ശ്രീമദ്വാല്മീകീയ രാമായണേ ബാലകാംഡമ് ।
അഥ ചതുഃപംചാശസ്സര്ഗഃ ।
കാമധേനും വസിഷ്ഠോഽപി യദാ ന ത്യജ്യതേ മുനിഃ ।
തദാസ്യ ശബലാം രാമ വിശ്വാമിത്രോഽന്വകര്ഷത ॥ 1 ॥
നീയമാനാ തു ശബലാ രാമ രാജ്ഞാ മഹാത്മനാ ।
ദുഃഖിതാ ചിംതയാമാസ രുദംതീ ശോകകര്ശിതാ ॥ 2 ॥
പരിത്യക്താ വസിഷ്ഠേന കിമഹം സുമഹാത്മനാ ।
യാഹം രാജഭടൈര്ദീനാ ഹ്രിയേയ ഭൃശദുഃഖിതാ ॥ 3 ॥
കിം മയാഽപകൃതം തസ്യ മഹര്ഷേര്ഭാവിതാത്മനഃ ।
യന്മാമനാഗസം ഭക്താമിഷ്ടാം ത്യജതി ധാര്മികഃ ॥ 4 ॥
ഇതി സാ ചിംതയിത്വാ തു വിനിശ്ശ്വസ്യ പുനഃപുനഃ ।
നിര്ധൂയ താംസ്തദാ ഭൃത്യാന് ശതശശ്ശത്രുസൂദന ।
ജഗാമാനിലവേഗേന പാദമൂലം മഹാത്മനഃ ॥ 5 ॥
ശബലാ സാ രുദംതീ ച ക്രോശംതീ ചേദമബ്രവീത് ।
വസിഷ്ഠസ്യാഗ്രതസ്സ്ഥിത്വാ മേഘദുംദുഭിരാവിണീ ॥ 6 ॥
ഭഗവന് കിം പരിത്യക്താ ത്വയാഽഹം ബ്രഹ്മണസ്സുത ।
യസ്മാദ്രാജഭൃതാ മാം ഹി നയംതേ ത്വത്സകാശതഃ ॥ 7 ॥
ഏവമുക്തസ്തു ബ്രഹ്മര്ഷിരിദം വചനമബ്രവീത് ।
ശോകസംതപ്തഹൃദയാം സ്വസാരമിവ ദുഃഖിതാമ് ॥ 8 ॥
ന ത്വാം ത്യജാമി ശബലേ നാപി മേഽപകൃതം ത്വയാ ।
ഏഷ ത്വാം നയതേ രാജാ ബലോന്മത്തോ മഹാബലഃ ॥ 9 ॥
ന ഹി തുല്യം ബലം മഹ്യം രാജാ ത്വദ്യ വിശേഷതഃ ।
ബലീ രാജാ ക്ഷത്രിയശ്ച പൃഥിവ്യാഃ പതിരേവ ച ॥ 10 ॥
ഇയമക്ഷൌഹിണീ പൂര്ണാ സവാജിരഥസംകുലാ ।
ഹസ്തിധ്വജസമാകീര്ണാ തേനാസൌ ബലവത്തരഃ ॥ 11 ॥
ഏവമുക്താ വസിഷ്ഠേന പ്രത്യുവാച വിനീതവത് ।
വചനം വചനജ്ഞാ സാ ബ്രഹ്മര്ഷിമമിതപ്രഭമ് ॥ 12 ॥
ന ബലം ക്ഷത്രിയസ്യാഹുര്ബ്രാഹ്മണോ ബലവത്തരഃ ।
ബ്രഹ്മന് ബ്രഹ്മബലം ദിവ്യം ക്ഷത്രാത്തു ബലവത്തരമ് ॥ 13 ॥
അപ്രമേയബലം തുഭ്യം ന ത്വയാ ബലവത്തരഃ ।
വിശ്വാമിത്രോ മഹാവീര്യസ്തേജ സ്തവ ദുരാസദമ് ॥ 14 ॥
നിയുംക്ഷ്വ മാം മഹാഭാഗ ത്വദ്ബ്രഹ്മബലസംഭൃതാമ് ।
തസ്യ ദര്പബലം യത്തന്നാശയാമി ദുരാത്മനഃ ॥ 15 ॥
ഇത്യുക്തസ്തു തയാ രാമ വസിഷ്ഠ സ്സുമഹായശാഃ ।
സൃജസ്വേതി തദോവാച ബലം പരബലാര്ദനമ് ॥ 16 ॥
തസ്യ തദ്വചനം ശ്രുത്വാ സുരഭിസ്സാഽസൃജത്തദാ ॥ 17 ॥
തസ്യാ ഹുംഭാരവോത്സൃഷ്ടാഃ പപ്ലവാശ്ശതശോ നൃപ ।
നാശയംതി ബലം സർവം വിശ്വാമിത്രസ്യ പശ്യതഃ ॥ 18 ॥
ബലം ഭഗ്നം തതോ ദൃഷ്ട്വാ രഥേനാക്രമ്യ കൌശികഃ ।
സ രാജാ പരമക്രുദ്ധോ രോഷവിസ്ഫാരിതേക്ഷണഃ ।
പപ്ലവാന്നാശയാമാസ ശസ്ത്രൈരുച്ചാവചൈരപി ॥ 19 ॥
വിശ്വാമിത്രാര്ദിതാന് ദൃഷ്ട്വാ പപ്ലവാംഛതശസ്തദാ ।
ഭൂയ ഏവാസൃജത്കോപാച്ഛകാന് യവനമിശ്രിതാന് ॥ 20 ॥
തൈരാസീത് സംവൃതാ ഭൂമി ശ്ശകൈര്യവനമിശ്രിതൈഃ ।
പ്രഭാവദ്ഭിര്മഹാവീര്യൈര്ഹേമകിംജല്കസന്നിഭൈഃ ॥ 21 ॥
ദീര്ഘാസിപട്ടിശധരൈഃമവര്ണാംബരാവൃതൈഃ ।
നിര്ദഗ്ധം തദ്ബലം സർവം പ്രദീപ്തൈരിവ പാവകൈഃ ॥ 22 ॥
തതോഽസ്ത്രാണി മഹാതേജാ വിശ്വാമിത്രോ മുമോച ഹ ।
തൈസ്തൈര്യവനകാംഭോജാഃ പപ്ലവാശ്ചാകുലീകൃതാഃ ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ചതുഃപംചാശസ്സര്ഗഃ ॥
