śrīmadvālmīkīya rāmāyaṇē sundarakāṇḍam ।
atha ēkaṣaṣṭitamassargaḥ ।
tatō jāmbavatō vākyamagṛhṇanta vanaukasaḥ ।
aṅgadapramukhā vīrā hanumāṃścha mahākapiḥ ॥ 1 ॥
prītimantastataḥ sarvē vāyuputraparasparāḥ ।
mahēndrādriṃ parityajya pupluvuḥ plavagarṣabhāḥ ॥ 2 ॥
mērumandarasaṅkāśā mattā iva mahāgajāḥ ।
Chādayanta ivākāśaṃ mahākāyā mahābalāḥ ॥ 3 ॥
sabhājyamānaṃ bhūtaistamātmavantaṃ mahābalam ।
hanūmantaṃ mahāvēgaṃ vahanta iva dṛṣṭibhiḥ ॥ 4 ॥
rāghavē chārthanirvavṛttiṃ kartuṃ cha paramaṃ yaśaḥ ।
samādhāya samṛddhārthāḥ sarvēsiddhibhirunnatā ॥ 5 ॥
priyākhyānōnmukhāḥ sarvē sarvē yuddhābhinandinaḥ ।
sarvē rāmapratīkārē niśchitārthā manassvinaḥ ॥ 6 ॥
plavamānāḥ khamāplutya tatastē kānanaukasaḥ ।
nandanōpamayāsēdurvanaṃ drumalatāyutam ॥ 7 ॥
yattanmadhuvanaṃ nāma sugrīvasyābhirakṣitam ।
adhṛṣyaṃ sarvabhūtānāṃ sarvabhūtamanōharam ॥ 8 ॥
yadrakṣati mahāvīrya ssadā dadhimukhaḥ kapiḥ ।
mātulaḥ kapimukhyasya sugrīvasya mahātmanaḥ ॥ 9 ॥
tē tadvanamupāgamya babhūvuḥ paramōtkaṭāḥ ।
vānarā vānarēndrasya manaḥ kāntatamaṃ mahat ॥ 10 ॥
tatastē vānarā hṛṣṭā dṛṣṭavā madhuvanaṃ mahat ।
kumāramabhyayāchanta madhūni madhupiṅgalāḥ ॥ 11 ॥
tataḥ kumārastān vṛddhān jāmbavatpramukhān kapīn ।
anumānya dadau tēṣāṃ visargaṃ madhubhikṣaṇē ॥ 12 ॥
tataśchānumatā ssarvē samprahṛṣṭā vanaukasaḥ ।
muditāḥ prēritāśchāpi pranṛtyantō'bhavaṃstadā ॥ 13 ॥
gāyanti kēchitpraṇamanti kēchinnṛtyanti kēchitprahasanti kēchit ।
patanti kēchidvicharanti kēchitlpavanti kēchitpralapanti kēchit ॥ 14 ॥
parasparaṃ kēchidupāśrayantē parasparaṃ kēchidupākramantē ।
parasparaṃ kēchidupabruvantē parasparaṃ kēchidupāramantē ॥ 15 ॥
drumāddrumaṃ kēchidabhidravantē kṣitau nagāgrānnipatanti kēchit ।
mahītalātkēchidudīrṇavēgā mahādrumāgrāṇyabhisampatanti ॥ 16 ॥
gāyantamanyaḥ prahasannupaiti hasantamanyaḥ prarudannupaiti ।
rudantamanyaḥ praṇudannupaiti nudantamanyaḥ praṇadannupaiti ॥ 17 ॥
samākulaṃ tatkapisainyamāsīnmadhuprasānōtkaṭasattvachēṣṭam ।
na chātra kaśchinna babhūva mattō na chātra kaśchinna babhūva tṛptaḥ ॥ 18 ॥
tatō vanaṃ tatparibhakṣyamāṇaṃ drumāṃścha vidhvaṃsitapatrapuṣpān ।
samīkṣya kōpāddhadhivakranāmā nivārayāmāsa kapiḥ kapīṃstān ॥ 19 ॥
sa taiḥ pravṛddhaiḥ paribhartsyamānō vanasya gōptā harivīravṛddhaḥ ।
chakāra bhūyō matimugratējā vanasya rakṣāṃ prati vānarēbhyaḥ ॥ 20 ॥
uvācha kāṃśchitparuṣāṇi dhṛṣṭamasaktamanyāṃścha talairjaghāna ।
samētya kaiśchitkalahaṃ chakāra tathaiva sāmnōpajagāma kāṃśchit ॥ 21 ॥
sa tairmadātsamparivārya vākyairbhalāchCha tēna prativāryamāṇaiḥ ।
pradharṣitastyaktabhayai ssamētya prakṛṣyatē chāpyanavēkṣya dōṣam ॥ 22 ॥
nakhaistudantō daśanairdaśanta stalaiścha pādaiścha samāpayantaḥ ।
madātkapiṃ taṃ kapaya ssamagrā mahāvanaṃ nirviṣayaṃ cha chakruḥ ॥ 23 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkaṣaṣṭitamassargaḥ ॥
