേ ദുഃഖാനാമംതം ദ്രക്ഷ്യസി ഭാമിനി ।
താവുഭൌ നരശാര്ദൂലൌ രാജപുത്രാവനിംദിതൌ ॥ 27 ॥
ത്വദ്ദര്ശനകൃതോത്സാഹൌ ലംകാം ഭസ്മീകരിഷ്യതഃ ।
ഹത്വാ ച സമരേ രൌദ്രം രാവണം സഹ ബാംധവമ് ॥ 28 ॥
രാഘവസ്ത്വാം വരാരോഹേ സ്വാം പുരീം നയതേ ധ്രുവമ് ।
യത്തു രാമോ വിജാനീയാദഭിജ്ഞാനമനിംദിതേ ॥ 29 ॥
പ്രീതിസംജനനം തസ്യ പ്രദാതും ത്വമിഹാര്ഹസി ।
സാഭിവീക്ഷ്യ ദിശസ്സർവാ വേണ്യുദ്ഗ്രഥിതമുത്തമമ് ॥ 30 ॥
മുക്ത്വാ വസ്ത്രാദ്ദദൌ മഹ്യം മണിമേതം മഹാബല ।
പ്രതിഗൃഹ്യ മണിം ദിവ്യം തവ ഹേതോ രഘൂദ്വഹ ॥ 31 ॥
ശിരസാ താം പ്രണമ്യാര്യാമഹമാഗമനേ ത്വരേ ।
ഗമനേ ച കൃതോത്സാഹമവേക്ഷ്യ വരവര്ണിനീ ॥ 32 ॥
വിവര്ധമാനം ച ഹി മാമുവാച ജനകാത്മജാ ।
അശ്രുപൂര്ണമുഖീ ദീനാ ബാഷ്പസംദിഗ്ധഭാഷിണീ ॥ 33 ॥
മമോത്പതനസംഭ്രാംതാ ശോകവേഗസമാഹതാ ।
ഹനുമന് സിംഹസംകാശാവുഭൌ തൌ രാമലക്ഷ്മണൌ ॥ 34 ॥
സുഗ്രീവംച സഹാമാത്യം സർവാന് ബ്രൂയാ ഹ്യനാമയമ് ।
യഥാ ച സ മഹാബാഹുര്മാം താരയതി രാഘവഃ ।
അസ്മാദ്ധുഃഖാംബുസംരോധാത്ത്വം സമാധാതുമര്ഹസി ॥ 35 ॥
ഇമം ച തീവ്രം മമ ശോകവേഗം രക്ഷോഭിരേഭിഃ പരിഭര്ത്സനം ച ।
ബ്രൂയാസ്തു രാമസ്യ ഗതസ്സമീപം ശിവശ്ച തേഽധ്വാസ്തു ഹരിപ്രവീര ॥ 36 ॥
ഏതത്തവാര്യാ നൃപരാജസിംഹ സീതാ വചഃ പ്രാഹ വിഷാദപൂർവമ് ।
ഏതച്ച ബുദ്ധ്വാ ഗദിതം മയാ ത്വം ശ്രദ്ധത്സ്വ സീതാം കുശലാം സമഗ്രാമ് ॥ 37 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ സപ്തഷഷ്ടിതമസ്സര്ഗഃ ॥
