શ્રીમદ્વાલ્મીકીય રામાયણે સુંદરકાંડમ્ ।
અથ સપ્તમસ્સર્ગઃ ।
સ વેશ્મજાલં બલવાન્ દદર્શ વ્યાસક્તવૈડૂર્યસુવર્ણજાલમ્ ।
યથા મહત્ પ્રાવૃષિ મેઘજાલં વિદ્યુત્પિનદ્ધં સવિહંગજાલમ્ ॥ 1 ॥
નિવેશનાનાં વિવિધાશ્ચ શાલાઃ પ્રધાનશંખાયુધચાપશાલાઃ ।
મનોહરાશ્ચાપિ પુનર્વિશાલાઃ દદર્શ વેશ્માદ્રિષુ ચંદ્રશાલાઃ ॥ 2 ॥
ગૃહાણિ નાનાવસુરાજિતાનિ દેવાસુરૈશ્ચાપિ સુપૂજિતાનિ ।
સર્વૈશ્ચ દોષૈઃ પરિવર્જિતાનિ કપિર્દદર્શ સ્વબલાર્જિતાનિ ॥ 3 ॥
તાનિ પ્રયત્નાભિસમાહિતાનિ મયેન સાક્ષાદિવ નિર્મિતાનિ ।
મહીતલે સર્વગુણોત્તરાણિ દદર્શ લંકાધિપતેર્ગૃહાણિ ॥ 4 ॥
તતો દદર્શોછ્રચિતમેઘરૂપં મનોહરં કાંચનચારુરૂપમ્ ।
રક્ષોઽધિપસ્યાત્મબલાનુરૂપં ગૃહોત્તમં હ્યપ્રતિરૂપરૂપમ્ ॥ 5 ॥
મહીતલે સ્વર્ગમિવ પ્રકીર્ણં શ્રિયા જ્વલંતં બહુરત્નકીર્ણમ્ ।
નાનાતરૂણાં કુસુમાવકીર્ણં ગિરેરિવાગ્રં રજસાવકીર્ણમ્ ॥ 6 ॥
નારીપ્રવેકૈરિવ દીપ્યમાનં તટિદ્ભિરંભોદવદર્ચ્યમાનમ્ ।
હંસપ્રવેકૈરિવ વાહ્યમાનં શ્રિયા યુતં ખે સુકૃતાં વિમાનમ્ ॥ 7 ॥
યથા નગાગ્રં બહુધાતુચિત્રં યથા નભશ્ચ ગ્રહચંદ્રચિત્રમ્ ।
દદર્શયુક્તીકૃતમેઘચિત્રં વિમાનરત્નં બહુરત્નચિત્રમ્ ॥ 8 ॥
મહી કૃતા પર્વતરાજિપૂર્ણા શૈલાઃ કૃતા વૃક્ષવિતાનપૂર્ણાઃ ।
વૃક્ષાઃ કૃતાઃ પુષ્પવિતાનપૂર્ણાઃ પુષ્પં કૃતં કેસરપત્રપૂર્ણમ્ ॥ 9 ॥
કૃતાનિ વેશ્માનિ ચ પાંડુરાણિ તથા સુપુષ્પાણ્યપિ પુષ્કરાણિ ।
પુનશ્ચ પદ્માનિ સકેસરાણિ ધન્યાનિ ચિત્રાણિ તથા વનાનિ ॥ 10 ॥
પુષ્પાહ્વયં નામવિરાજમાનં રત્નપ્રભાભિશ્ચ વિવર્ધમાનમ્ ।
વેશ્મોત્તમાનામપિ ચોચ્યમાનં મહાકપિસ્તત્ર મહાવિમાનમ્ ॥ 11 ॥
કૃતાશ્ચ વૈડૂર્યમયા વિહંગાઃ રૂપ્યપ્રવાલૈશ્ચ તથા વિહંગાઃ ।
ચિત્રાશ્ચ નાનાવસુભિર્ભુજંગાઃ જાત્યાનુરૂપાસ્તુરગાઃ શુભાંગાઃ ॥ 12 ॥
પ્રવાલજાંબૂનદપુષ્પપક્ષાઃ સલીલમાવર્જિતજિહ્મપક્ષાઃ ।
કામસ્ય સાક્ષાદિવ ભાંતિ પક્ષાઃ કૃતા વિહંગાઃ સુમુખાઃ સુપક્ષાઃ ॥ 13 ॥
નિયુજ્યમાનાસ્તુ ગજાઃ સુહસ્તાઃ સકેસરાશ્ચોત્પલપત્રહસ્તાઃ ।
બભૂવદેવી ચ કૃતા સુહસ્તા લક્ષ્મી સ્તથા પદ્મિનિ પદ્મહસ્તા ॥ 14 ॥
ઇતીવ તદ્ગૃહમભિગમ્ય શોભનં સવિસ્મયો નગમિવ ચારુશોભનમ્ ।
પુનશ્ચ તત્પરમસુગંધિ સુંદરં હિમાત્યયે નગમિવ ચારુકંદરમ્ ॥ 15 ॥
તતઃ સ તાં કપિરભિપત્ય પૂજિતાં ચરન્ પુરીં દશમુખબાહુપાલિતામ્ ।
અદૃશ્ય તાં જનકસુતાં સુપૂજિતાં સુદુઃખિતઃ પતિગુણવેગવર્જિતામ્ ॥ 16 ॥
તતસ્તદા બહુવિધભાવિતાત્મનઃ કૃતાત્મનો જનકસુતાં સુવર્ત્મનઃ ।
અપશ્યતોઽભવદતિદુઃખિતં મનઃ સુચક્ષુષઃ પ્રવિચરતો મહાત્મનઃ ॥ 17 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે સુંદરકાંડે સપ્તમસ્સર્ગઃ ॥
