ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ത്രിഷഷ്ടിതമസ്സര്ഗഃ ।
ഏതൈരന്യൈശ്ച ബഹുഭിർവാക്യൈർവാക്യവിശാരദഃ ।
മാം പ്രശസ്യാഭ്യനുജ്ഞാപ്യ പ്രവിഷ്ടസ്സ സ്വമാലയമ് ॥ 1 ॥
കംദരാത്തു വിസര്പിത്വാ പർവതസ്യ ശനൈശ്ശനൈഃ ।
അഹം വിംധ്യം സമാരുഹ്യ ഭവതഃ പ്രതിപാലയേ ॥ 2 ॥
അദ്യ ത്വേതസ്യ കാലസ്യ സാഗ്രം വര്ഷശതം ഗതമ് ।
ദേശകാലപ്രതീക്ഷോഽസ്മി ഹൃദി കൃത്വാ മുനേർവചഃ ॥ 3 ॥
മഹാപ്രസ്ഥാനമാസാദ്യ സ്വര്ഗതേ തു നിശാകരേ ।
മാം നിര്ദഹതി സംതാപോ വിതര്കൈര്ബഹുഭിർവൃതമ് ॥ 4 ॥
ഉത്ഥിതാം മരണേ ബുദ്ധിം മുനിവാക്യൈര്നിവര്തയേ ।
ബുദ്ധിര്യാ തേന മേ ദത്താ പ്രാണാനാം രക്ഷണായ തു ॥ 5 ॥
സാ മേഽപനയതേ ദുഃഖം ദീപ്തേവാഗ്നിശിഖാ തമഃ ।
ബുദ്ധ്യതാ ച മയാ വീര്യം രാവണസ്യ ദുരാത്മനഃ ॥ 6 ॥
പുത്രസ്സംതര്ജിതോ വാഗ്ഭിര്ന ത്രാതാ മൈഥിലീ കഥമ് ।
തസ്യാ വിലപിതം ശ്രുത്വാ തൌ ച സീതാവിനാകൃതൌ ॥ 7 ॥
ന മേ ദശരഥസ്നേഹാത്പുത്രേണോത്പാദിതം പ്രിയമ് ।
തസ്യ ത്വേവം ബ്രുവാണസ്യ സംപാതേർവാനരൈസ്സഹ ॥ 8 ॥
ഉത്പേതതുസ്തദാ പക്ഷൌ സമക്ഷം വനചാരിണാമ് ।
സ ദൃഷ്ട്വാ സ്വാം തനും പക്ഷൈരുദ്ഗതൈരരുണച്ഛദൈഃ ॥ 9 ॥
പ്രഹര്ഷമതുലം ലേഭേ വാനരാംശ്ചേദമബ്രവീത് ।
ഋഷേര്നിശാകരസ്യൈവ പ്രഭാവാദമിതാത്മനഃ ॥ 10 ॥
ആദിത്യരശ്മിനിര്ദഗ്ധൌ പക്ഷൌ മേ പുനരുപസ്ഥിതൌ ।
യൌവനേ വര്തമാനസ്യ മമാസീദ്യഃ പരാക്രമഃ ॥ 11 ॥
തമേവാദ്യാവഗച്ഛാമി ബലം പൌരുഷമേവ ച ।
സർവഥാ ക്രിയതാം യത്ന സ്സീതാമധിഗമിഷ്യഥ ॥ 12 ॥
പക്ഷലാഭോ മമായം വസ്സിദ്ധിപ്രത്യയകാരകഃ ।
ഇത്യുക്ത്വാ സ താന്ഹരീന് സർവാന്സംപാതിഃ പതഗോത്തമഃ ॥ 13 ॥
ഉത്പപാത ഗിരേശ്ശൃംഗാജ്ജിജ്ഞാസുഃ ഖഗമോ ഗതിമ് ।
തസ്യ തദ്വചനം ശ്രുത്വാ പ്രതിസംഹൃഷ്ടമാനസാഃ ॥ 14 ॥
ബഭൂവുര്ഹരിശാര്ദൂലാ വിക്രമാഭ്യുദയോന്മുഖാഃ ।
അഥ പവനസമാനവിക്രമാഃ പ്ലവഗവരാഃ പ്രതിലബ്ധപൌരുഷാഃ ।
അഭിജിദഭിമുഖാ ദിശം യയു ര്ജനകസുതാപരിമാര്ഗണോന്മുഖാഃ ॥ 15 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ത്രിഷഷ്ടിതമസ്സര്ഗഃ ॥
