ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ଚତୁସ୍ତ୍ରିଂଶସ୍ସର୍ଗଃ ।
ତତଶ୍ଶୂର୍ପଣଖାଂ ଦୃଷ୍ଟ୍ଵା ବ୍ରୁଵଂତୀଂ ପରୁଷଂ ଵଚଃ ।
ଅମାତ୍ୟମଧ୍ୟେ ସଂକ୍ରୁଦ୍ଧଃ ପରିପପ୍ରଚ୍ଛ ରାଵଣଃ ॥ 1 ॥
କଶ୍ଚ ରାମଃ କଥଂଵୀର୍ୟଃ କିଂରୂପଃ କିଂପରାକ୍ରମଃ ।
କିମର୍ଥଂ ଦଂଡକାରଣ୍ୟଂ ପ୍ରଵିଷ୍ଟସ୍ସୁଦୁରାସଦମ୍ ॥ 2 ॥
ଆୟୁଧଂ କିଂଚ ରାମସ୍ୟ ନିହତା ୟେନ ରାକ୍ଷସାଃ ।
ଖରଶ୍ଚ ନିହତସ୍ସଂଖ୍ୟେ ଦୂଷଣସ୍ତ୍ରିଶିରାସ୍ତଥା ॥ 3 ॥
ଇତ୍ୟୁକ୍ତା ରାକ୍ଷସେଂଦ୍ରେଣ ରାକ୍ଷସୀ କ୍ରୋଧମୂର୍ଛିତା ।
ତତୋ ରାମଂ ୟଥାତତ୍ଵମାଖ୍ୟାତୁମୁପଚକ୍ରମେ ॥ 4 ॥
ଦୀର୍ଘବାହୁର୍ଵିଶାଲାକ୍ଷ ଶ୍ଚୀରକୃଷ୍ଣାଜିନାଂବରଃ ।
କଂଦର୍ପସମରୂପଶ୍ଚ ରାମୋ ଦଶରଥାତ୍ମଜଃ ॥ 5 ॥
ଶକ୍ରଚାପନିଭଂ ଚାପଂ ଵିକୃଷ୍ୟ କନକାଂଗଦମ୍ ।
ଦୀପ୍ତାନ୍ କ୍ଷିପତି ନାରାଚାନ୍ସର୍ପାନିଵ ମହାଵିଷାନ୍ ॥ 6 ॥
ନାଦଦାନଂ ଶରାନ୍ଘୋରାନ୍ନମୁଂଚଂତଂ ଶିଲୀମୁଖାନ୍ ।
ନ କାର୍ମୁକଂ ଵିକର୍ଷଂତଂ ରାମଂ ପଶ୍ୟାମି ସଂୟୁଗେ ॥ 7 ॥
ହନ୍ୟମାନଂ ତୁ ତତ୍ସୈନ୍ୟଂ ପଶ୍ୟାମି ଶରଵୃଷ୍ଟିଭିଃ ।
ଇଂଦ୍ରେଣେଵୋତ୍ତମଂ ସସ୍ୟମାହତଂତ୍ଵଶ୍ମଵୃଷ୍ଟିଭିଃ ॥ 8 ॥
ରକ୍ଷସାଂ ଭୀମରୂପାଣାଂ ସହସ୍ରାଣି ଚତୁର୍ଦଶ ।
ନିହତାନି ଶରୈ ସ୍ତୀକ୍ଷ୍ଣୈସ୍ତେନୈକେନ ପଦାତିନା ॥ 9 ॥
ଅର୍ଧାଧିକମୁହୂର୍ତେନ ଖରଶ୍ଚ ସହଦୂଷଣଃ ।
ଋଷୀଣାମଭୟଂ ଦତ୍ତଂ କୃତକ୍ଷେମାଶ୍ଚ ଦଂଡକାଃ ॥ 10 ॥
ଏକା କଥଂଚିନ୍ମୁକ୍ତାହଂ ପରିଭୂୟ ମହାତ୍ମନା ।
ସ୍ତ୍ରୀଵଧଂ ଶଂକମାନେନ ରାମେଣ ଵିଦିତାତ୍ମନା ॥ 11 ॥
ଭ୍ରାତା ଚାସ୍ୟ ମହାତେଜା ଗୁଣତସ୍ତୁଲ୍ୟଵିକ୍ରମଃ ।
ଅନୁରକ୍ତଶ୍ଚ ଭକ୍ତଶ୍ଚ ଲକ୍ଷ୍ମଣୋ ନାମ ଵୀର୍ୟଵାନ୍ ॥ 12 ॥
ଅମର୍ଷୀ ଦୁର୍ଜୟୋ ଜେତା ଵିକ୍ରାଂତୋ ବୁଦ୍ଧିମାନ୍ବଲୀ ।
ରାମସ୍ୟ ଦକ୍ଷିଣୋ ବାହୁର୍ନିତ୍ୟଂ ପ୍ରାଣୋ ବହିଶ୍ଚରଃ ॥ 13 ॥
ରାମସ୍ୟ ତୁ ଵିଶାଲାକ୍ଷୀ ପୂର୍ଣେଂଦୁସଦୃଶାନନା ।
ଧର୍ମପତ୍ନୀ ପ୍ରିୟା ଭର୍ତୁର୍ନିତ୍ୟଂ ପ୍ରିୟହିତେ ରତା ॥ 14 ॥
ସା ସୁକେଶୀ ସୁନାସୋରୁସ୍ସୁରୂପା ଚ ୟଶସ୍ଵିନୀ ।
ଦେଵତେଵ ଵନସ୍ୟାସ୍ୟ ରାଜତେ ଶ୍ରୀରିଵାପରା ॥ 15 ॥
ତପ୍ତକାଂଚନଵର୍ଣାଭା ରକ୍ତତୁଂଗନଖୀ ଶୁଭା ।
ସୀତା ନାମ ଵରାରୋହା ଵୈଦେହୀ ତନୁମଧ୍ୟମା ॥ 16 ॥
ନୈଵ ଦେଵୀ ନ ଗଂଧର୍ଵୀ ନ ୟକ୍ଷୀ ନ ଚ କିନ୍ନରୀ ।
ନୈଵଂରୂପା ମୟା ନାରୀ ଦୃଷ୍ଟପୂର୍ଵା ମହୀତଲେ ॥ 17 ॥
ୟସ୍ୟ ସୀତା ଭଵେଦ୍ଭାର୍ୟା ୟଂ ଚ ହୃଷ୍ଟା ପରିଷ୍ଵଜେତ୍ ।
ଅତିଜୀଵେତ୍ସ ସର୍ଵେଷୁ ଲୋକେଷ୍ଵପି ପୁରଂଦରାତ୍ ॥ 18 ॥
ସା ସୁଶୀଲା ଵପୁଶ୍ଶ୍ଲାଘ୍ୟା ରୂପେଣାପ୍ରତିମା ଭୁଵି ।
ତଵାନୁରୂପା ଭାର୍ୟା ସ୍ୟାତ୍ତ୍ଵଂ ଚ ତସ୍ୟାସ୍ତଥା ପତିଃ ॥ 19 ॥
ତାଂ ତୁ ଵିସ୍ତୀର୍ଣଜଘନାଂ ପୀନଶ୍ରୋଣିପୟୋଧରାମ୍ ।
ଭାର୍ୟାର୍ଥେ ଚ ତଵାନେତୁମୁଦ୍ୟତାହଂ ଵରାନନାମ୍ ॥ 20 ॥
ଵିରୂପିତାସ୍ମି କ୍ରୂରେଣ ଲକ୍ଷ୍ମଣେନ ମହାଭୁଜ ।
ତାଂ ତୁ ଦୃଷ୍ଟ୍ଵାଦ୍ୟ ଵୈଦେହୀଂ ପୂର୍ଣଚଂଦ୍ରନିଭାନନାମ୍ ।
ମନ୍ମଥସ୍ୟ ଶରାଣାଂ ଵୈ ତ୍ଵଂ ଵିଧେୟୋ ଭଵିଷ୍ୟସି ॥ 21 ॥
ୟଦି ତସ୍ୟାମଭିପ୍ରାୟୋ ଭାର୍ୟାର୍ଥେ ତଵ ଜାୟତେ ।
ଶୀଘ୍ରମୁଦ୍ଧ୍ରିୟତାଂ ପାଦୋ ଜୟାର୍ଥମିହ ଦକ୍ଷିଣଃ ॥ 22 ॥
କୁରୁ ପ୍ରିୟଂ ତଥା ତେଷାଂ ରକ୍ଷସାଂ ରାକ୍ଷସେଶ୍ଵର ।
ଵଧାତ୍ତସ୍ୟ ନୃଶଂସସ୍ୟ ରାମସ୍ୟାଶ୍ରମଵାସିନଃ ॥ 23 ॥
ତଂ ଶରୈର୍ନିଶିତୈର୍ହତ୍ଵା ଲକ୍ଷ୍ମଣଂ ଚ ମହାରଥମ୍ ।
ହତନାଥାଂ ସୁଖଂ ସୀତାଂ ୟଥାଵଦୁପଭୋକ୍ଷ୍ୟସି ॥ 24 ॥
ରୋଚତେ ୟତି ତେ ଵାକ୍ୟଂ ମମୈତଦ୍ରାକ୍ଷସେଶ୍ଵର ।
କ୍ରିୟତାଂ ନିର୍ଵିଶଂକେନ ଵଚନଂ ମମ ରାଵଣ ॥ 25 ॥
ଵିଜ୍ଞାୟେହାତ୍ମଶକ୍ତିଂ ଚ ହ୍ରିୟତାମବଲା ବଲାତ୍ ।
ସୀତା ସର୍ଵାନଵଦ୍ୟାଂଗୀ ଭାର୍ୟାର୍ଥେ ରାକ୍ଷସେଶ୍ଵର ॥ 26 ॥
ନିଶମ୍ୟ ରାମେଣ ଶରୈରଜିହ୍ମଗୈ ର୍ହତାନ୍ ଜନସ୍ଥାନଗତାନ୍ନିଶାଚରାନ୍ ।
ଖରଂ ଚ ବୁଦ୍ଧ୍ଵା ନିହତଂ ଚ ଦୂଷଣଂ ତ୍ଵମତ୍ର କୃତ୍ୟଂ ପ୍ରତିପତ୍ତୁମର୍ହସି ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ଚତୁସ୍ତ୍ରିଂଶସ୍ସର୍ଗଃ ॥
