ശ്രീമദ്വാല്മീകീയ രാമായണേ സുംദരകാംഡമ് ।
അഥ സപ്തമസ്സര്ഗഃ ।
സ വേശ്മജാലം ബലവാന് ദദര്ശ വ്യാസക്തവൈഡൂര്യസുവര്ണജാലമ് ।
യഥാ മഹത് പ്രാവൃഷി മേഘജാലം വിദ്യുത്പിനദ്ധം സവിഹംഗജാലമ് ॥ 1 ॥
നിവേശനാനാം വിവിധാശ്ച ശാലാഃ പ്രധാനശംഖായുധചാപശാലാഃ ।
മനോഹരാശ്ചാപി പുനർവിശാലാഃ ദദര്ശ വേശ്മാദ്രിഷു ചംദ്രശാലാഃ ॥ 2 ॥
ഗൃഹാണി നാനാവസുരാജിതാനി ദേവാസുരൈശ്ചാപി സുപൂജിതാനി ।
സർവൈശ്ച ദോഷൈഃ പരിവര്ജിതാനി കപിര്ദദര്ശ സ്വബലാര്ജിതാനി ॥ 3 ॥
താനി പ്രയത്നാഭിസമാഹിതാനി മയേന സാക്ഷാദിവ നിര്മിതാനി ।
മഹീതലേ സർവഗുണോത്തരാണി ദദര്ശ ലംകാധിപതേര്ഗൃഹാണി ॥ 4 ॥
തതോ ദദര്ശോഛ്രചിതമേഘരൂപം മനോഹരം കാംചനചാരുരൂപമ് ।
രക്ഷോഽധിപസ്യാത്മബലാനുരൂപം ഗൃഹോത്തമം ഹ്യപ്രതിരൂപരൂപമ് ॥ 5 ॥
മഹീതലേ സ്വര്ഗമിവ പ്രകീര്ണം ശ്രിയാ ജ്വലംതം ബഹുരത്നകീര്ണമ് ।
നാനാതരൂണാം കുസുമാവകീര്ണം ഗിരേരിവാഗ്രം രജസാവകീര്ണമ് ॥ 6 ॥
നാരീപ്രവേകൈരിവ ദീപ്യമാനം തടിദ്ഭിരംഭോദവദര്ച്യമാനമ് ।
ഹംസപ്രവേകൈരിവ വാഹ്യമാനം ശ്രിയാ യുതം ഖേ സുകൃതാം വിമാനമ് ॥ 7 ॥
യഥാ നഗാഗ്രം ബഹുധാതുചിത്രം യഥാ നഭശ്ച ഗ്രഹചംദ്രചിത്രമ് ।
ദദര്ശയുക്തീകൃതമേഘചിത്രം വിമാനരത്നം ബഹുരത്നചിത്രമ് ॥ 8 ॥
മഹീ കൃതാ പർവതരാജിപൂര്ണാ ശൈലാഃ കൃതാ വൃക്ഷവിതാനപൂര്ണാഃ ।
വൃക്ഷാഃ കൃതാഃ പുഷ്പവിതാനപൂര്ണാഃ പുഷ്പം കൃതം കേസരപത്രപൂര്ണമ് ॥ 9 ॥
കൃതാനി വേശ്മാനി ച പാംഡുരാണി തഥാ സുപുഷ്പാണ്യപി പുഷ്കരാണി ।
പുനശ്ച പദ്മാനി സകേസരാണി ധന്യാനി ചിത്രാണി തഥാ വനാനി ॥ 10 ॥
പുഷ്പാഹ്വയം നാമവിരാജമാനം രത്നപ്രഭാഭിശ്ച വിവര്ധമാനമ് ।
വേശ്മോത്തമാനാമപി ചോച്യമാനം മഹാകപിസ്തത്ര മഹാവിമാനമ് ॥ 11 ॥
കൃതാശ്ച വൈഡൂര്യമയാ വിഹംഗാഃ രൂപ്യപ്രവാലൈശ്ച തഥാ വിഹംഗാഃ ।
ചിത്രാശ്ച നാനാവസുഭിര്ഭുജംഗാഃ ജാത്യാനുരൂപാസ്തുരഗാഃ ശുഭാംഗാഃ ॥ 12 ॥
പ്രവാലജാംബൂനദപുഷ്പപക്ഷാഃ സലീലമാവര്ജിതജിഹ്മപക്ഷാഃ ।
കാമസ്യ സാക്ഷാദിവ ഭാംതി പക്ഷാഃ കൃതാ വിഹംഗാഃ സുമുഖാഃ സുപക്ഷാഃ ॥ 13 ॥
നിയുജ്യമാനാസ്തു ഗജാഃ സുഹസ്താഃ സകേസരാശ്ചോത്പലപത്രഹസ്താഃ ।
ബഭൂവദേവീ ച കൃതാ സുഹസ്താ ലക്ഷ്മീ സ്തഥാ പദ്മിനി പദ്മഹസ്താ ॥ 14 ॥
ഇതീവ തദ്ഗൃഹമഭിഗമ്യ ശോഭനം സവിസ്മയോ നഗമിവ ചാരുശോഭനമ് ।
പുനശ്ച തത്പരമസുഗംധി സുംദരം ഹിമാത്യയേ നഗമിവ ചാരുകംദരമ് ॥ 15 ॥
തതഃ സ താം കപിരഭിപത്യ പൂജിതാം ചരന് പുരീം ദശമുഖബാഹുപാലിതാമ് ।
അദൃശ്യ താം ജനകസുതാം സുപൂജിതാം സുദുഃഖിതഃ പതിഗുണവേഗവര്ജിതാമ് ॥ 16 ॥
തതസ്തദാ ബഹുവിധഭാവിതാത്മനഃ കൃതാത്മനോ ജനകസുതാം സുവര്ത്മനഃ ।
അപശ്യതോഽഭവദതിദുഃഖിതം മനഃ സുചക്ഷുഷഃ പ്രവിചരതോ മഹാത്മനഃ ॥ 17 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ സുംദരകാംഡേ സപ്തമസ്സര്ഗഃ ॥
