ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ସପ୍ତମସ୍ସର୍ଗଃ ।
ସ ଵେଶ୍ମଜାଲଂ ବଲଵାନ୍ ଦଦର୍ଶ ଵ୍ୟାସକ୍ତଵୈଡୂର୍ୟସୁଵର୍ଣଜାଲମ୍ ।
ୟଥା ମହତ୍ ପ୍ରାଵୃଷି ମେଘଜାଲଂ ଵିଦ୍ୟୁତ୍ପିନଦ୍ଧଂ ସଵିହଂଗଜାଲମ୍ ॥ 1 ॥
ନିଵେଶନାନାଂ ଵିଵିଧାଶ୍ଚ ଶାଲାଃ ପ୍ରଧାନଶଂଖାୟୁଧଚାପଶାଲାଃ ।
ମନୋହରାଶ୍ଚାପି ପୁନର୍ଵିଶାଲାଃ ଦଦର୍ଶ ଵେଶ୍ମାଦ୍ରିଷୁ ଚଂଦ୍ରଶାଲାଃ ॥ 2 ॥
ଗୃହାଣି ନାନାଵସୁରାଜିତାନି ଦେଵାସୁରୈଶ୍ଚାପି ସୁପୂଜିତାନି ।
ସର୍ଵୈଶ୍ଚ ଦୋଷୈଃ ପରିଵର୍ଜିତାନି କପିର୍ଦଦର୍ଶ ସ୍ଵବଲାର୍ଜିତାନି ॥ 3 ॥
ତାନି ପ୍ରୟତ୍ନାଭିସମାହିତାନି ମୟେନ ସାକ୍ଷାଦିଵ ନିର୍ମିତାନି ।
ମହୀତଲେ ସର୍ଵଗୁଣୋତ୍ତରାଣି ଦଦର୍ଶ ଲଂକାଧିପତେର୍ଗୃହାଣି ॥ 4 ॥
ତତୋ ଦଦର୍ଶୋଛ୍ରଚିତମେଘରୂପଂ ମନୋହରଂ କାଂଚନଚାରୁରୂପମ୍ ।
ରକ୍ଷୋଽଧିପସ୍ୟାତ୍ମବଲାନୁରୂପଂ ଗୃହୋତ୍ତମଂ ହ୍ୟପ୍ରତିରୂପରୂପମ୍ ॥ 5 ॥
ମହୀତଲେ ସ୍ଵର୍ଗମିଵ ପ୍ରକୀର୍ଣଂ ଶ୍ରିୟା ଜ୍ଵଲଂତଂ ବହୁରତ୍ନକୀର୍ଣମ୍ ।
ନାନାତରୂଣାଂ କୁସୁମାଵକୀର୍ଣଂ ଗିରେରିଵାଗ୍ରଂ ରଜସାଵକୀର୍ଣମ୍ ॥ 6 ॥
ନାରୀପ୍ରଵେକୈରିଵ ଦୀପ୍ୟମାନଂ ତଟିଦ୍ଭିରଂଭୋଦଵଦର୍ଚ୍ୟମାନମ୍ ।
ହଂସପ୍ରଵେକୈରିଵ ଵାହ୍ୟମାନଂ ଶ୍ରିୟା ୟୁତଂ ଖେ ସୁକୃତାଂ ଵିମାନମ୍ ॥ 7 ॥
ୟଥା ନଗାଗ୍ରଂ ବହୁଧାତୁଚିତ୍ରଂ ୟଥା ନଭଶ୍ଚ ଗ୍ରହଚଂଦ୍ରଚିତ୍ରମ୍ ।
ଦଦର୍ଶୟୁକ୍ତୀକୃତମେଘଚିତ୍ରଂ ଵିମାନରତ୍ନଂ ବହୁରତ୍ନଚିତ୍ରମ୍ ॥ 8 ॥
ମହୀ କୃତା ପର୍ଵତରାଜିପୂର୍ଣା ଶୈଲାଃ କୃତା ଵୃକ୍ଷଵିତାନପୂର୍ଣାଃ ।
ଵୃକ୍ଷାଃ କୃତାଃ ପୁଷ୍ପଵିତାନପୂର୍ଣାଃ ପୁଷ୍ପଂ କୃତଂ କେସରପତ୍ରପୂର୍ଣମ୍ ॥ 9 ॥
କୃତାନି ଵେଶ୍ମାନି ଚ ପାଂଡୁରାଣି ତଥା ସୁପୁଷ୍ପାଣ୍ୟପି ପୁଷ୍କରାଣି ।
ପୁନଶ୍ଚ ପଦ୍ମାନି ସକେସରାଣି ଧନ୍ୟାନି ଚିତ୍ରାଣି ତଥା ଵନାନି ॥ 10 ॥
ପୁଷ୍ପାହ୍ଵୟଂ ନାମଵିରାଜମାନଂ ରତ୍ନପ୍ରଭାଭିଶ୍ଚ ଵିଵର୍ଧମାନମ୍ ।
ଵେଶ୍ମୋତ୍ତମାନାମପି ଚୋଚ୍ୟମାନଂ ମହାକପିସ୍ତତ୍ର ମହାଵିମାନମ୍ ॥ 11 ॥
କୃତାଶ୍ଚ ଵୈଡୂର୍ୟମୟା ଵିହଂଗାଃ ରୂପ୍ୟପ୍ରଵାଲୈଶ୍ଚ ତଥା ଵିହଂଗାଃ ।
ଚିତ୍ରାଶ୍ଚ ନାନାଵସୁଭିର୍ଭୁଜଂଗାଃ ଜାତ୍ୟାନୁରୂପାସ୍ତୁରଗାଃ ଶୁଭାଂଗାଃ ॥ 12 ॥
ପ୍ରଵାଲଜାଂବୂନଦପୁଷ୍ପପକ୍ଷାଃ ସଲୀଲମାଵର୍ଜିତଜିହ୍ମପକ୍ଷାଃ ।
କାମସ୍ୟ ସାକ୍ଷାଦିଵ ଭାଂତି ପକ୍ଷାଃ କୃତା ଵିହଂଗାଃ ସୁମୁଖାଃ ସୁପକ୍ଷାଃ ॥ 13 ॥
ନିୟୁଜ୍ୟମାନାସ୍ତୁ ଗଜାଃ ସୁହସ୍ତାଃ ସକେସରାଶ୍ଚୋତ୍ପଲପତ୍ରହସ୍ତାଃ ।
ବଭୂଵଦେଵୀ ଚ କୃତା ସୁହସ୍ତା ଲକ୍ଷ୍ମୀ ସ୍ତଥା ପଦ୍ମିନି ପଦ୍ମହସ୍ତା ॥ 14 ॥
ଇତୀଵ ତଦ୍ଗୃହମଭିଗମ୍ୟ ଶୋଭନଂ ସଵିସ୍ମୟୋ ନଗମିଵ ଚାରୁଶୋଭନମ୍ ।
ପୁନଶ୍ଚ ତତ୍ପରମସୁଗଂଧି ସୁଂଦରଂ ହିମାତ୍ୟୟେ ନଗମିଵ ଚାରୁକଂଦରମ୍ ॥ 15 ॥
ତତଃ ସ ତାଂ କପିରଭିପତ୍ୟ ପୂଜିତାଂ ଚରନ୍ ପୁରୀଂ ଦଶମୁଖବାହୁପାଲିତାମ୍ ।
ଅଦୃଶ୍ୟ ତାଂ ଜନକସୁତାଂ ସୁପୂଜିତାଂ ସୁଦୁଃଖିତଃ ପତିଗୁଣଵେଗଵର୍ଜିତାମ୍ ॥ 16 ॥
ତତସ୍ତଦା ବହୁଵିଧଭାଵିତାତ୍ମନଃ କୃତାତ୍ମନୋ ଜନକସୁତାଂ ସୁଵର୍ତ୍ମନଃ ।
ଅପଶ୍ୟତୋଽଭଵଦତିଦୁଃଖିତଂ ମନଃ ସୁଚକ୍ଷୁଷଃ ପ୍ରଵିଚରତୋ ମହାତ୍ମନଃ ॥ 17 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ସପ୍ତମସ୍ସର୍ଗଃ ॥
