śrīmadvālmīkīya rāmāyaṇē ayōdhyākāṇḍam ।
atha ṣaḍaśītitamassargaḥ ।
āchachakṣē'tha sadbhāvaṃ lakṣmaṇasya mahātmanaḥ ।
bharatāyāpramēyāya guhō gahanagōcharaḥ ॥ 1 ॥
taṃ jāgrataṃ guṇairyuktaṃ śarachāpāsidhāriṇam ।
bhrātṛguptyarthamatyantamahaṃ lakṣmaṇamabṛvam ॥ 2 ॥
iyaṃ tāta sukhā śayyā tvadarthamupakalpitā ।
pratyāśvasihi śēṣvāsyāṃ sukhaṃ rāghavanandana ॥ 3 ॥
uchitō'yaṃ janassarvō duḥkhānāṃ tvaṃ sukhōchitaḥ ।
dharmātmaṃstasya guptyarthaṃ jāgariṣyāmahē vayam ॥ 4 ॥
nahi rāmātpriyatarō mamāsti bhuvi kaśchana ।
mōtsukō'bhūrbravīmyētadapyasatyaṃ tavāgrataḥ ॥ 5 ॥
asya prasādādāśaṃsē lōkē'smin sumahadyaśaḥ ।
dharmāvāptiṃ cha vipulāmarthakāmau cha kēvalam ॥ 6 ॥
sō'haṃ priyasakhaṃ rāmaṃ śayānaṃ saha sītayā ।
rakṣiṣyāmi dhanuṣpāṇi ssarvai ssvairjñātibhissaha ॥ 7 ॥
na hi mē'viditaṃ kiñchidvanē'smiṃścharata ssadā ।
chaturaṅgaṃ hyapi balaṃ prasahēma vayaṃ yudhi ॥ 8 ॥
ēvamasmābhiruktēna lakṣmaṇēna mahātmanā ।
anunītā vayaṃ sarvē dharmamēvānupaśyatā ॥ 9 ॥
kathaṃ dāśarathau bhūmau śayānē saha sītayā ।
śakyā nidrā mayā labdhuṃ jīvitaṃ vā sukhāni vā ॥ 10 ॥
yō na dēvāsuraissarvaiśśakyaḥ prasahituṃ yudhi ।
taṃ paśya guha saṃviṣṭaṃ tṛṇēṣu saha sītayā ॥ 11 ॥
mahatā tapasā labdhō vividhaiścha pariśramaiḥ ।
ēkō daśarathasyaiṣa putrassadṛśalakṣaṇaḥ ॥ 12 ॥
asminpravrājitē rājā na chiraṃ vartayiṣyati ।
vidhavā mēdinī nūnaṃ kṣipramēva bhaviṣyati ॥ 13 ॥
vinadya sumahānādaṃ śramēṇōparatāḥ striyaḥ ।
nirghōṣō viratō nūnamadhya rājanivēśanē ॥ 14 ॥
kausalyā chaiva rājā cha tathaiva jananī mama ।
nāśaṃsē yadi jīvēyussarvē tē śarvarīmimām ॥ 15 ॥
jīvēdapi cha mē mātā śatrughnasyānvavēkṣayā ।
duḥkhitā yā tu kausalyā vīrasūrvinaśiṣyati ॥ 16 ॥
atikrāntamatikrāntamanavāpya manōratham ।
rājyē rāmamanikṣipya pitā mē vinaśiṣyati ॥ 17 ॥
siddhārthāḥ pitaraṃ vṛttaṃ tasminkālē hyupasthitē ।
prētakāryēṣu sarvēṣu saṃskariṣyanti bhūmipam ॥ 18 ॥
ramyachatvarasaṃsthānāṃ suvibhaktamahāpathām ।
harmyaprāsādampannāṃ sarvaratnavibhūṣitām ॥ 19 ॥
gajāśvarathasambādhāṃ tūryanādavināditām ।
sarvakalyāṇasampūrṇāṃ hṛṣṭapuṣṭajanākulām ॥ 20 ॥
ārāmōdyānasampūrṇāṃ samājōtsavaśālinīm ।
sukhitā vichariṣyanti rājadhānīṃ piturmama ॥ 21 ॥
apisatyapratijñēna sārdhaṃ kuśalinā vayam ।
nivṛttē samayē hyasmin sukhitāḥ praviśēmahi ॥ 22 ॥
paridēvayamānasya tasyaivaṃ sumahātmanaḥ ।
tiṣṭhatō rājaputrasya śarvarī sā'tyavartata ॥ 23 ॥
prabhātē vimalē sūryē kārayitvā jaṭā ubhau ।
asmin bhāgīrathītīrē sukhaṃ santāritau mayā ॥ 24 ॥
jaṭādharau tau drumachīravāsasau mahābalau kuñjarayūthapōpamau ।
varēṣuchāpāsidharau parantapau vyapēkṣamāṇau saha sītayā gatau ॥ 25 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ṣaḍaśītitamassargaḥ ॥
