ശ്രീമദ്വാല്മീകീയ രാമായണേ അരണ്യകാംഡമ് ।
അഥ സപ്തചത്വാരിംശസ്സര്ഗഃ ।
രാവണേന തു വൈദേഹീ തദാ പൃഷ്ടാ ജിഹീര്ഷതാ ।
പരിവ്രാജകരൂപേണ ശശംസാത്മാനമാത്മനാ ॥ 1 ॥
ബ്രാഹ്മണശ്ചാതിഥിശ്ചായമനുക്തോ ഹി ശപേത മാമ് ।
ഇതി ധ്യാത്വാ മുഹൂര്തം തു സീതാ വചനമബ്രവീത് ॥ 2 ॥
ദുഹിതാ ജനകസ്യാഹം മൈഥിലസ്യ മഹാത്മനഃ ।
സീതാ നാമ്നാസ്മി ഭദ്രം തേ രാമഭാര്യാ ദ്വിജോത്തമ ॥ 3 ॥
ഉഷിത്വാ ദ്വാദശ സമാ ഇക്ഷ്വാകുണാം നിവേശനേ ।
ഭുംജാനാ മാനുഷാന്ഭോഗാന്സർവകാമസമൃദ്ധിനീ ॥ 4 ॥
തതസ്ത്രയോദശേ വര്ഷേ രാജാമംത്രയത പ്രഭുഃ ।
അഭിഷേചയിതും രാമം സമേതോ രാജമംത്രിഭിഃ ॥ 5 ॥
തസ്മിന്സംഭ്രിയമാണേ തു രാഘവസ്യാഭിഷേചനേ ।
കൈകേയീ നാമ ഭര്താരമാര്യാ സാ യാചതേ വരമ് ॥ 6 ॥
പ്രതിഗൃഹ്യ തു കൈകേയീ ശ്വശുരം സുകൃതേന മേ ।
മമ പ്രവ്രാജനം ഭര്തുര്ഭരതസ്യാഭിഷേചനമ് ॥ 7 ॥
ദ്വാവയാചത ഭര്താരം സത്യസംധം നൃപോത്തമമ് ।
നാദ്യ ഭോക്ഷ്യേ ന ച സ്വപ്സ്യേ ന പാസ്യേച കഥംചന ॥ 8 ॥
ഏഷ മേ ജീവിതസ്യാംതോ രാമോ യദ്യഭിഷിച്യതേ ।
ഇതി ബ്രുവാണാം കൈകേയീം ശ്വശുരോ മേ സ മാനദഃ ॥ 9 ॥
അയാചതാര്ഥൈരന്വര്ഥൈര്ന ച യാംചാം ചകാര സാ ।
മമ ഭര്താമഹാതേജാ വയസാ പംചവിംശകഃ ॥ 10 ॥
അഷ്ടാദശ ഹി വര്ഷാണി മമ ജന്മനി ഗണ്യതേ ।
രാമേതി പ്രഥിതോ ലോകേ ഗുണവാന്സത്യവാന്ശുചിഃ ॥ 11 ॥
വിശാലാക്ഷോ മഹാബാഹുസ്സർവഭൂതഹിതേ രതഃ ।
കാമാര്തസ്തു മഹാതേജാഃ പിതാ ദശരഥസ്സ്വയമ് ॥ 12 ॥
കൈകേയ്യാഃ പ്രിയകാമാര്ഥം തം രാമം നാഭ്യഷേചയത് ।
അഭിഷേകായ തു പിതുസ്സമീപം രാമമാഗതമ് ॥ 13 ॥
കൈകേയീ മമ ഭര്താരമിത്യുവാച ധൃതം വചഃ ।
തവ പിത്രാ സമാജ്ഞപ്തം മമേദം ശൃണു രാഘവ ॥ 14 ॥
ഭരതായ പ്രദാതവ്യമിദം രാജ്യമകംടകമ് ।
ത്വയാ ഹി ഖലു വസ്തവ്യം നവ വര്ഷാണി പംച ച ॥ 15 ॥
വനേ പ്രവ്രജ കാകുത്സ്ഥ പിതരം മോചയാനൃതാന് ।
തഥേത്യുക്ത്വാ ച താം രാമഃ കൈകേയീമകുതോഭയഃ ॥ 16 ॥
ചകാര തദ്വചസ്തസ്യാ മമ ഭര്താ ദൃഢവ്രതഃ ।
ദദ്യാന്ന പ്രതിഗൃഹ്ണീയാത്സത്യം ബ്രൂയാന്ന ചാനൃതമ് ॥ 17 ॥
ഏതദ്ബ്രാഹ്മണ രാമസ്യ ധ്രൃവം വ്രതമനുത്തമമ് ।
തസ്യ ഭ്രാതാ തു ദ്വൈമാത്രോ ലക്ഷ്മണോ നാമ വീര്യവാന് ॥ 18 ॥
രാമസ്യ പുരുഷവ്യാഘ്രസ്സഹായസ്സമരേരിഹാ ।
സ ഭ്രാതാ ലക്ഷ്മണോ നാമ ധര്മചാരീ ദൃഢവ്രതഃ ॥ 19 ॥
അന്വഗച്ഛദ്ദനുഷ്പാണിഃ പ്രവ്രജംതം മയാ സഹ ।
ജടീ താപസരൂപേണ മയാ സഹ സഹാനുജഃ ॥ 20 ॥
പ്രവിഷ്ടോ ദംഡകാരണ്യം ധര്മനിത്യോ ജിതേംദ്രിയഃ ।
തേ വയം പ്രച്യുതാ രാജ്യാത്കൈകേയ്യാസ്തു കൃതേ ത്രയഃ ॥ 21 ॥
വിചരാമോ ദ്വിജശ്രേഷ്ഠ വനം ഗംഭീരമോജസാ ।
സമാശ്വസ മുഹൂര്തം തു ശക്യം വസ്തുമിഹ ത്വയാ ॥ 22 ॥
ആഗമിഷ്യതി മേ ഭര്താ വന്യമാദായ പുഷ്കലമ് ।
രുരൂന്ഗോധാ ന്വരാഹാംശ്ച ഹത്വാഽദായാഽമിഷാന്ബഹൂന് ॥ 23 ॥
സ ത്വം നാമ ച ഗോത്രംച കുലം ചാചക്ഷ്വ തത്ത്വതഃ ।
ഏകശ്ച ദംഡകാരണ്യേ കിമര്ഥം ചരസി ദ്വിജ ॥ 24 ॥
ഏവം ബൃവംത്യാം സീതായാം രാമപത്ന്യാം മഹാബലഃ ।
പ്രത്യുവാചോത്തരം തീവ്രം രാവണോ രാക്ഷസാധിപഃ ॥ 25 ॥
യേന വിത്രാസിതാ ലോകാസ്സദേവാസുരപന്നഗാഃ ।
അഹം തു രാവണോ നാമ സീതേ രക്ഷോഗണേശ്വരഃ ॥ 26 ॥
ത്വാം തു കാംചനവര്ണാഭാം ദൃഷ്ട്വാ കൌശേയവാസിനീമ് ।
രതിം സ്വകേഷു ദാരേഷു നാധിഗച്ഛാമ്യനിംദിതേ ॥ 27 ॥
ബഹ്വീനാമുത്തമസ്ത്രീണാമാഹൃതാനാമിതസ്തതഃ ।
സർവാസാമേവ ഭദ്രം തേ മമാഗ്രമഹിഷീ ഭവ ॥ 28 ॥
ലംകാനാമ സമുദ്രസ്യ മമ മധ്യേ മഹാപുരീ ।
സാഗരേണ പരിക്ഷിസ്താ നിവിഷ്ടാ നഗമൂര്ധനി ॥ 29 ॥
തത്ര സീതേ മയാ സാര്ധം വനേഷു വിഹരിഷ്യസി ।
ന ചാസ്യാരണ്യവാസസ്യ സ്പൃഹയിഷ്യസി ഭാമിനി ॥ 30 ॥
പംച ദാസ്യസ്സഹസ്രാണി സർവാഭരണഭൂഷിതാഃ ।
സീതേ പരിചരിഷ്യംതി ഭാര്യാ ഭവസി മേ യദി ॥ 31 ॥
രാവണേനൈവമുക്താ തു കുപിതാ ജനകാത്മജാ ।
പ്രത്യുവാചാനവദ്യാംഗീ തമനാദൃത്യ രാക്ഷസമ് ॥ 32 ॥
മഹാഗിരിമിവാകംപ്യം മഹേംദ്രസദൃശം പതിമ് ।
മഹോദധിമിവാക്ഷോഭ്യമഹം രാമമനുവ്രതാ ॥ 33 ॥
സർവലക്ഷണസംപന്നം ന്യഗ്രോധപരിമംഡലമ് ।
സത്യസംധം മഹാഭാഗമഹം രാമമനുവ്രതാ ॥ 34 ॥
മഹാബാഹും മഹോരസ്കം സിംഹവിക്രാംതഗാമിനമ് ।
നൃസിംഹം സിംഹസംകാശമഹം രാമമനുവ്രതാ ॥ 35 ॥
പൂര്ണചംദ്രാനനം രാമം രാജവത്സം ജിതേംദ്രിയമ് ।
പൃഥുകീര്തിം മഹാത്മാനമഹം രാമമനുവ്രതാ ॥ 36 ॥
ത്വം പുനര്ജംബുകസ്സിംഹീം മാമിച്ഛസി സുദുര്ലഭാമ് ।
നാഹം ശക്യാ ത്വയാ സ്പ്രഷ്ടുമാദിത്യസ്യ പ്രഭാ യഥാ ॥ 37 ॥
പാദപാന്കാംചനാന്നൂനം ബഹൂന്പശ്യസി മംദഭാക് ।
രാഘപസ്യ പ്രിയാം ഭാര്യാം യസ്ത്വമിച്ഛസി രാവണ ॥ 38 ॥
ക്ഷുധിതസ്യ ഹി സിംഹസ്യ മൃഗശത്രോസ്തരസ്വിനഃ ।
ആശീവിഷസ്യ മുഖാദ്ദംഷ്ട്രാമാദാതുമിച്ഛസി ॥ 39 ॥
മംദരം പർവതശ്രേഷ്ഠം പാണിനാ ഹര്തുമിച്ഛസി ।
കാലകൂടം വിഷം പീത്വാ സ്വസ്തിമാന്ഗംതുമിച്ഛസി ॥ 40 ॥
അക്ഷി സൂച്യാ പ്രമൃജസി ജിഹ്വയാ ലേക്ഷി ച ക്ഷുരമ് ।
രാഘവസ്യ പ്രിയാം ഭാര്യാം യോഽധിഗംതും ത്വമിച്ഛസി ॥ 41 ॥
അവസജ്യ ശിലാം കംഠേ സമുദ്രം തര്തുമിച്ഛസി ।
സൂര്യാചംദ്രമസൌ ചോഭൌ പാണിഭ്യാം ഹര്തുമിച്ഛസി ॥ 42 ॥
യോ രാമസ്യ പ്രിയാം ഭാര്യാം പ്രധര്ഷയിതുമിച്ഛസി ।
അഗ്നിം പ്രജ്വലിതം ദൃഷ്ട്വാ വസ്ത്രേണാഹര്തുമിച്ഛസി ॥ 43 ॥
കാല്യാണവൃത്താം രാമസ്യ യോ ഭാര്യാംഹര്തുമിച്ഛസി ।
അയോമുഖാനാം ശൂലാനാമഗ്രേ ചരിതുമിച്ഛസി ॥ 44 ॥
രാമസ്യ സദൃശീം ഭാര്യാം യോഽധിഗംതും ത്വമിച്ഛസി ।
യദംതരം സിംഹശൃഗാലയോർവനേ യദംതരം സ്യംദിനികാ സമുദ്രയോഃ ।
സുരാഗ്ര്യ സൌവീരകയോര്യദംതരം തദംതരം വൈ തവ രാഘവസ്യ ച ॥ 45 ॥
യദംതരം കാംചനസീസലോഹയോര്യദംതരം ചംദനവാരിപംകയോഃ ।
യദംതരം ഹസ്തിബിഡാലയോർവനേ തദംതരം ദാശരഥേസ്തവൈവ ച ॥ 46 ॥
യദംതരം വായസവൈനതേയയോര്യദംതരം മദ്ഗുമയൂരയോരപി ।
യദംതരം സാരസഗൃധ്രയോർവനേ തദംതരം ദാശരഥേസ്തവൈവ ച ॥ 47 ॥
തസ്മിന്സഹസ്രാക്ഷസമപ്രഭാവേ രാമേ സ്ഥിതേ കാര്മുകബാണപാണൌ ।
ഹൃതാപി തേഹം ന ജരാം ഗമിഷ്യേ വജ്രം യഥാ മക്ഷികയാവഗീര്ണമ് ॥ 48 ॥
ഇതീവ തദ്വാക്യമദുഷ്ടഭാവാ സുദുഷ്ടമുക്ത്വാ രജനീചരം തമ് ।
ഗാത്രപ്രകംപാദ്വ്യഥിതാ ബഭൂവ വാതോദ്ധതാ സാ കദലീവ തന്വീ ॥ 49 ॥
താം വേപമാനാമുപലക്ഷ്യ സീതാം സ രാവണോ മൃത്യുസമപ്രഭാവഃ ।
കുലം ബലം നാമ ച കര്മ ചാത്മനഃ സമാചചക്ഷേ ഭയകാരണാര്ഥമ് ॥ 50 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ സപ്തചത്വാരിംശസ്സര്ഗഃ ॥
