ശ്രീമദ്വാല്മീകീയ രാമായണേ അരണ്യകാംഡമ് ।
അഥ ഏകത്രിംശസ്സര്ഗഃ ।
ത്വരമാണസ്തതോ ഗത്വാ ജനസ്ഥാനാദകംപനഃ ।
പ്രവിശ്യ ലംകാം വേഗേന രാവണം വാക്യമബ്രവീത് ॥ 1 ॥
ജനസ്ഥാനസ്ഥിതാ രാജന്രാക്ഷസാ ബഹവോ ഹതാഃ ।
ഖരശ്ച നിഹതസ്സംഖ്യേ കഥംചിദഹമാഗതഃ ॥ 2 ॥
ഏവമുക്തോ ദശഗ്രീവഃ ക്രുദ്ധ സ്സംരക്തലോചനഃ ।
അകംപനമുവാചേദം നിര്ദഹന്നിവ ചക്ഷുഷാ ॥ 3 ॥
കേന രമ്യം ജനസ്ഥാനം ഹതം മമ പരാസുനാ ।
കോ ഹി സർവേഷു ലോകേഷു ഗതിം ചാധിഗമിഷ്യതി ॥ 4 ॥
ന ഹി മേ വിപ്രിയം കൃത്വാ ശക്യം മഘവതാ സുഖമ് ।
പ്രാപ്തും വൈശ്രവണേനാപി ന യമേന ന വിഷ്ണുനാ ॥ 5 ॥
കാലസ്യ ചാപ്യഹം കാലോ ദഹേയമപി പാവകമ് ।
മൃത്യും മരണധര്മേണ സംയോജയിതുമുത്സഹേ ॥ 6 ॥
ദഹേയമപി സംകൃദ്ധസ്തേജസാഽദിത്യപാവകൌ ।
വാതസ്യ തരസാ വേഗം നിഹംതുമഹമുത്സഹേ ॥ 7 ॥
തഥാ ക്രുദ്ധം ദശഗ്രീവം കൃതാംജലിരകംപനഃ ।
ഭയാത്സംദിഗ്ധയാ വാചാ രാവണം യാചതേഽഭയമ് ॥ 8 ॥
ദശഗ്രീവോഽഭയം തസ്മൈ പ്രദദൌ രക്ഷസാം വരഃ ।
സ വിസ്രബ്ധോഽബ്രവീദ്വാക്യമസംദിഗ്ധമകംപനഃ ॥ 9 ॥
പുത്രോ ദശരഥസ്യാസ്തി സിംഹസംഹനനോ യുവാ ।
രാമോ നാമ വൃഷസ്കംധോ വൃത്തായതമഹാഭുജഃ ॥ 10 ॥
വീരഃ പൃഥുയശാശ്ശ്രീമാനതുല്യബലവിക്രമഃ ।
ഹതം തേന ജനസ്ഥാനം ഖരശ്ച സഹ ദൂഷണഃ ॥ 11 ॥
അകംപനവച ശ്രുത്വാ രാവണോ രാക്ഷസാധിപഃ ।
നാഗേംദ്ര ഇവ നിശ്വസ്യ വചനം ചേദമബ്രവീത് ॥ 12 ॥
സ സുരേംദ്രേണ സംയുക്തോ രാമസ്സർവാമരൈസ്സഹ ।
ഉപയാതോ ജനസ്ഥാനം ബ്രൂഹി കച്ചിദകംപന ॥ 13 ॥
രാവണസ്യ പുനർവാക്യം നിശമ്യ തദകംപനഃ ।
ആചചക്ഷേ ബലം തസ്യ വിക്രമം ച മഹാത്മനഃ ॥ 14 ॥
രാമോ നാമ മഹാതേജാ ശ്രേഷ്ഠസ്സർവധനുഷ്മതാമ് ।
ദിവ്യാസ്ത്രഗുണസംപന്നഃ പുരംദരസമോ യുധി ॥ 15 ॥
തസ്യാനുരൂപോ ബലവാന്രക്താക്ഷോ ദംദുഭിസ്വനഃ ।
കനീയാന്ലക്ഷ്മണോ നാമ ഭ്രാതാ ശശിനിഭാനനഃ ॥ 16 ॥
സ തേന സഹ സംയുക്തഃ പാവകേനാനിലോ യഥാ ।
ശ്രീമാന്രാജവരസ്തേന ജനസ്ഥാനം നിപാതിതമ് ॥ 17 ॥
നൈവ ദേവാ മഹാത്മാനോ നാത്ര കാര്യാ വിചാരണാ ।
ശരാ രാമേണ തൂത്സൃഷ്ടാ രുക്മപുംഖാഃ പതത്രിണഃ ॥ 18 ॥
സര്പാഃ പംചാനനാ ഭൂത്വാ ഭക്ഷയംതി സ്മ രാക്ഷസാന് ।
യേന യേന ച ഗച്ഛംതി രാക്ഷസാ ഭയകര്ശിതാഃ ॥ 19 ॥
തേന തേന സ്മ പശ്യംതി രാമമേവാഗ്രതഃ സ്ഥിതമ് ।
ഇത്ഥം വിനാശിതം തേന ജനസ്ഥാനം തവാനഘ ॥ 20 ॥
അകംപനവചശ്രുത്വാ രാവണോ വാക്യമബ്രവീത് ।
ജനസ്ഥാനം ഗമിഷ്യാമി ഹംതും രാമം സലക്ഷ്മണമ് ॥ 21 ॥
അഥൈവമുക്തേ വചനേ പ്രോവാചേദമകംപനഃ ।
ശൃണു രാജന്യഥാവൃത്തം രാമസ്യ ബലപൌരുഷമ് ॥ 22 ॥
അസാധ്യഃ കുപിതോ രാമോ വിക്രമേണ മഹായശാഃ ।
ആപഗായാസ്സുപൂര്ണായാ വേഗം പരിഹരേച്ഛരൈഃ ॥ 23 ॥
സതാരഗ്രഹനക്ഷത്രം നഭശ്ചാപ്യവസാദയേത് ।
അസൌ രാമസ്തു സീദംതീം ശ്രീമാനഭ്യുദ്ധരേന്മഹീമ് ॥ 24 ॥
ഭിത്ത്വാ വേലാം സമുദ്രസ്യ ലോകാനാപ്ലാവയേദ്വിഭുഃ ।
വേഗം വാപി സമുദ്രസ്യ വായും വാ വിധമേച്ഛരൈഃ ॥ 25 ॥
സംഹൃത്യ വാ പുനര്ലോകാന്വിക്രമേണ മഹായശാഃ ।
ശക്തസ്സപുരുഷവ്യാഘ്രഃ സ്രഷ്ടും പുനരപി പ്രജാഃ ॥ 26 ॥
ന ഹി രാമോ ദശഗ്രീവ ശക്യോ ജേതും ത്വയാ യുധി ।
രക്ഷസാം വാപി ലോകേന സ്വര്ഗഃ പാപജനൈരിവ ॥ 27 ॥
ന തം വധ്യമഹം മന്യേ സർവൈര്ദേവാസുരൈരപി ।
അയം തസ്യ വധോപായസ്തന്മമൈകമനാശ്ശൃണു ॥ 28 ॥
ഭാര്യാ തസ്യോത്തമാ ലോകേ സീതാ നാമ സുമധ്യമാ ।
ശ്യാമാ സമവിഭക്താംഗീ സ്ത്രീരത്നം രത്നഭൂഷിതാ ॥ 29 ॥
നൈവ ദേവീ ന ഗംധർവീ നാപ്സരാ നാപി ദാനവീ ।
തുല്യാ സീമംതിനീ തസ്യാ മാനുഷീഷു കുതോ ഭവേത് ॥ 30 ॥
തസ്യാപഹര ഭാര്യാംത്വം പ്രമഥ്യ തു മഹാവനേ ।
സീതയാ രഹിതഃ കാമീ രാമോ ഹാസ്യതി ജീവിതമ് ॥ 31 ॥
അരോചയത തദ്വാക്യം രാവണോ രാക്ഷസാധിപഃ ।
ചിംതയിത്വാ മഹാബാഹുരകംപനമുവാച ഹ ॥ 32 ॥
ബാഢം കാല്യം ഗമിഷ്യാമി ഹ്യേകസ്സാരഥിനാ സഹ ।
ആനയിഷ്യാമി വൈദേഹീമിമാം ഹൃഷ്ടോ മഹാപുരീമ് ॥ 33 ॥
അഥൈവമുക്ത്വാ പ്രയയൌ ഖരയുക്തേന രാവണഃ ।
രഥേനാദിത്യവര്ണേന ദിശസ്സർവാഃ പ്രകാശയന് ॥ 34 ॥
സ രഥോ രാക്ഷസേംദ്രസ്യ നക്ഷത്രപഥഗോ മഹാന് ।
സംചാര്യമാണശ്ശുശുഭേ ജലദേ ചംദ്രമാ ഇവ ॥ 35 ॥
സ മാരീചാശ്രമം പ്രാപ്യ താടകേയമുപാഗമത് ।
മാരീചേനാര്ചിതോ രാജാ ഭക്ഷ്യഭോജ്യൈരമാനുഷൈഃ ॥ 36 ॥
തം സ്വയം പൂജയിത്വാ തു ആസനേനോദകേന ച ।
അര്ഥോപഹിതയാ വാചാ മാരീചോ വാക്യമബ്രവീത് ॥ 37 ॥
കച്ചിത്സുകുശലം രാജന്ലോകാനാം രാക്ഷസേശ്വര ।
ആശംകേ നാഥ ജാനേ ത്വം യതസ്തൂര്ണമിഹാഗതഃ ॥ 38 ॥
ഏവമുക്തോ മഹാതേജാ മാരീചേന സ രാവണഃ ।
തതഃ പശ്ചാദിദം വാക്യമബ്രവീദ്വാക്യകോവിദഃ ॥ 39 ॥
ആരക്ഷോ മേ ഹതസ്താത രാമേണാക്ലിഷ്ടകര്മണാ ।
ജനസ്ഥാനമവധ്യ തത്സർവം യുധി നിപാതിതമ് ॥ 40 ॥
തസ്യ മേ കുരു സാചിവ്യം തസ്യ ഭാര്യാപഹാരണേ ।
രാക്ഷസേംദ്രവചശ്ശ്രുത്വാ മാരീചോ വാക്യമബ്രവീത് ॥ 41 ॥
ആഖ്യാതാ കേന സീതാ സാ മിത്രരൂപേണ ശത്രുണാ ।
ത്വയാ രാക്ഷസശാര്ദൂല കോ ന നംദതി നംദിതഃ ॥ 42 ॥
സീതാമിഹാനയസ്വേതി കോ ബ്രവീതി ബ്രവീഹി മേ ।
രക്ഷോലോകസ്യ സർവസ്യ കശ്ശൃംഗം ഛേത്തുമിച്ഛതി ॥ 43 ॥
പ്രോത്സാഹയതി കശ്ച ത്വാം സ ച ശത്രുരസംശയഃ ।
അശീവിഷമുഖാദ്ദംഷ്ട്രാമുദ്ധര്തും ചേച്ഛതി ത്വയാ ॥ 44 ॥
കര്മണാ കേന കേനാസി കാപഥം പ്രതിപാദിതഃ ।
സുഖസുപ്തസ്യ തേ രാജന് പ്രഹൃതം കേന മൂര്ധനി ॥ 45 ॥
വിശുദ്ധവംശാഭിജനാഗ്രഹസ്ത സ്തേജോമദസ്സംസ്ഥിതദോർവിഷാണഃ ।
ഉദീക്ഷിതും രാവണ നേഹ യുക്തഃ സ സംയുഗേ രാഘവഗംധഹസ്തീ ॥ 46 ॥
അസൌ രണാംതഃ സ്ഥിതിസംധിവാലോ വിദഗ്ധരക്ഷോമൃഗഹാ നൃസിംഹഃ ।
സുപ്തസ്ത്വയാ ബോധയിതും ന യുക്തഃ ശരാംഗപൂര്ണോ നിശിതാസിദംഷ്ട്രഃ ॥ 47 ॥
ചാപാപഹാരേ ഭുജവേഗപംകേ ശരോര്മിമാലേ സുമഹാഹവൌഘേ ।
ന രാമപാതാലമുഖേഽതിഘോരേ പ്രസ്കംദിതും രാക്ഷസരാജ യുക്തമ് ॥ 48 ॥
പ്രസീദ ലംകേശ്വര രാക്ഷസേംദ്ര ലംകാം പ്രസന്നോ ഭവ സാധു ഗച്ഛ ।
ത്വം സ്വേഷു ദാരേഷു രമസ്വ നിത്യം രാമസ്സഭാര്യോ രമതാം വനേഷു ॥ 49 ॥
ഏവമുക്തോ ദശഗ്രീവോ മാരീചേന സ രാവണഃ ।
ന്യവര്തത പുരീം ലംകാം വിവേശ ച ഗൃഹോത്തമമ് ॥ 50 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ഏകത്രിംശസ്സര്ഗഃ ॥
