શ્રીમદ્વાલ્મીકીય રામાયણે અરણ્યકાંડમ્ ।
અથ ચતુસ્ત્રિંશસ્સર્ગઃ ।
તતશ્શૂર્પણખાં દૃષ્ટ્વા બ્રુવંતીં પરુષં વચઃ ।
અમાત્યમધ્યે સંક્રુદ્ધઃ પરિપપ્રચ્છ રાવણઃ ॥ 1 ॥
કશ્ચ રામઃ કથંવીર્યઃ કિંરૂપઃ કિંપરાક્રમઃ ।
કિમર્થં દંડકારણ્યં પ્રવિષ્ટસ્સુદુરાસદમ્ ॥ 2 ॥
આયુધં કિંચ રામસ્ય નિહતા યેન રાક્ષસાઃ ।
ખરશ્ચ નિહતસ્સંખ્યે દૂષણસ્ત્રિશિરાસ્તથા ॥ 3 ॥
ઇત્યુક્તા રાક્ષસેંદ્રેણ રાક્ષસી ક્રોધમૂર્છિતા ।
તતો રામં યથાતત્વમાખ્યાતુમુપચક્રમે ॥ 4 ॥
દીર્ઘબાહુર્વિશાલાક્ષ શ્ચીરકૃષ્ણાજિનાંબરઃ ।
કંદર્પસમરૂપશ્ચ રામો દશરથાત્મજઃ ॥ 5 ॥
શક્રચાપનિભં ચાપં વિકૃષ્ય કનકાંગદમ્ ।
દીપ્તાન્ ક્ષિપતિ નારાચાન્સર્પાનિવ મહાવિષાન્ ॥ 6 ॥
નાદદાનં શરાન્ઘોરાન્નમુંચંતં શિલીમુખાન્ ।
ન કાર્મુકં વિકર્ષંતં રામં પશ્યામિ સંયુગે ॥ 7 ॥
હન્યમાનં તુ તત્સૈન્યં પશ્યામિ શરવૃષ્ટિભિઃ ।
ઇંદ્રેણેવોત્તમં સસ્યમાહતંત્વશ્મવૃષ્ટિભિઃ ॥ 8 ॥
રક્ષસાં ભીમરૂપાણાં સહસ્રાણિ ચતુર્દશ ।
નિહતાનિ શરૈ સ્તીક્ષ્ણૈસ્તેનૈકેન પદાતિના ॥ 9 ॥
અર્ધાધિકમુહૂર્તેન ખરશ્ચ સહદૂષણઃ ।
ઋષીણામભયં દત્તં કૃતક્ષેમાશ્ચ દંડકાઃ ॥ 10 ॥
એકા કથંચિન્મુક્તાહં પરિભૂય મહાત્મના ।
સ્ત્રીવધં શંકમાનેન રામેણ વિદિતાત્મના ॥ 11 ॥
ભ્રાતા ચાસ્ય મહાતેજા ગુણતસ્તુલ્યવિક્રમઃ ।
અનુરક્તશ્ચ ભક્તશ્ચ લક્ષ્મણો નામ વીર્યવાન્ ॥ 12 ॥
અમર્ષી દુર્જયો જેતા વિક્રાંતો બુદ્ધિમાન્બલી ।
રામસ્ય દક્ષિણો બાહુર્નિત્યં પ્રાણો બહિશ્ચરઃ ॥ 13 ॥
રામસ્ય તુ વિશાલાક્ષી પૂર્ણેંદુસદૃશાનના ।
ધર્મપત્ની પ્રિયા ભર્તુર્નિત્યં પ્રિયહિતે રતા ॥ 14 ॥
સા સુકેશી સુનાસોરુસ્સુરૂપા ચ યશસ્વિની ।
દેવતેવ વનસ્યાસ્ય રાજતે શ્રીરિવાપરા ॥ 15 ॥
તપ્તકાંચનવર્ણાભા રક્તતુંગનખી શુભા ।
સીતા નામ વરારોહા વૈદેહી તનુમધ્યમા ॥ 16 ॥
નૈવ દેવી ન ગંધર્વી ન યક્ષી ન ચ કિન્નરી ।
નૈવંરૂપા મયા નારી દૃષ્ટપૂર્વા મહીતલે ॥ 17 ॥
યસ્ય સીતા ભવેદ્ભાર્યા યં ચ હૃષ્ટા પરિષ્વજેત્ ।
અતિજીવેત્સ સર્વેષુ લોકેષ્વપિ પુરંદરાત્ ॥ 18 ॥
સા સુશીલા વપુશ્શ્લાઘ્યા રૂપેણાપ્રતિમા ભુવિ ।
તવાનુરૂપા ભાર્યા સ્યાત્ત્વં ચ તસ્યાસ્તથા પતિઃ ॥ 19 ॥
તાં તુ વિસ્તીર્ણજઘનાં પીનશ્રોણિપયોધરામ્ ।
ભાર્યાર્થે ચ તવાનેતુમુદ્યતાહં વરાનનામ્ ॥ 20 ॥
વિરૂપિતાસ્મિ ક્રૂરેણ લક્ષ્મણેન મહાભુજ ।
તાં તુ દૃષ્ટ્વાદ્ય વૈદેહીં પૂર્ણચંદ્રનિભાનનામ્ ।
મન્મથસ્ય શરાણાં વૈ ત્વં વિધેયો ભવિષ્યસિ ॥ 21 ॥
યદિ તસ્યામભિપ્રાયો ભાર્યાર્થે તવ જાયતે ।
શીઘ્રમુદ્ધ્રિયતાં પાદો જયાર્થમિહ દક્ષિણઃ ॥ 22 ॥
કુરુ પ્રિયં તથા તેષાં રક્ષસાં રાક્ષસેશ્વર ।
વધાત્તસ્ય નૃશંસસ્ય રામસ્યાશ્રમવાસિનઃ ॥ 23 ॥
તં શરૈર્નિશિતૈર્હત્વા લક્ષ્મણં ચ મહારથમ્ ।
હતનાથાં સુખં સીતાં યથાવદુપભોક્ષ્યસિ ॥ 24 ॥
રોચતે યતિ તે વાક્યં મમૈતદ્રાક્ષસેશ્વર ।
ક્રિયતાં નિર્વિશંકેન વચનં મમ રાવણ ॥ 25 ॥
વિજ્ઞાયેહાત્મશક્તિં ચ હ્રિયતામબલા બલાત્ ।
સીતા સર્વાનવદ્યાંગી ભાર્યાર્થે રાક્ષસેશ્વર ॥ 26 ॥
નિશમ્ય રામેણ શરૈરજિહ્મગૈ ર્હતાન્ જનસ્થાનગતાન્નિશાચરાન્ ।
ખરં ચ બુદ્ધ્વા નિહતં ચ દૂષણં ત્વમત્ર કૃત્યં પ્રતિપત્તુમર્હસિ ॥ 27 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અરણ્યકાંડે ચતુસ્ત્રિંશસ્સર્ગઃ ॥
