શ્રીમદ્વાલ્મીકીય રામાયણે અયોધ્યાકાંડમ્ ।
અથ અષ્ટાધિકશતતમસ્સર્ગઃ ।
આશ્વાસયંતં ભરતં જાબાલિર્બ્રાહ્મણોત્તમઃ ।
ઉવાચ રામં ધર્મજ્ઞં ધર્માપેતમિદં વચઃ ॥ 1 ॥
સાધુ રાઘવ માઽભૂત્તે બુધ્દિરેવં નિરર્થિકા ।
પ્રાકૃતસ્ય નરસ્યેવ હ્યાર્યબુદ્ધેર્મનસ્વિનઃ ॥ 2 ॥
કઃ કસ્ય પુરુષો બંધુઃ કિમાપ્યં કસ્ય કેનચિત્ ।
યદેકો જાયતે જંતુરેક એવ વિનશ્યતિ ॥ 3 ॥
તસ્માન્માતા પિતા ચેતિ રામ સજ્જેત યો નરઃ ।
ઉન્મત્ત ઇવ સ જ્ઞેયો નાસ્તિ કશ્ચિદ્ધિ કસ્યચિત્ ॥ 4 ॥
યથા ગ્રામાંતરં ગચ્છન્નરઃ કશ્ચિત્ક્વચિદ્વસેત્ ।
ઉત્સૃજ્ય ચ તમાવાસં પ્રતિષ્ઠેતાપરેઽહનિ ॥ 5 ॥
એવમેવ મનુષ્યાણાં પિતા માતા ગૃહં વસુ ।
અવાસમાત્રં કાકુત્સ્થ સજ્જંતે નાત્ર સજ્જનાઃ ॥ 6 ॥
પિત્ર્યં રાજ્યં પરિત્યજ્ય સ નાર્હસિ નરોત્તમ ।
આસ્થાતું કાપથં દુઃખં વિષમં બહુકંટકમ્ ॥ 7 ॥
સમૃદ્ધાયામયોધ્યાયામાત્માનમભિષેચય ।
એકવેણીધરા હિ ત્વાં નગરી સંપ્રતીક્ષતે ॥ 8 ॥
રાજભોગાનનુભવન્મહાર્હાન્પાર્થિવાત્મજ ।
વિહર ત્વમયોધ્યાયાં યથા શક્રસ્ત્રિવિષ્ટપે ॥ 9 ॥
ન તે કશ્ચિદ્ધશરથ સ્ત્વં ચ તસ્ય ન કશ્ચન ।
અન્યો રાજા ત્વમન્ય સ્તસ્માત્કુરુ યદુચ્યતે ॥ 10 ॥
બીજમાત્રં પિતા જંતો શ્શુક્લં રુધિરમેવ ચ ।
સંયુક્તમૃતુમન્માત્રા પુરુષસ્યેહ જન્મ તત્ ॥ 11 ॥
ગત સ્સ નૃપતિસ્તત્ર ગંતવ્યં યત્ર તેન વૈ ।
પ્રવૃતતિરેષા મર્ત્યાનાં ત્વં તુ મિથ્યા વિહન્યસે ॥ 12 ॥
અર્થધર્મપરા યે યે તાંસ્તાંછોચામિ નેતરાન્ ।
તે હિ દુઃખમિહ પ્રાપ્ય વિનાશં પ્રેત્ય ભેજિરે ॥ 13 ॥
અષ્ટકા પિતૃદૈવત્યમિત્યયં પ્રસૃતો જનઃ ।
અન્નસ્યોપદ્રવં પશ્ય મૃતો હિ કિમશિષ્યતિ ॥ 14 ॥
યદિ ભુક્તમિહાન્યેન દેહમન્યસ્ય ગચ્છતિ ।
દદ્યાત્પ્રવસત શ્શ્રાદ્ધં ન તત્પથ્યશનં ભવેત્ ॥ 15 ॥
દાનસંવનના હ્યેતે ગ્રંથા મેધાવિભિઃ કૃતાઃ ।
યજસ્વ દેહિ દીક્ષસ્વ તપસ્તપ્યસ્વ સંત્યજ ॥ 16 ॥
સ નાસ્તિ પરમિત્યેવ કુરુ બુદ્ધિં મહામતે ।
પ્રત્યક્ષં યત્તદાતિષ્ઠ પરોક્ષં પૃષ્ઠતઃ કુરુ ॥ 17 ॥
સતાં બુદ્ધિં પુરસ્કૃત્ય સર્વલોકનિદર્શિનીમ્ ।
રાજ્યં ત્વં પ્રતિગૃહ્ણીષ્વ ભરતેન પ્રસાદિતઃ ॥ 18 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે અષ્ટાધિકશતતમસ્સર્ગઃ ॥
