શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ત્રિષષ્ટિતમસ્સર્ગઃ ।
એતૈરન્યૈશ્ચ બહુભિર્વાક્યૈર્વાક્યવિશારદઃ ।
માં પ્રશસ્યાભ્યનુજ્ઞાપ્ય પ્રવિષ્ટસ્સ સ્વમાલયમ્ ॥ 1 ॥
કંદરાત્તુ વિસર્પિત્વા પર્વતસ્ય શનૈશ્શનૈઃ ।
અહં વિંધ્યં સમારુહ્ય ભવતઃ પ્રતિપાલયે ॥ 2 ॥
અદ્ય ત્વેતસ્ય કાલસ્ય સાગ્રં વર્ષશતં ગતમ્ ।
દેશકાલપ્રતીક્ષોઽસ્મિ હૃદિ કૃત્વા મુનેર્વચઃ ॥ 3 ॥
મહાપ્રસ્થાનમાસાદ્ય સ્વર્ગતે તુ નિશાકરે ।
માં નિર્દહતિ સંતાપો વિતર્કૈર્બહુભિર્વૃતમ્ ॥ 4 ॥
ઉત્થિતાં મરણે બુદ્ધિં મુનિવાક્યૈર્નિવર્તયે ।
બુદ્ધિર્યા તેન મે દત્તા પ્રાણાનાં રક્ષણાય તુ ॥ 5 ॥
સા મેઽપનયતે દુઃખં દીપ્તેવાગ્નિશિખા તમઃ ।
બુદ્ધ્યતા ચ મયા વીર્યં રાવણસ્ય દુરાત્મનઃ ॥ 6 ॥
પુત્રસ્સંતર્જિતો વાગ્ભિર્ન ત્રાતા મૈથિલી કથમ્ ।
તસ્યા વિલપિતં શ્રુત્વા તૌ ચ સીતાવિનાકૃતૌ ॥ 7 ॥
ન મે દશરથસ્નેહાત્પુત્રેણોત્પાદિતં પ્રિયમ્ ।
તસ્ય ત્વેવં બ્રુવાણસ્ય સંપાતેર્વાનરૈસ્સહ ॥ 8 ॥
ઉત્પેતતુસ્તદા પક્ષૌ સમક્ષં વનચારિણામ્ ।
સ દૃષ્ટ્વા સ્વાં તનું પક્ષૈરુદ્ગતૈરરુણચ્છદૈઃ ॥ 9 ॥
પ્રહર્ષમતુલં લેભે વાનરાંશ્ચેદમબ્રવીત્ ।
ઋષેર્નિશાકરસ્યૈવ પ્રભાવાદમિતાત્મનઃ ॥ 10 ॥
આદિત્યરશ્મિનિર્દગ્ધૌ પક્ષૌ મે પુનરુપસ્થિતૌ ।
યૌવને વર્તમાનસ્ય મમાસીદ્યઃ પરાક્રમઃ ॥ 11 ॥
તમેવાદ્યાવગચ્છામિ બલં પૌરુષમેવ ચ ।
સર્વથા ક્રિયતાં યત્ન સ્સીતામધિગમિષ્યથ ॥ 12 ॥
પક્ષલાભો મમાયં વસ્સિદ્ધિપ્રત્યયકારકઃ ।
ઇત્યુક્ત્વા સ તાન્હરીન્ સર્વાન્સંપાતિઃ પતગોત્તમઃ ॥ 13 ॥
ઉત્પપાત ગિરેશ્શૃંગાજ્જિજ્ઞાસુઃ ખગમો ગતિમ્ ।
તસ્ય તદ્વચનં શ્રુત્વા પ્રતિસંહૃષ્ટમાનસાઃ ॥ 14 ॥
બભૂવુર્હરિશાર્દૂલા વિક્રમાભ્યુદયોન્મુખાઃ ।
અથ પવનસમાનવિક્રમાઃ પ્લવગવરાઃ પ્રતિલબ્ધપૌરુષાઃ ।
અભિજિદભિમુખા દિશં યયુ ર્જનકસુતાપરિમાર્ગણોન્મુખાઃ ॥ 15 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ત્રિષષ્ટિતમસ્સર્ગઃ ॥
