ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ତ୍ରିଷଷ୍ଟିତମସ୍ସର୍ଗଃ ।
ଏତୈରନ୍ୟୈଶ୍ଚ ବହୁଭିର୍ଵାକ୍ୟୈର୍ଵାକ୍ୟଵିଶାରଦଃ ।
ମାଂ ପ୍ରଶସ୍ୟାଭ୍ୟନୁଜ୍ଞାପ୍ୟ ପ୍ରଵିଷ୍ଟସ୍ସ ସ୍ଵମାଲୟମ୍ ॥ 1 ॥
କଂଦରାତ୍ତୁ ଵିସର୍ପିତ୍ଵା ପର୍ଵତସ୍ୟ ଶନୈଶ୍ଶନୈଃ ।
ଅହଂ ଵିଂଧ୍ୟଂ ସମାରୁହ୍ୟ ଭଵତଃ ପ୍ରତିପାଲୟେ ॥ 2 ॥
ଅଦ୍ୟ ତ୍ଵେତସ୍ୟ କାଲସ୍ୟ ସାଗ୍ରଂ ଵର୍ଷଶତଂ ଗତମ୍ ।
ଦେଶକାଲପ୍ରତୀକ୍ଷୋଽସ୍ମି ହୃଦି କୃତ୍ଵା ମୁନେର୍ଵଚଃ ॥ 3 ॥
ମହାପ୍ରସ୍ଥାନମାସାଦ୍ୟ ସ୍ଵର୍ଗତେ ତୁ ନିଶାକରେ ।
ମାଂ ନିର୍ଦହତି ସଂତାପୋ ଵିତର୍କୈର୍ବହୁଭିର୍ଵୃତମ୍ ॥ 4 ॥
ଉତ୍ଥିତାଂ ମରଣେ ବୁଦ୍ଧିଂ ମୁନିଵାକ୍ୟୈର୍ନିଵର୍ତୟେ ।
ବୁଦ୍ଧିର୍ୟା ତେନ ମେ ଦତ୍ତା ପ୍ରାଣାନାଂ ରକ୍ଷଣାୟ ତୁ ॥ 5 ॥
ସା ମେଽପନୟତେ ଦୁଃଖଂ ଦୀପ୍ତେଵାଗ୍ନିଶିଖା ତମଃ ।
ବୁଦ୍ଧ୍ୟତା ଚ ମୟା ଵୀର୍ୟଂ ରାଵଣସ୍ୟ ଦୁରାତ୍ମନଃ ॥ 6 ॥
ପୁତ୍ରସ୍ସଂତର୍ଜିତୋ ଵାଗ୍ଭିର୍ନ ତ୍ରାତା ମୈଥିଲୀ କଥମ୍ ।
ତସ୍ୟା ଵିଲପିତଂ ଶ୍ରୁତ୍ଵା ତୌ ଚ ସୀତାଵିନାକୃତୌ ॥ 7 ॥
ନ ମେ ଦଶରଥସ୍ନେହାତ୍ପୁତ୍ରେଣୋତ୍ପାଦିତଂ ପ୍ରିୟମ୍ ।
ତସ୍ୟ ତ୍ଵେଵଂ ବ୍ରୁଵାଣସ୍ୟ ସଂପାତେର୍ଵାନରୈସ୍ସହ ॥ 8 ॥
ଉତ୍ପେତତୁସ୍ତଦା ପକ୍ଷୌ ସମକ୍ଷଂ ଵନଚାରିଣାମ୍ ।
ସ ଦୃଷ୍ଟ୍ଵା ସ୍ଵାଂ ତନୁଂ ପକ୍ଷୈରୁଦ୍ଗତୈରରୁଣଚ୍ଛଦୈଃ ॥ 9 ॥
ପ୍ରହର୍ଷମତୁଲଂ ଲେଭେ ଵାନରାଂଶ୍ଚେଦମବ୍ରଵୀତ୍ ।
ଋଷେର୍ନିଶାକରସ୍ୟୈଵ ପ୍ରଭାଵାଦମିତାତ୍ମନଃ ॥ 10 ॥
ଆଦିତ୍ୟରଶ୍ମିନିର୍ଦଗ୍ଧୌ ପକ୍ଷୌ ମେ ପୁନରୁପସ୍ଥିତୌ ।
ୟୌଵନେ ଵର୍ତମାନସ୍ୟ ମମାସୀଦ୍ୟଃ ପରାକ୍ରମଃ ॥ 11 ॥
ତମେଵାଦ୍ୟାଵଗଚ୍ଛାମି ବଲଂ ପୌରୁଷମେଵ ଚ ।
ସର୍ଵଥା କ୍ରିୟତାଂ ୟତ୍ନ ସ୍ସୀତାମଧିଗମିଷ୍ୟଥ ॥ 12 ॥
ପକ୍ଷଲାଭୋ ମମାୟଂ ଵସ୍ସିଦ୍ଧିପ୍ରତ୍ୟୟକାରକଃ ।
ଇତ୍ୟୁକ୍ତ୍ଵା ସ ତାନ୍ହରୀନ୍ ସର୍ଵାନ୍ସଂପାତିଃ ପତଗୋତ୍ତମଃ ॥ 13 ॥
ଉତ୍ପପାତ ଗିରେଶ୍ଶୃଂଗାଜ୍ଜିଜ୍ଞାସୁଃ ଖଗମୋ ଗତିମ୍ ।
ତସ୍ୟ ତଦ୍ଵଚନଂ ଶ୍ରୁତ୍ଵା ପ୍ରତିସଂହୃଷ୍ଟମାନସାଃ ॥ 14 ॥
ବଭୂଵୁର୍ହରିଶାର୍ଦୂଲା ଵିକ୍ରମାଭ୍ୟୁଦୟୋନ୍ମୁଖାଃ ।
ଅଥ ପଵନସମାନଵିକ୍ରମାଃ ପ୍ଲଵଗଵରାଃ ପ୍ରତିଲବ୍ଧପୌରୁଷାଃ ।
ଅଭିଜିଦଭିମୁଖା ଦିଶଂ ୟୟୁ ର୍ଜନକସୁତାପରିମାର୍ଗଣୋନ୍ମୁଖାଃ ॥ 15 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ତ୍ରିଷଷ୍ଟିତମସ୍ସର୍ଗଃ ॥
