ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଚତୁସ୍ତ୍ରିଂଶସ୍ସର୍ଗଃ ।
ତମପ୍ରତିହତଂ କ୍ରୁଦ୍ଧଂ ପ୍ରଵିଷ୍ଟଂ ପୁରୁଷର୍ଷଭମ୍ ।
ସୁଗ୍ରୀଵୋ ଲକ୍ଷ୍ମଣଂ ଦୃଷ୍ଟ୍ଵା ବଭୂଵ ଵ୍ୟଥିତେଂଦ୍ରିୟଃ ॥ 1 ॥
କ୍ରୁଦ୍ଧଂ ନିଶ୍ଶ୍ଵସମାନଂ ତଂ ପ୍ରଦୀପ୍ତମିଵ ତେଜସା ।
ଭ୍ରାତୁର୍ଵ୍ୟସନସଂତପ୍ତଂ ଦୃଷ୍ଟ୍ଵା ଦଶରଥାତ୍ମଜମ୍ ॥ 2 ॥
ଉତ୍ପପାତ ହରିଶ୍ରେଷ୍ଠୋ ହିତ୍ଵା ସୌଵର୍ଣମାସନମ୍ ।
ମହାନ୍ମହେଂଦ୍ରସ୍ୟ ୟଥା ସ୍ଵଲଂକୃତ ଇଵ ଧ୍ଵଜଃ ॥ 3 ॥
ଉତ୍ପତଂତମନୂତ୍ପେତୂ ରୁମାପ୍ରଭୃତୟଃ ସ୍ତ୍ରିୟଃ ।
ସୁଗ୍ରୀଵଂ ଗଗନେ ପୂର୍ଣଚଂଦ୍ରଂ ତାରାଗଣା ଇଵ ॥ 4 ॥
ସଂରକ୍ତନୟନଃ ଶ୍ରୀମାନ୍ଵିଚଚାଲ କୃତାଂଜଲିଃ ।
ବଭୂଵାଵସ୍ଥିତସ୍ତତ୍ର କଲ୍ପଵୃକ୍ଷୋ ମହାନିଵ ॥ 5 ॥
ରୁମାଦ୍ଵିତୀୟଂ ସୁଗ୍ରୀଵଂ ନାରୀମଧ୍ୟଗତଂ ସ୍ଥିତମ୍ ।
ଅବ୍ରଵୀଲ୍ଲକ୍ଷ୍ମଣଃ କ୍ରୁଦ୍ଧସ୍ସତାରଂ ଶଶିନଂ ୟଥା ॥ 6 ॥
ସତ୍ତ୍ଵାଭିଜନସଂପନ୍ନସ୍ସାନୁକ୍ରୋଶୋ ଜିତେଂଦ୍ରିୟଃ ।
କୃତଜ୍ଞସ୍ସତ୍ୟଵାଦୀ ଚ ରାଜା ଲୋକେ ମହୀୟତେ ॥ 7 ॥
ୟସ୍ତୁ ରାଜା ସ୍ଥିତୋଽଧର୍ମେ ମିତ୍ରାଣାମୁପକାରିଣାମ୍ ।
ମିଥ୍ୟା ପ୍ରତିଜ୍ଞାଂ କୁରୁତେ କୋ ନୃଶଂସତରସ୍ତତଃ ॥ 8 ॥
ଶତମଶ୍ଵାନୃତେ ହଂତି ସହସ୍ରଂ ତୁ ଗଵାନୃତେ ।
ଆତ୍ମାନଂ ସ୍ଵଜନଂ ହଂତି ପୁରୁଷଃ ପୁରୁଷାନୃତେ ॥ 9 ॥
ପୂର୍ଵଂ କୃତାର୍ଥୋ ମିତ୍ରାଣାଂ ନ ତତ୍ପ୍ରତିକରୋତି ୟଃ ।
କୃତଘ୍ନସ୍ସର୍ଵଭୂତାନାଂ ସ ଵଧ୍ୟଃ ପ୍ଲଵଗେଶ୍ଵର ॥ 10 ॥
ଗୀତୋଽୟଂ ବ୍ରହ୍ମଣା ଶ୍ଲୋକ ସ୍ସର୍ଵଲୋକନମସ୍କୃତଃ ।
ଦୃଷ୍ଟ୍ଵା କୃତଘ୍ନଂ କ୍ରୁଦ୍ଧେନ ତନ୍ନିବୋଧ ପ୍ଲଵଂଗମ ॥ 11 ॥
ବ୍ରହ୍ମଘ୍ନେ ଚ ସୁରାପେ ଚ ଚୋରେ ଭଗ୍ନଵ୍ରତେ ତଥା ।
ନିଷ୍କୃତିର୍ଵିହିତା ସଦ୍ଭିଃ କୃତଘ୍ନେ ନାସ୍ତି ନିଷ୍କୃତିଃ ॥ 12 ॥
ଅନାର୍ୟସ୍ତ୍ଵଂ କୃତଘ୍ନଶ୍ଚ ମିଥ୍ୟାଵାଦୀ ଚ ଵାନର ।
ପୂର୍ଵଂ କୃତାର୍ଥୋ ରାମସ୍ୟ ନ ତତ୍ପ୍ରତିକରୋଷି ୟତ୍ ॥ 13 ॥
ନନୁ ନାମ କୃତାର୍ଥେନ ତ୍ଵୟା ରାମସ୍ୟ ଵାନର ।
ସୀତାୟା ମାର୍ଗଣେ ୟତ୍ନଃ କର୍ତଵ୍ୟଃ କୃତମିଚ୍ଛତା ॥ 14 ॥
ସ ତ୍ଵଂ ଗ୍ରାମ୍ୟେଷୁ ଭୋଗେଷୁ ସକ୍ତୋ ମିଥ୍ୟାପ୍ରତିଶ୍ରଵଃ ।
ନ ତ୍ଵାଂ ରାମୋ ଵିଜାନୀତେ ସର୍ପଂ ମଂଡୂକରାଵିଣମ୍ ॥ 15 ॥
ମହାଭାଗେନ ରାମେଣ ପାପଃ କରୁଣଵେଦିନା ।
ହରୀଣାଂ ପ୍ରାପିତୋ ରାଜ୍ୟଂ ତ୍ଵଂ ଦୁରାତ୍ମା ମହାତ୍ମନା ॥ 16 ॥
କୃତଂ ଚେନ୍ନାଭିଜାନୀଷେ ରାମସ୍ୟାକ୍ଲିଷ୍ଟକର୍ମଣଃ ।
ସଦ୍ୟସ୍ତ୍ଵଂ ନିଶିତୈର୍ଭାଵାର୍ହତୋ ଦ୍ରକ୍ଷ୍ୟସି ଵାଲିନମ୍ ॥ 17 ॥
ନ ଚ ସଂକୁଚିତଃ ପଂଥା ୟେନ ଵାଲୀ ହତୋ ଗତଃ ।
ସମୟେ ତିଷ୍ଠ ସୁଗ୍ରୀଵ ମା ଵାଲିପଥମନ୍ଵଗାଃ ॥ 18 ॥
ନ ନୂନମିକ୍ଷ୍ଵାକୁଵରସ୍ୟ କାର୍ମୁକ ଚ୍ୟୁତାନ୍ ଶରାନ୍ପଶ୍ୟସି ଵଜ୍ର ସନ୍ନିଭାନ୍ ।
ତତ ସ୍ସୁଖଂ ନାମ ନିଷେଵସେ ସୁଖୀ ।
ନ ରାମକାର୍ୟଂ ମନସାଽପ୍ୟଵେକ୍ଷସେ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଚତୁସ୍ତ୍ରିଂଶସ୍ସର୍ଗଃ ॥
