ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ പംചപംചാശസ്സര്ഗഃ ।
ശ്രുത്വാ ഹനുമതോ വാക്യം പ്രശ്രിതം ധര്മസംഹിതമ് ।
സ്വാമിസത്കാരസംയുക്തമംഗദോ വാക്യമബ്രവീത് ॥ 1 ॥
സ്ഥൈര്യമാത്മമനശ്ശൌചമാനൃശംസ്യമഥാഽര്ജവമ് ।
വിക്രമശ്ചൈവ ധൈര്യം ച സുഗ്രീവേ നോപപദ്യതേ ॥ 2 ॥
ഭ്രാതുര്ജ്യേഷ്ഠസ്യ യോ ഭാര്യാം ജീവതോ മഹിഷീം പ്രിയാമ് ।
ധര്മേണ മാതരം യസ്തു സ്വീകരോതി ജുഗുപ്സിതഃ ॥ 3 ॥
കഥം സ ധര്മം ജാനീതേ യേന ഭ്രാത്രാ മഹാത്മനാ ।
യുദ്ധായാഭിനിയുക്തേന ബിലസ്യ പിഹിതം മുഖമ് ॥ 4 ॥
സത്യാത്പാണിഗൃഹീതശ്ച കൃതകര്മാ മഹായശാഃ ।
വിസ്മൃതോ രാഘവോ യേന സ കസ്യ തു കൃതം സ്മരേത് ॥ 5 ॥
ലക്ഷ്മണസ്യ ഭയാദ്യേന നാധര്മഭയഭീരുണാ ।
ആദിഷ്ടാ മാര്ഗിതും സീതാം ധര്മമസ്മിന്കഥം ഭവേത് ॥ 6 ॥
തസ്മിന്പാപേ കൃതഘ്നേ തു സ്മൃതിഹീനേ ചലാത്മനി ।
ആര്യഃ കോ വിശ്വസേജ്ജാതു തത്കുലീനോ ജിജീവിഷുഃ ॥ 7 ॥
രാജ്യേ പുത്രഃ പ്രതിഷ്ഠാപ്യസ്സഗുണോ വിഗുണോഽപി വാ ।
കഥം ശത്രുകുലീനം മാം സുഗ്രീവോ ജീവയിഷ്യതി ॥ 8 ॥
ഭിന്നമംത്രോഽപരാദ്ധശ്ച ഹീനശക്തിഃ കഥം ഹ്യഹമ് ।
കിഷ്കിംധാം പ്രാപ്യ ജീവേയമനാഥ ഇവ ദുര്ബലഃ ॥ 9 ॥
പാംശുദംഡേന ഹി മാം ബംധനേ നോപപാദയേത് ।
ശഠഃ ക്രൂരോ നൃശംസശ്ച സുഗ്രീവോ രാജ്യകാരണാത് ॥ 10 ॥
ബംധനാദ്വാഽവസാദാന്മേ ശ്രേയഃ പ്രായോപവേശനമ് ।
അനുജാനീത മാം സർവേ ഗൃഹം ഗച്ഛംതു വാനരാഃ ॥ 11 ॥
അഹം വഃ പ്രതിജാനാമി നാഗമിഷ്യാമ്യഹം പുരീമ് ।
ഇഹൈവ പ്രായമാസിഷ്യേ ശ്രേയോ മരണമേവ മേ ॥ 12 ॥
അഭിവാദനപൂർവം ഹി രാഘവൌ ബലശാലിനൌ ।
അഭിവാദനപൂർവം തു രാജാ കുശലമേവ ച ॥ 13 ॥
വാച്യസ്താതോ യവീയാന്മേ സുഗ്രീവോ വാനരേശ്വരഃ ।
ആരോഗ്യപൂർവം കുശലം വാച്യാ മാതാ രുമാ ച മേ ॥ 14 ॥
മാതരം ചൈവ മേ താരാമാശ്വാസയിതുമര്ഹഥ ।
പ്രകൃത്യാ പ്രിയപുത്രാ സാ സാനുക്രോശാ തപസ്വിനീ ॥ 15 ॥
വിനഷ്ടമിഹ മാം ശ്രുത്വാ വ്യക്തം ഹാസ്യതി ജീവിതമ് ।
ഏതാവദുക്ത്വാ വചനം വൃദ്ധാംസ്താനഭിവാദ്യ ച ॥ 16 ॥
വിവേശ ചാംഗദോ ഭൂമൌ രുദംദര്ഭേഷു ദുര്മനാഃ ।
തസ്യ സംവിശതസ്തത്ര രുദംതോ വാനരര്ഷഭാഃ ॥ 17 ॥
നയനേഭ്യഃ പ്രമുമുചുരുഷ്ണം വൈ വാരി ദുഃഖിതാഃ ।
സുഗ്രീവം ചൈവ നിംദംതഃ പ്രശംസംതശ്ച വാലിനമ് ॥ 18 ॥
പരിവാര്യാംഗദം സർവേ വ്യവസന്പ്രായമാസിതുമ് ।
മതം തദ്വാലിപുത്രസ്യ വിജ്ഞായ പ്ലവഗര്ഷഭാഃ ॥ 19 ॥
ഉപസ്പൃശ്യോദകം തത്ര പ്രാങ്മുഖാസ്സമുപാവിശന് ।
ദക്ഷിണാഗ്രേഷു ദര്ഭേഷു ഉദക്തീരം സമാശ്രിതാഃ ॥ 20 ॥
മുമൂര്ഷവോ ഹരിശ്രേഷ്ഠാ ഏതത് ക്ഷമമിതി സ്മ ഹ ।
രാമസ്യ വനവാസം ച ക്ഷയം ദശരഥസ്യ ച ॥ 21 ॥
ജനസ്ഥാനവധം ചൈവ വധം ചൈവ ജടായുഷഃ ।
ഹരണം ചൈവ വൈദേഹ്യാ വാലിനശ്ച വധം രണേ ॥ 22 ॥
രാമകോപം ച വദതാം ഹരീണാം ഭയമാഗതമ് ।
സ സംവിശദ്ഭിബഹുഭിര്മഹീധരോ മഹാദ്രികൂടപ്രതിമൈഃ പ്ലവംഗമൈഃ ।
ബഭൂവ സന്നാദിതനിര്ദരാംതരോ ഭൃശം നദദ്ഭിര്ജലദൈരിവോല്ബണൈഃ ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ പംചപംചാശസ്സര്ഗഃ ॥
