ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ദ്വാത്രിംശസ്സര്ഗഃ ।
അംഗദസ്യ വചശ്ശ്രുത്വാ സുഗ്രീവസ്സചിവൈസ്സഹ ।
ലക്ഷ്മണം കുപിതം ശ്രുത്വാ മുമോചാസനമാത്മവാന് ॥ 1 ॥
സചിവാനബ്രവീദ്വാക്യം നിശ്ചിത്യ ഗുരുലാഘവമ് ।
മംത്രജ്ഞാന്മംത്രകുശലോ മംത്രേഷു പരിനിഷ്ഠിതാന് ॥ 2 ॥
ന മേ ദുർവ്യാഹൃതം കിംചിന്നാപി മേ ദുരനുഷ്ഠിതമ് ।
ലക്ഷ്മണോ രാഘവഭ്രാതാ ക്രുദ്ധഃ കിമിതി ചിംതയേ ॥ 3 ॥
അസുഹൃദ്ഭിര്മമാമിത്രൈര്നിത്യമംതരദര്ശിഭിഃ ।
മമ ദോഷാനസംഭൂതാന് ശ്രാവിതോ രാഘവാനുജഃ ॥ 4 ॥
അത്ര താവദ്യഥാബുദ്ധി സർവൈരേവ യഥാവിധി ।
ഭാവസ്യ നിശ്ചയസ്താവദ്വിജ്ഞേയോ നിപുണം ശനൈഃ ॥ 5 ॥
ന ഖല്വസ്തി മമ ത്രാസോ ലക്ഷ്മണാന്നാപി രാഘവാത് ।
മിത്രം ത്വസ്ഥാനകുപിതം ജനയത്യേവ സംഭ്രമമ് ॥ 6 ॥
സർവഥാ സുകരം മിത്രം ദുഷ്കരം പരിപാലനമ് ।
അനിത്യത്വാച്ഛ ചിത്താനാം പ്രീതിരല്പേപി ഭിദ്യതേ ॥ 7 ॥
അതോ നിമിത്തം ത്രസ്തോഹം രാമേണ തു മഹാത്മനാ ।
യന്മയോപകൃതം ശക്യം പ്രതികര്തും ന തന്മയാ ॥ 8 ॥
സുഗ്രീവേണൈവമുക്തസ്തു ഹനുമാന്ഹരിപുംഗവഃ ।
ഉവാച സ്വേന തര്കേണ മധ്യേ വാനരമംത്രിണാമ് ॥ 9 ॥
സർവഥാ നൈതദാശ്ചര്യം യസ്ത്വം ഹരിഗണേശ്വര ।
ന വിസ്മരസി സുസ്നിഗ്ധമുപകാര കൃതം ശുഭമ് ॥ 10 ॥
രാഘവേണ തു വീരേണ ഭയമുത്സൃജ്യ ദൂരതഃ ।
ത്വത്പ്രിയാര്ഥം ഹതോ വാലീ ശക്രതുല്യപരാക്രമഃ ॥ 11 ॥
സർവഥാ പ്രണയാത്കൃദ്ധോ രാഘവോ നാത്ര സംശയഃ ।
ഭ്രാതരം സംപ്രഹിതവാന്ലക്ഷ്മണം ലക്ഷ്മിവര്ധനമ് ॥ 12 ॥
ത്വം പ്രമത്തോ ന ജാനീഷേ കാലം കാലവിദാം വര ।
ഫുല്ലസപ്തച്ഛദശ്യാമാ പ്രവൃത്താ തു ശരച്ഛിവാ ॥ 13 ॥
നിര്മലഗ്രഹനക്ഷത്രാ ദ്യൌഃ പ്രനഷ്ടവലാഹകാ ।
പ്രസന്നാശ്ച ദിശസ്സർവാസ്സരിതശ്ച സരാംസി ച ॥ 14 ॥
പ്രാപ്തമുദ്യോഗകാലം തു നാവൈഷി ഹരിപുംഗവ ।
ത്വം പ്രമത്ത ഇതി വ്യക്തം ലക്ഷ്മണോഽയമിഹാഗതഃ ॥ 15 ॥
ആര്തസ്യ ഹൃതദാരസ്യ പുരുഷം പുരുഷാംതരാത് ।
വചനം മര്ഷണീയം തേ രാഘവസ്യ മഹാത്മനഃ ॥ 16 ॥
കൃതാപരാധസ്യ ഹി തേ നാന്യത്പശ്യാമ്യഹം ക്ഷമമ് ।
അംതരേണാംജലിം ബദ്ധ്വാ ലക്ഷ്മണസ്യ പ്രസാദനാത് ॥ 17 ॥
നിയുക്തൈര്മംത്രിഭിർവാച്യോ ഹ്യവശ്യം പാര്ഥിവോ ഹിതമ് ।
അത ഏവ ഭയം ത്യക്ത്വാ ബ്രവീമ്യവധൃതം വചഃ ॥ 18 ॥
അഭിക്രുദ്ധസ്സമര്ഥോ ഹി ചാപമുദ്യമ്യ രാഘവഃ ।
സദേവാസുരഗംധർവം വശേ സ്ഥാപയിതും ജഗത് ॥ 19 ॥
ന സ ക്ഷമഃ കോപയിതും യഃ പ്രസാദ്യഃ പുനര്ഭവേത് ।
പൂർവോപകാരം സ്മരതാ കൃതജ്ഞേന വിശേഷതഃ ॥ 20 ॥
തസ്യ മൂര്ധ്നാ പ്രണമ്യ ത്വം സപുത്രസ്സസുഹൃജ്ജനഃ ।
രാജംസ്തിഷ്ഠസ്വ സമയേ ഭര്തുര്ഭാര്യേവ തദ്വശഃ ॥ 21 ॥
ന രാമരാമാനുജശാസനം ത്വയാ കപീംദ്ര യുക്തം മനസാഽപ്യപോഹിതുമ് ।
മനോ ഹി തേ ജ്ഞാസ്യതി മാനുഷം ബലം സ രാഘവസ്യാസ്യ സുരേംദ്രവര്ചസഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ദ്വാത്രിംശസ്സര്ഗഃ ॥
