ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଦ୍ଵିତୀୟସ୍ସର୍ଗଃ ।
କୃତାତିଥ୍ୟୋଽଥ ରାମସ୍ତୁ ସୂର୍ୟସ୍ୟୋଦୟନଂ ପ୍ରତି ।
ଆମ୍ନତ୍୍ୟ ସ ମୁନୀନ୍ସର୍ଵାନ୍ଵନମେଵାନ୍ଵଗାହତ ॥ 1 ॥
ନାନାମୃଗଗଣାକୀର୍ଣମୃକ୍ଷଶାର୍ଦୂଲ ସେଵିତମ୍ ।
ଧ୍ଵସ୍ତଵୃକ୍ଷଲତାଗୁଲ୍ମଂ ଦୁର୍ଦର୍ଶସଲିଲାଶୟମ୍ ॥ 2 ॥
ନିଷ୍କୂଜନାନାଶକୁନିଝିଲ୍ଲିକାଗଣନାଦିତମ୍ ।
ଲକ୍ଷ୍ମଣାନୁଗତୋ ରାମୋ ଵନମଧ୍ୟଂ ଦଦର୍ଶ ହ ॥ 3 ॥
ସୀତୟା ସହ କାକୁତ୍ସ୍ଥସ୍ତସ୍ମିନଘୋରମୃଗାୟୁତେ ।
ଦଦର୍ଶ ଗିରିଶୃଂଗାଭଂ ପୁରୁଷାଦଂ ମହାସ୍ଵନମ୍ ॥ 4 ॥
ଗଂଭୀରାକ୍ଷଂ ମହାଵକ୍ତ୍ରଂ ଵିକଟଂ ଵିଷମୋଦରମ୍ ।
ବୀଭତ୍ସଂ ଵିଷମଂ ଦୀର୍ଘଂ ଵିକୃତଂ ଘୋରଦର୍ଶନମ୍ ॥ 5 ॥
ଵସାନଂ ଚର୍ମ ଵୈୟାଘ୍ରଂ ଵସାର୍ଦ୍ରଂ ରୁଧିରୋକ୍ଷିତମ୍ ।
ତ୍ରାସନଂ ସର୍ଵଭୂତାନାଂ ଵ୍ୟାଦିତାସ୍ୟମିଵାଂତକମ୍ ॥ 6 ॥
ତ୍ରୀନ୍ସିମ୍ହାନ୍ଶ୍ଚତୁରୋ ଵ୍ୟାଘ୍ରାଂଦ୍ଵୌ ଵୃକୌ ପୃଷତାଂଦଶ ।
ସଵିଷାଣଂ ଵସାଦିଗ୍ଧଂ ଗଜସ୍ୟ ଚ ଶିରୋ ମହତ୍ ।
ଅଵସଜ୍ୟାୟସେ ଶୂଲେ ଵିନଦଂତଂ ମହାସ୍ଵନମ୍ ॥ 7 ॥
ସ ରାମଂ ଲକ୍ଷ୍ମଣଂ ଚୈଵ ସୀତାଂ ଦୃଷ୍ଟ୍ଵା ଚ ମୈଥିଲୀମ୍ ।
ଅଭ୍ୟଧାଵତ୍ସୁସଂକୃଦ୍ଧଃ ପ୍ରଜାଃ କାଲ ଇଵାଂତକଃ ॥ 8 ॥
ସ କୃତ୍ଵା ଭୈରଵଂ ନାଦଂ ଚାଲୟନ୍ନିଵ ମେଦିନୀମ୍ ।
ଅଂକେନାଦାୟ ଵୈଦେହୀମପକ୍ରମ୍ୟ ତତୋଽବ୍ରଵୀତ୍ ॥ 9 ॥
ୟୁଵାଂ ଜଟାଚୀରଧରୌ ସଭାର୍ୟୌ କ୍ଷୀଣଜୀଵିତୌ ।
ପ୍ରଵିଷ୍ଟୌ ଦଂଡକାରଣ୍ୟଂ ଶରଚାପାସିଧାରିଣୌ ॥ 10 ॥
କଥଂ ତାପସୟୋର୍ଵାଂ ଚ ଵାସଃ ପ୍ରମଦୟା ସହ ।
ଅଧର୍ମଚାରିଣୌ ପାପୌ କୌ ୟୁଵାଂ ମୁନିଦୂଷକୌ ॥ 11 ॥
ଅହଂ ଵନମିଦଂ ଦୁର୍ଗଂ ଵିରାଧୋ ନାମ ରାକ୍ଷସଃ ।
ଚରାମି ସାୟୁଧୋ ନିତ୍ୟମୃଷିମାଂସାନି ଭକ୍ଷୟନ୍ ॥ 12 ॥
ଇୟଂ ନାରୀ ଵରାରୋହା ମମ ଭାର୍ୟା ଭଵିଷ୍ୟତି ।
ୟୁଵୟୋଃ ପାପୟୋଶ୍ଚାହଂ ପାସ୍ୟାମି ରୁଧିରଂ ମୃଧେ ॥ 13 ॥
ତସ୍ୟୈଵଂ ବ୍ରୁଵତୋ ଦୁଷ୍ଟଂ ଵିରାଧସ୍ୟ ଦୁରାତ୍ମନଃ ।
ଶ୍ରୁତ୍ଵା ସଗର୍ଵିତଂ ଵାକ୍ୟଂ ସଂଭ୍ରାଂତା ଜନକାତ୍ମଜା ॥ 14 ॥
ସୀତା ପ୍ରଵେପତୋଦ୍ଵେଗାତ୍ ପ୍ରାଵାତେ କଦଲୀ ୟଥା ॥ 15 ॥
ତାଂ ଦୃଷ୍ଟ୍ଵା ରାଘଵଃ ସୀତାଂ ଵିରାଧାଂକଗତାଂ ଶୁଭାମ୍ ।
ଅବ୍ରଵୀଲ୍ଲକ୍ଷ୍ମଣଂ ଵାକ୍ୟଂ ମୁଖେନ ପରିଶୁଷ୍ୟତା ॥ 16 ॥
ପଶ୍ୟ ସୌମ୍ୟ ନରେଂଦ୍ରସ୍ୟ ଜନକସ୍ୟାତ୍ମସଂଭଵାମ୍ ।
ମମ ଭାର୍ୟାଂ ଶୁଭାଚାରାଂ ଵିରାଧାଂକେ ପ୍ରଵେଶିତାମ୍ ॥ 17 ॥
ଅତ୍ୟଂତସୁଖସଂମଵୃଦ୍ଧାଂ ରାଜପୁତ୍ରୀଂ ୟଶସ୍ଵିନୀମ୍ ।
ୟଦଭିପ୍ରେତମସ୍ମାସୁ ପ୍ରିୟଂ ଵରଵୃତଂ ଚ ୟତ୍ ॥ 18 ॥
କୈକେୟ୍ୟାସ୍ତୁ ସୁସଂଵୃତ୍ତଂ କ୍ଷିପ୍ରମଦ୍ୟୈଵ ଲକ୍ଷ୍ମଣ ।
ୟା ନ ତୁଷ୍ୟତି ରାଜ୍ୟେନ ପୁତ୍ରାର୍ଥେ ଦୀର୍ଘଦର୍ଶିନୀ ॥ 19 ॥
ୟୟାହଂ ସର୍ଵଭୂତାନାଂ ପ୍ରିୟଃ ପ୍ରସ୍ଥାପିତୋ ଵନମ୍ ।
ଅଦ୍ୟେଦାନୀଂ ସକାମା ସା ୟା ମାତା ମଧ୍ୟମା ମମ ॥ 20 ॥
ପରସ୍ପର୍ଶାତ୍ତୁ ଵୈଦେହ୍ୟାଃ ନ ଦୁଃଖତରମସ୍ତିମେ ।
ପିତୁର୍ଵିନାଶାତ୍ସୌମିତ୍ରେ ସ୍ଵରାଜ୍ୟହରଣାତ୍ତଥା ॥ 21 ॥
ଇତି ବ୍ରୁଵତି କାକୁତ୍ସ୍ଥେ ବାଷ୍ପଶୋକପରିପ୍ଲୁତେ ।
ଅବ୍ରଵୀଲ୍ଲକ୍ଷ୍ମଣଃ କ୍ରୁଦ୍ଧୋ ରୁଦ୍ଧୋ ନାଗ ଇଵ ଶ୍ଵସନ୍ ॥ 22 ॥
ଅନାଥ ଇଵ ଭୂତାନାଂ ନାଥସ୍ତ୍ଵଂ ଵାସଵୋପମଃ ।
ମୟା ପ୍ରେଷ୍ୟେଣ କାକୁତ୍ସ୍ଥ କିମର୍ଥଂ ପରିତପ୍ୟସେ ॥ 23 ॥
ଶରେଣ ନିହତସ୍ୟାଦ୍ୟ ମୟା କ୍ରୁଦ୍ଧେନ ରକ୍ଷସଃ ।
ଵିରାଧସ୍ୟ ଗତାସୋର୍ହି ମହୀ ପାସ୍ୟତି ଶୋଣିତମ୍ ॥ 24 ॥
ରାଜ୍ୟକାମେ ମମ କ୍ରୋଧୋ ଭରତେ ୟୋ ବଭୂଵ ହ ।
ତଂ ଵିରାଧେ ପ୍ରମୋକ୍ଷ୍ୟାମି ଵଜ୍ରୀ ଵଜ୍ରମିଵାଚଲେ ॥ 25 ॥
ମମ ଭୁଜବଲଵେଗଵେଗିତଃ ପତତୁ ଶରୋଽସ୍ୟ ମହାନ୍ମହୋରସି ।
ଵ୍ୟପନୟତୁ ତନୋଶ୍ଚ ଜୀଵିତଂ ପତତୁ ତତସ୍ସମହୀଂ ଵିଘୂର୍ଣିତଃ ॥ 26 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଦ୍ଵିତୀୟସ୍ସର୍ଗଃ ॥
