ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଦ୍ଵାତ୍ରିଂଶସ୍ସର୍ଗଃ ।
ଅଂଗଦସ୍ୟ ଵଚଶ୍ଶ୍ରୁତ୍ଵା ସୁଗ୍ରୀଵସ୍ସଚିଵୈସ୍ସହ ।
ଲକ୍ଷ୍ମଣଂ କୁପିତଂ ଶ୍ରୁତ୍ଵା ମୁମୋଚାସନମାତ୍ମଵାନ୍ ॥ 1 ॥
ସଚିଵାନବ୍ରଵୀଦ୍ଵାକ୍ୟଂ ନିଶ୍ଚିତ୍ୟ ଗୁରୁଲାଘଵମ୍ ।
ମଂତ୍ରଜ୍ଞାନ୍ମଂତ୍ରକୁଶଲୋ ମଂତ୍ରେଷୁ ପରିନିଷ୍ଠିତାନ୍ ॥ 2 ॥
ନ ମେ ଦୁର୍ଵ୍ୟାହୃତଂ କିଂଚିନ୍ନାପି ମେ ଦୁରନୁଷ୍ଠିତମ୍ ।
ଲକ୍ଷ୍ମଣୋ ରାଘଵଭ୍ରାତା କ୍ରୁଦ୍ଧଃ କିମିତି ଚିଂତୟେ ॥ 3 ॥
ଅସୁହୃଦ୍ଭିର୍ମମାମିତ୍ରୈର୍ନିତ୍ୟମଂତରଦର୍ଶିଭିଃ ।
ମମ ଦୋଷାନସଂଭୂତାନ୍ ଶ୍ରାଵିତୋ ରାଘଵାନୁଜଃ ॥ 4 ॥
ଅତ୍ର ତାଵଦ୍ୟଥାବୁଦ୍ଧି ସର୍ଵୈରେଵ ୟଥାଵିଧି ।
ଭାଵସ୍ୟ ନିଶ୍ଚୟସ୍ତାଵଦ୍ଵିଜ୍ଞେୟୋ ନିପୁଣଂ ଶନୈଃ ॥ 5 ॥
ନ ଖଲ୍ଵସ୍ତି ମମ ତ୍ରାସୋ ଲକ୍ଷ୍ମଣାନ୍ନାପି ରାଘଵାତ୍ ।
ମିତ୍ରଂ ତ୍ଵସ୍ଥାନକୁପିତଂ ଜନୟତ୍ୟେଵ ସଂଭ୍ରମମ୍ ॥ 6 ॥
ସର୍ଵଥା ସୁକରଂ ମିତ୍ରଂ ଦୁଷ୍କରଂ ପରିପାଲନମ୍ ।
ଅନିତ୍ୟତ୍ଵାଚ୍ଛ ଚିତ୍ତାନାଂ ପ୍ରୀତିରଲ୍ପେପି ଭିଦ୍ୟତେ ॥ 7 ॥
ଅତୋ ନିମିତ୍ତଂ ତ୍ରସ୍ତୋହଂ ରାମେଣ ତୁ ମହାତ୍ମନା ।
ୟନ୍ମୟୋପକୃତଂ ଶକ୍ୟଂ ପ୍ରତିକର୍ତୁଂ ନ ତନ୍ମୟା ॥ 8 ॥
ସୁଗ୍ରୀଵେଣୈଵମୁକ୍ତସ୍ତୁ ହନୁମାନ୍ହରିପୁଂଗଵଃ ।
ଉଵାଚ ସ୍ଵେନ ତର୍କେଣ ମଧ୍ୟେ ଵାନରମଂତ୍ରିଣାମ୍ ॥ 9 ॥
ସର୍ଵଥା ନୈତଦାଶ୍ଚର୍ୟଂ ୟସ୍ତ୍ଵଂ ହରିଗଣେଶ୍ଵର ।
ନ ଵିସ୍ମରସି ସୁସ୍ନିଗ୍ଧମୁପକାର କୃତଂ ଶୁଭମ୍ ॥ 10 ॥
ରାଘଵେଣ ତୁ ଵୀରେଣ ଭୟମୁତ୍ସୃଜ୍ୟ ଦୂରତଃ ।
ତ୍ଵତ୍ପ୍ରିୟାର୍ଥଂ ହତୋ ଵାଲୀ ଶକ୍ରତୁଲ୍ୟପରାକ୍ରମଃ ॥ 11 ॥
ସର୍ଵଥା ପ୍ରଣୟାତ୍କୃଦ୍ଧୋ ରାଘଵୋ ନାତ୍ର ସଂଶୟଃ ।
ଭ୍ରାତରଂ ସଂପ୍ରହିତଵାନ୍ଲକ୍ଷ୍ମଣଂ ଲକ୍ଷ୍ମିଵର୍ଧନମ୍ ॥ 12 ॥
ତ୍ଵଂ ପ୍ରମତ୍ତୋ ନ ଜାନୀଷେ କାଲଂ କାଲଵିଦାଂ ଵର ।
ଫୁଲ୍ଲସପ୍ତଚ୍ଛଦଶ୍ୟାମା ପ୍ରଵୃତ୍ତା ତୁ ଶରଚ୍ଛିଵା ॥ 13 ॥
ନିର୍ମଲଗ୍ରହନକ୍ଷତ୍ରା ଦ୍ୟୌଃ ପ୍ରନଷ୍ଟଵଲାହକା ।
ପ୍ରସନ୍ନାଶ୍ଚ ଦିଶସ୍ସର୍ଵାସ୍ସରିତଶ୍ଚ ସରାଂସି ଚ ॥ 14 ॥
ପ୍ରାପ୍ତମୁଦ୍ୟୋଗକାଲଂ ତୁ ନାଵୈଷି ହରିପୁଂଗଵ ।
ତ୍ଵଂ ପ୍ରମତ୍ତ ଇତି ଵ୍ୟକ୍ତଂ ଲକ୍ଷ୍ମଣୋଽୟମିହାଗତଃ ॥ 15 ॥
ଆର୍ତସ୍ୟ ହୃତଦାରସ୍ୟ ପୁରୁଷଂ ପୁରୁଷାଂତରାତ୍ ।
ଵଚନଂ ମର୍ଷଣୀୟଂ ତେ ରାଘଵସ୍ୟ ମହାତ୍ମନଃ ॥ 16 ॥
କୃତାପରାଧସ୍ୟ ହି ତେ ନାନ୍ୟତ୍ପଶ୍ୟାମ୍ୟହଂ କ୍ଷମମ୍ ।
ଅଂତରେଣାଂଜଲିଂ ବଦ୍ଧ୍ଵା ଲକ୍ଷ୍ମଣସ୍ୟ ପ୍ରସାଦନାତ୍ ॥ 17 ॥
ନିୟୁକ୍ତୈର୍ମଂତ୍ରିଭିର୍ଵାଚ୍ୟୋ ହ୍ୟଵଶ୍ୟଂ ପାର୍ଥିଵୋ ହିତମ୍ ।
ଅତ ଏଵ ଭୟଂ ତ୍ୟକ୍ତ୍ଵା ବ୍ରଵୀମ୍ୟଵଧୃତଂ ଵଚଃ ॥ 18 ॥
ଅଭିକ୍ରୁଦ୍ଧସ୍ସମର୍ଥୋ ହି ଚାପମୁଦ୍ୟମ୍ୟ ରାଘଵଃ ।
ସଦେଵାସୁରଗଂଧର୍ଵଂ ଵଶେ ସ୍ଥାପୟିତୁଂ ଜଗତ୍ ॥ 19 ॥
ନ ସ କ୍ଷମଃ କୋପୟିତୁଂ ୟଃ ପ୍ରସାଦ୍ୟଃ ପୁନର୍ଭଵେତ୍ ।
ପୂର୍ଵୋପକାରଂ ସ୍ମରତା କୃତଜ୍ଞେନ ଵିଶେଷତଃ ॥ 20 ॥
ତସ୍ୟ ମୂର୍ଧ୍ନା ପ୍ରଣମ୍ୟ ତ୍ଵଂ ସପୁତ୍ରସ୍ସସୁହୃଜ୍ଜନଃ ।
ରାଜଂସ୍ତିଷ୍ଠସ୍ଵ ସମୟେ ଭର୍ତୁର୍ଭାର୍ୟେଵ ତଦ୍ଵଶଃ ॥ 21 ॥
ନ ରାମରାମାନୁଜଶାସନଂ ତ୍ଵୟା କପୀଂଦ୍ର ୟୁକ୍ତଂ ମନସାଽପ୍ୟପୋହିତୁମ୍ ।
ମନୋ ହି ତେ ଜ୍ଞାସ୍ୟତି ମାନୁଷଂ ବଲଂ ସ ରାଘଵସ୍ୟାସ୍ୟ ସୁରେଂଦ୍ରଵର୍ଚସଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଦ୍ଵାତ୍ରିଂଶସ୍ସର୍ଗଃ ॥
