śrīmadvālmīkīya rāmāyaṇē araṇyakāṇḍam ।
atha chatustriṃśassargaḥ ।
tataśśūrpaṇakhāṃ dṛṣṭvā bruvantīṃ paruṣaṃ vachaḥ ।
amātyamadhyē saṅkruddhaḥ paripaprachCha rāvaṇaḥ ॥ 1 ॥
kaścha rāmaḥ kathaṃvīryaḥ kiṃrūpaḥ kimparākramaḥ ।
kimarthaṃ daṇḍakāraṇyaṃ praviṣṭassudurāsadam ॥ 2 ॥
āyudhaṃ kiñcha rāmasya nihatā yēna rākṣasāḥ ।
kharaścha nihatassaṅkhyē dūṣaṇastriśirāstathā ॥ 3 ॥
ityuktā rākṣasēndrēṇa rākṣasī krōdhamūrChitā ।
tatō rāmaṃ yathātatvamākhyātumupachakramē ॥ 4 ॥
dīrghabāhurviśālākṣa śchīrakṛṣṇājināmbaraḥ ।
kandarpasamarūpaścha rāmō daśarathātmajaḥ ॥ 5 ॥
śakrachāpanibhaṃ chāpaṃ vikṛṣya kanakāṅgadam ।
dīptān kṣipati nārāchānsarpāniva mahāviṣān ॥ 6 ॥
nādadānaṃ śarānghōrānnamuñchantaṃ śilīmukhān ।
na kārmukaṃ vikarṣantaṃ rāmaṃ paśyāmi saṃyugē ॥ 7 ॥
hanyamānaṃ tu tatsainyaṃ paśyāmi śaravṛṣṭibhiḥ ।
indrēṇēvōttamaṃ sasyamāhatantvaśmavṛṣṭibhiḥ ॥ 8 ॥
rakṣasāṃ bhīmarūpāṇāṃ sahasrāṇi chaturdaśa ।
nihatāni śarai stīkṣṇaistēnaikēna padātinā ॥ 9 ॥
ardhādhikamuhūrtēna kharaścha sahadūṣaṇaḥ ।
ṛṣīṇāmabhayaṃ dattaṃ kṛtakṣēmāścha daṇḍakāḥ ॥ 10 ॥
ēkā kathañchinmuktāhaṃ paribhūya mahātmanā ।
strīvadhaṃ śaṅkamānēna rāmēṇa viditātmanā ॥ 11 ॥
bhrātā chāsya mahātējā guṇatastulyavikramaḥ ।
anuraktaścha bhaktaścha lakṣmaṇō nāma vīryavān ॥ 12 ॥
amarṣī durjayō jētā vikrāntō buddhimānbalī ।
rāmasya dakṣiṇō bāhurnityaṃ prāṇō bahiścharaḥ ॥ 13 ॥
rāmasya tu viśālākṣī pūrṇēndusadṛśānanā ।
dharmapatnī priyā bharturnityaṃ priyahitē ratā ॥ 14 ॥
sā sukēśī sunāsōrussurūpā cha yaśasvinī ।
dēvatēva vanasyāsya rājatē śrīrivāparā ॥ 15 ॥
taptakāñchanavarṇābhā raktatuṅganakhī śubhā ।
sītā nāma varārōhā vaidēhī tanumadhyamā ॥ 16 ॥
naiva dēvī na gandharvī na yakṣī na cha kinnarī ।
naivaṃrūpā mayā nārī dṛṣṭapūrvā mahītalē ॥ 17 ॥
yasya sītā bhavēdbhāryā yaṃ cha hṛṣṭā pariṣvajēt ।
atijīvētsa sarvēṣu lōkēṣvapi purandarāt ॥ 18 ॥
sā suśīlā vapuśślāghyā rūpēṇāpratimā bhuvi ।
tavānurūpā bhāryā syāttvaṃ cha tasyāstathā patiḥ ॥ 19 ॥
tāṃ tu vistīrṇajaghanāṃ pīnaśrōṇipayōdharām ।
bhāryārthē cha tavānētumudyatāhaṃ varānanām ॥ 20 ॥
virūpitāsmi krūrēṇa lakṣmaṇēna mahābhuja ।
tāṃ tu dṛṣṭvādya vaidēhīṃ pūrṇachandranibhānanām ।
manmathasya śarāṇāṃ vai tvaṃ vidhēyō bhaviṣyasi ॥ 21 ॥
yadi tasyāmabhiprāyō bhāryārthē tava jāyatē ।
śīghramuddhriyatāṃ pādō jayārthamiha dakṣiṇaḥ ॥ 22 ॥
kuru priyaṃ tathā tēṣāṃ rakṣasāṃ rākṣasēśvara ।
vadhāttasya nṛśaṃsasya rāmasyāśramavāsinaḥ ॥ 23 ॥
taṃ śarairniśitairhatvā lakṣmaṇaṃ cha mahāratham ।
hatanāthāṃ sukhaṃ sītāṃ yathāvadupabhōkṣyasi ॥ 24 ॥
rōchatē yati tē vākyaṃ mamaitadrākṣasēśvara ।
kriyatāṃ nirviśaṅkēna vachanaṃ mama rāvaṇa ॥ 25 ॥
vijñāyēhātmaśaktiṃ cha hriyatāmabalā balāt ।
sītā sarvānavadyāṅgī bhāryārthē rākṣasēśvara ॥ 26 ॥
niśamya rāmēṇa śarairajihmagai rhatān janasthānagatānniśācharān ।
kharaṃ cha buddhvā nihataṃ cha dūṣaṇaṃ tvamatra kṛtyaṃ pratipattumarhasi ॥ 27 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē chatustriṃśassargaḥ ॥
