ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ചതുസ്ത്രിംശസ്സര്ഗഃ ।
തമപ്രതിഹതം ക്രുദ്ധം പ്രവിഷ്ടം പുരുഷര്ഷഭമ് ।
സുഗ്രീവോ ലക്ഷ്മണം ദൃഷ്ട്വാ ബഭൂവ വ്യഥിതേംദ്രിയഃ ॥ 1 ॥
ക്രുദ്ധം നിശ്ശ്വസമാനം തം പ്രദീപ്തമിവ തേജസാ ।
ഭ്രാതുർവ്യസനസംതപ്തം ദൃഷ്ട്വാ ദശരഥാത്മജമ് ॥ 2 ॥
ഉത്പപാത ഹരിശ്രേഷ്ഠോ ഹിത്വാ സൌവര്ണമാസനമ് ।
മഹാന്മഹേംദ്രസ്യ യഥാ സ്വലംകൃത ഇവ ധ്വജഃ ॥ 3 ॥
ഉത്പതംതമനൂത്പേതൂ രുമാപ്രഭൃതയഃ സ്ത്രിയഃ ।
സുഗ്രീവം ഗഗനേ പൂര്ണചംദ്രം താരാഗണാ ഇവ ॥ 4 ॥
സംരക്തനയനഃ ശ്രീമാന്വിചചാല കൃതാംജലിഃ ।
ബഭൂവാവസ്ഥിതസ്തത്ര കല്പവൃക്ഷോ മഹാനിവ ॥ 5 ॥
രുമാദ്വിതീയം സുഗ്രീവം നാരീമധ്യഗതം സ്ഥിതമ് ।
അബ്രവീല്ലക്ഷ്മണഃ ക്രുദ്ധസ്സതാരം ശശിനം യഥാ ॥ 6 ॥
സത്ത്വാഭിജനസംപന്നസ്സാനുക്രോശോ ജിതേംദ്രിയഃ ।
കൃതജ്ഞസ്സത്യവാദീ ച രാജാ ലോകേ മഹീയതേ ॥ 7 ॥
യസ്തു രാജാ സ്ഥിതോഽധര്മേ മിത്രാണാമുപകാരിണാമ് ।
മിഥ്യാ പ്രതിജ്ഞാം കുരുതേ കോ നൃശംസതരസ്തതഃ ॥ 8 ॥
ശതമശ്വാനൃതേ ഹംതി സഹസ്രം തു ഗവാനൃതേ ।
ആത്മാനം സ്വജനം ഹംതി പുരുഷഃ പുരുഷാനൃതേ ॥ 9 ॥
പൂർവം കൃതാര്ഥോ മിത്രാണാം ന തത്പ്രതികരോതി യഃ ।
കൃതഘ്നസ്സർവഭൂതാനാം സ വധ്യഃ പ്ലവഗേശ്വര ॥ 10 ॥
ഗീതോഽയം ബ്രഹ്മണാ ശ്ലോക സ്സർവലോകനമസ്കൃതഃ ।
ദൃഷ്ട്വാ കൃതഘ്നം ക്രുദ്ധേന തന്നിബോധ പ്ലവംഗമ ॥ 11 ॥
ബ്രഹ്മഘ്നേ ച സുരാപേ ച ചോരേ ഭഗ്നവ്രതേ തഥാ ।
നിഷ്കൃതിർവിഹിതാ സദ്ഭിഃ കൃതഘ്നേ നാസ്തി നിഷ്കൃതിഃ ॥ 12 ॥
അനാര്യസ്ത്വം കൃതഘ്നശ്ച മിഥ്യാവാദീ ച വാനര ।
പൂർവം കൃതാര്ഥോ രാമസ്യ ന തത്പ്രതികരോഷി യത് ॥ 13 ॥
നനു നാമ കൃതാര്ഥേന ത്വയാ രാമസ്യ വാനര ।
സീതായാ മാര്ഗണേ യത്നഃ കര്തവ്യഃ കൃതമിച്ഛതാ ॥ 14 ॥
സ ത്വം ഗ്രാമ്യേഷു ഭോഗേഷു സക്തോ മിഥ്യാപ്രതിശ്രവഃ ।
ന ത്വാം രാമോ വിജാനീതേ സര്പം മംഡൂകരാവിണമ് ॥ 15 ॥
മഹാഭാഗേന രാമേണ പാപഃ കരുണവേദിനാ ।
ഹരീണാം പ്രാപിതോ രാജ്യം ത്വം ദുരാത്മാ മഹാത്മനാ ॥ 16 ॥
കൃതം ചേന്നാഭിജാനീഷേ രാമസ്യാക്ലിഷ്ടകര്മണഃ ।
സദ്യസ്ത്വം നിശിതൈര്ഭാവാര്ഹതോ ദ്രക്ഷ്യസി വാലിനമ് ॥ 17 ॥
ന ച സംകുചിതഃ പംഥാ യേന വാലീ ഹതോ ഗതഃ ।
സമയേ തിഷ്ഠ സുഗ്രീവ മാ വാലിപഥമന്വഗാഃ ॥ 18 ॥
ന നൂനമിക്ഷ്വാകുവരസ്യ കാര്മുക ച്യുതാന് ശരാന്പശ്യസി വജ്ര സന്നിഭാന് ।
തത സ്സുഖം നാമ നിഷേവസേ സുഖീ ।
ന രാമകാര്യം മനസാഽപ്യവേക്ഷസേ ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ചതുസ്ത്രിംശസ്സര്ഗഃ ॥
