ശ്രീമദ്വാല്മീകീയ രാമായണേ അരണ്യകാംഡമ് ।
അഥ ചതുസ്ത്രിംശസ്സര്ഗഃ ।
തതശ്ശൂര്പണഖാം ദൃഷ്ട്വാ ബ്രുവംതീം പരുഷം വചഃ ।
അമാത്യമധ്യേ സംക്രുദ്ധഃ പരിപപ്രച്ഛ രാവണഃ ॥ 1 ॥
കശ്ച രാമഃ കഥംവീര്യഃ കിംരൂപഃ കിംപരാക്രമഃ ।
കിമര്ഥം ദംഡകാരണ്യം പ്രവിഷ്ടസ്സുദുരാസദമ് ॥ 2 ॥
ആയുധം കിംച രാമസ്യ നിഹതാ യേന രാക്ഷസാഃ ।
ഖരശ്ച നിഹതസ്സംഖ്യേ ദൂഷണസ്ത്രിശിരാസ്തഥാ ॥ 3 ॥
ഇത്യുക്താ രാക്ഷസേംദ്രേണ രാക്ഷസീ ക്രോധമൂര്ഛിതാ ।
തതോ രാമം യഥാതത്വമാഖ്യാതുമുപചക്രമേ ॥ 4 ॥
ദീര്ഘബാഹുർവിശാലാക്ഷ ശ്ചീരകൃഷ്ണാജിനാംബരഃ ।
കംദര്പസമരൂപശ്ച രാമോ ദശരഥാത്മജഃ ॥ 5 ॥
ശക്രചാപനിഭം ചാപം വികൃഷ്യ കനകാംഗദമ് ।
ദീപ്താന് ക്ഷിപതി നാരാചാന്സര്പാനിവ മഹാവിഷാന് ॥ 6 ॥
നാദദാനം ശരാന്ഘോരാന്നമുംചംതം ശിലീമുഖാന് ।
ന കാര്മുകം വികര്ഷംതം രാമം പശ്യാമി സംയുഗേ ॥ 7 ॥
ഹന്യമാനം തു തത്സൈന്യം പശ്യാമി ശരവൃഷ്ടിഭിഃ ।
ഇംദ്രേണേവോത്തമം സസ്യമാഹതംത്വശ്മവൃഷ്ടിഭിഃ ॥ 8 ॥
രക്ഷസാം ഭീമരൂപാണാം സഹസ്രാണി ചതുര്ദശ ।
നിഹതാനി ശരൈ സ്തീക്ഷ്ണൈസ്തേനൈകേന പദാതിനാ ॥ 9 ॥
അര്ധാധികമുഹൂര്തേന ഖരശ്ച സഹദൂഷണഃ ।
ഋഷീണാമഭയം ദത്തം കൃതക്ഷേമാശ്ച ദംഡകാഃ ॥ 10 ॥
ഏകാ കഥംചിന്മുക്താഹം പരിഭൂയ മഹാത്മനാ ।
സ്ത്രീവധം ശംകമാനേന രാമേണ വിദിതാത്മനാ ॥ 11 ॥
ഭ്രാതാ ചാസ്യ മഹാതേജാ ഗുണതസ്തുല്യവിക്രമഃ ।
അനുരക്തശ്ച ഭക്തശ്ച ലക്ഷ്മണോ നാമ വീര്യവാന് ॥ 12 ॥
അമര്ഷീ ദുര്ജയോ ജേതാ വിക്രാംതോ ബുദ്ധിമാന്ബലീ ।
രാമസ്യ ദക്ഷിണോ ബാഹുര്നിത്യം പ്രാണോ ബഹിശ്ചരഃ ॥ 13 ॥
രാമസ്യ തു വിശാലാക്ഷീ പൂര്ണേംദുസദൃശാനനാ ।
ധര്മപത്നീ പ്രിയാ ഭര്തുര്നിത്യം പ്രിയഹിതേ രതാ ॥ 14 ॥
സാ സുകേശീ സുനാസോരുസ്സുരൂപാ ച യശസ്വിനീ ।
ദേവതേവ വനസ്യാസ്യ രാജതേ ശ്രീരിവാപരാ ॥ 15 ॥
തപ്തകാംചനവര്ണാഭാ രക്തതുംഗനഖീ ശുഭാ ।
സീതാ നാമ വരാരോഹാ വൈദേഹീ തനുമധ്യമാ ॥ 16 ॥
നൈവ ദേവീ ന ഗംധർവീ ന യക്ഷീ ന ച കിന്നരീ ।
നൈവംരൂപാ മയാ നാരീ ദൃഷ്ടപൂർവാ മഹീതലേ ॥ 17 ॥
യസ്യ സീതാ ഭവേദ്ഭാര്യാ യം ച ഹൃഷ്ടാ പരിഷ്വജേത് ।
അതിജീവേത്സ സർവേഷു ലോകേഷ്വപി പുരംദരാത് ॥ 18 ॥
സാ സുശീലാ വപുശ്ശ്ലാഘ്യാ രൂപേണാപ്രതിമാ ഭുവി ।
തവാനുരൂപാ ഭാര്യാ സ്യാത്ത്വം ച തസ്യാസ്തഥാ പതിഃ ॥ 19 ॥
താം തു വിസ്തീര്ണജഘനാം പീനശ്രോണിപയോധരാമ് ।
ഭാര്യാര്ഥേ ച തവാനേതുമുദ്യതാഹം വരാനനാമ് ॥ 20 ॥
വിരൂപിതാസ്മി ക്രൂരേണ ലക്ഷ്മണേന മഹാഭുജ ।
താം തു ദൃഷ്ട്വാദ്യ വൈദേഹീം പൂര്ണചംദ്രനിഭാനനാമ് ।
മന്മഥസ്യ ശരാണാം വൈ ത്വം വിധേയോ ഭവിഷ്യസി ॥ 21 ॥
യദി തസ്യാമഭിപ്രായോ ഭാര്യാര്ഥേ തവ ജായതേ ।
ശീഘ്രമുദ്ധ്രിയതാം പാദോ ജയാര്ഥമിഹ ദക്ഷിണഃ ॥ 22 ॥
കുരു പ്രിയം തഥാ തേഷാം രക്ഷസാം രാക്ഷസേശ്വര ।
വധാത്തസ്യ നൃശംസസ്യ രാമസ്യാശ്രമവാസിനഃ ॥ 23 ॥
തം ശരൈര്നിശിതൈര്ഹത്വാ ലക്ഷ്മണം ച മഹാരഥമ് ।
ഹതനാഥാം സുഖം സീതാം യഥാവദുപഭോക്ഷ്യസി ॥ 24 ॥
രോചതേ യതി തേ വാക്യം മമൈതദ്രാക്ഷസേശ്വര ।
ക്രിയതാം നിർവിശംകേന വചനം മമ രാവണ ॥ 25 ॥
വിജ്ഞായേഹാത്മശക്തിം ച ഹ്രിയതാമബലാ ബലാത് ।
സീതാ സർവാനവദ്യാംഗീ ഭാര്യാര്ഥേ രാക്ഷസേശ്വര ॥ 26 ॥
നിശമ്യ രാമേണ ശരൈരജിഹ്മഗൈ ര്ഹതാന് ജനസ്ഥാനഗതാന്നിശാചരാന് ।
ഖരം ച ബുദ്ധ്വാ നിഹതം ച ദൂഷണം ത്വമത്ര കൃത്യം പ്രതിപത്തുമര്ഹസി ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ചതുസ്ത്രിംശസ്സര്ഗഃ ॥
