śrīmadvālmīkīya rāmāyaṇē sundarakāṇḍam ।
atha saptamassargaḥ ।
sa vēśmajālaṃ balavān dadarśa vyāsaktavaiḍūryasuvarṇajālam ।
yathā mahat prāvṛṣi mēghajālaṃ vidyutpinaddhaṃ savihaṅgajālam ॥ 1 ॥
nivēśanānāṃ vividhāścha śālāḥ pradhānaśaṅkhāyudhachāpaśālāḥ ।
manōharāśchāpi punarviśālāḥ dadarśa vēśmādriṣu chandraśālāḥ ॥ 2 ॥
gṛhāṇi nānāvasurājitāni dēvāsuraiśchāpi supūjitāni ।
sarvaiścha dōṣaiḥ parivarjitāni kapirdadarśa svabalārjitāni ॥ 3 ॥
tāni prayatnābhisamāhitāni mayēna sākṣādiva nirmitāni ।
mahītalē sarvaguṇōttarāṇi dadarśa laṅkādhipatērgṛhāṇi ॥ 4 ॥
tatō dadarśōChrachitamēgharūpaṃ manōharaṃ kāñchanachārurūpam ।
rakṣō'dhipasyātmabalānurūpaṃ gṛhōttamaṃ hyapratirūparūpam ॥ 5 ॥
mahītalē svargamiva prakīrṇaṃ śriyā jvalantaṃ bahuratnakīrṇam ।
nānātarūṇāṃ kusumāvakīrṇaṃ girērivāgraṃ rajasāvakīrṇam ॥ 6 ॥
nārīpravēkairiva dīpyamānaṃ taṭidbhirambhōdavadarchyamānam ।
haṃsapravēkairiva vāhyamānaṃ śriyā yutaṃ khē sukṛtāṃ vimānam ॥ 7 ॥
yathā nagāgraṃ bahudhātuchitraṃ yathā nabhaścha grahachandrachitram ।
dadarśayuktīkṛtamēghachitraṃ vimānaratnaṃ bahuratnachitram ॥ 8 ॥
mahī kṛtā parvatarājipūrṇā śailāḥ kṛtā vṛkṣavitānapūrṇāḥ ।
vṛkṣāḥ kṛtāḥ puṣpavitānapūrṇāḥ puṣpaṃ kṛtaṃ kēsarapatrapūrṇam ॥ 9 ॥
kṛtāni vēśmāni cha pāṇḍurāṇi tathā supuṣpāṇyapi puṣkarāṇi ।
punaścha padmāni sakēsarāṇi dhanyāni chitrāṇi tathā vanāni ॥ 10 ॥
puṣpāhvayaṃ nāmavirājamānaṃ ratnaprabhābhiścha vivardhamānam ।
vēśmōttamānāmapi chōchyamānaṃ mahākapistatra mahāvimānam ॥ 11 ॥
kṛtāścha vaiḍūryamayā vihaṅgāḥ rūpyapravālaiścha tathā vihaṅgāḥ ।
chitrāścha nānāvasubhirbhujaṅgāḥ jātyānurūpāsturagāḥ śubhāṅgāḥ ॥ 12 ॥
pravālajāmbūnadapuṣpapakṣāḥ salīlamāvarjitajihmapakṣāḥ ।
kāmasya sākṣādiva bhānti pakṣāḥ kṛtā vihaṅgāḥ sumukhāḥ supakṣāḥ ॥ 13 ॥
niyujyamānāstu gajāḥ suhastāḥ sakēsarāśchōtpalapatrahastāḥ ।
babhūvadēvī cha kṛtā suhastā lakṣmī stathā padmini padmahastā ॥ 14 ॥
itīva tadgṛhamabhigamya śōbhanaṃ savismayō nagamiva chāruśōbhanam ।
punaścha tatparamasugandhi sundaraṃ himātyayē nagamiva chārukandaram ॥ 15 ॥
tataḥ sa tāṃ kapirabhipatya pūjitāṃ charan purīṃ daśamukhabāhupālitām ।
adṛśya tāṃ janakasutāṃ supūjitāṃ suduḥkhitaḥ patiguṇavēgavarjitām ॥ 16 ॥
tatastadā bahuvidhabhāvitātmanaḥ kṛtātmanō janakasutāṃ suvartmanaḥ ।
apaśyatō'bhavadatiduḥkhitaṃ manaḥ suchakṣuṣaḥ pravicharatō mahātmanaḥ ॥ 17 ॥
ityārṣē śrīmadrāmāyaṇē vālmīkīya ādikāvyē sundarakāṇḍē saptamassargaḥ ॥
