śrīmadvālmīkīya rāmāyaṇē kiṣkindhākāṇḍam ।
atha triṣaṣṭitamassargaḥ ।
ētairanyaiścha bahubhirvākyairvākyaviśāradaḥ ।
māṃ praśasyābhyanujñāpya praviṣṭassa svamālayam ॥ 1 ॥
kandarāttu visarpitvā parvatasya śanaiśśanaiḥ ।
ahaṃ vindhyaṃ samāruhya bhavataḥ pratipālayē ॥ 2 ॥
adya tvētasya kālasya sāgraṃ varṣaśataṃ gatam ।
dēśakālapratīkṣō'smi hṛdi kṛtvā munērvachaḥ ॥ 3 ॥
mahāprasthānamāsādya svargatē tu niśākarē ।
māṃ nirdahati santāpō vitarkairbahubhirvṛtam ॥ 4 ॥
utthitāṃ maraṇē buddhiṃ munivākyairnivartayē ।
buddhiryā tēna mē dattā prāṇānāṃ rakṣaṇāya tu ॥ 5 ॥
sā mē'panayatē duḥkhaṃ dīptēvāgniśikhā tamaḥ ।
buddhyatā cha mayā vīryaṃ rāvaṇasya durātmanaḥ ॥ 6 ॥
putrassantarjitō vāgbhirna trātā maithilī katham ।
tasyā vilapitaṃ śrutvā tau cha sītāvinākṛtau ॥ 7 ॥
na mē daśarathasnēhātputrēṇōtpāditaṃ priyam ।
tasya tvēvaṃ bruvāṇasya sampātērvānaraissaha ॥ 8 ॥
utpētatustadā pakṣau samakṣaṃ vanachāriṇām ।
sa dṛṣṭvā svāṃ tanuṃ pakṣairudgatairaruṇachChadaiḥ ॥ 9 ॥
praharṣamatulaṃ lēbhē vānarāṃśchēdamabravīt ।
ṛṣērniśākarasyaiva prabhāvādamitātmanaḥ ॥ 10 ॥
ādityaraśminirdagdhau pakṣau mē punarupasthitau ।
yauvanē vartamānasya mamāsīdyaḥ parākramaḥ ॥ 11 ॥
tamēvādyāvagachChāmi balaṃ pauruṣamēva cha ।
sarvathā kriyatāṃ yatna ssītāmadhigamiṣyatha ॥ 12 ॥
pakṣalābhō mamāyaṃ vassiddhipratyayakārakaḥ ।
ityuktvā sa tānharīn sarvānsampātiḥ patagōttamaḥ ॥ 13 ॥
utpapāta girēśśṛṅgājjijñāsuḥ khagamō gatim ।
tasya tadvachanaṃ śrutvā pratisaṃhṛṣṭamānasāḥ ॥ 14 ॥
babhūvurhariśārdūlā vikramābhyudayōnmukhāḥ ।
atha pavanasamānavikramāḥ plavagavarāḥ pratilabdhapauruṣāḥ ।
abhijidabhimukhā diśaṃ yayu rjanakasutāparimārgaṇōnmukhāḥ ॥ 15 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē triṣaṣṭitamassargaḥ ॥
