ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ଏକତ୍ରିଂଶସ୍ସର୍ଗଃ ।
ଏଵଂ ବହୁଵିଧାଂ ଚିଂତାଂ ଚିଂତୟିତ୍ଵା ମହାକପିଃ ।
ସଂଶ୍ରଵେ ମଧୁରଂ ଵାକ୍ୟଂ ଵୈଦେହ୍ୟା ଵ୍ୟାଜହାର ହ ॥ 1 ॥
ରାଜା ଦଶରଥୋ ନାମ ରଥକୁଂଜରଵାଜିମାନ୍ ।
ପୁଣ୍ୟଶୀଲୋ ମହାକୀର୍ତିରିକ୍ଷ୍ଵାକୂଣାଂ ମହାୟଶାଃ ॥ 2 ॥
ରାଜର୍ଷୀଣାଂ ଗୁଣଶ୍ରେଷ୍ଠସ୍ତପସା ଚର୍ଷିଭି ସ୍ସମଃ ।
ଚକ୍ରଵର୍ତିକୁଲେ ଜାତଃ ପୁରଂଦରସମୋ ବଲେ ॥ 3 ॥
ଅହିଂସାରତିରକ୍ଷୁଦ୍ରୋ ଘୃଣୀ ସତ୍ୟପରାକ୍ରମଃ ।
ମୁଖ୍ୟଶ୍ଚେକ୍ଷ୍ଵାକୁଵଂଶସ୍ୟ ଲକ୍ଷ୍ମୀଵାନ୍ ଲକ୍ଷ୍ମିଵର୍ଧନଃ ॥ 4 ॥
ପାର୍ଥିଵଵ୍ୟଂଜନୈର୍ୟୁକ୍ତଃ ପୃଥୁଶ୍ରୀଃ ପାର୍ଥିଵର୍ଷଭଃ ।
ପୃଥିଵ୍ୟାଂ ଚତୁରଂତାୟାଂ ଵିଶ୍ରୁତସ୍ସୁଖଦସ୍ସୁଖୀ ॥ 5 ॥
ତସ୍ୟ ପୁତ୍ରଃ ପ୍ରିୟୋ ଜ୍ୟେଷ୍ଠସ୍ତାରାଧିପନିଭାନନଃ ।
ରାମୋ ନାମ ଵିଶେଷଜ୍ଞଃ ଶ୍ରେଷ୍ଠ ସ୍ସର୍ଵଧନୁଷ୍ମତାମ୍ ॥ 6 ॥
ରକ୍ଷିତା ସ୍ଵସ୍ୟ ଧର୍ମସ୍ୟ ସ୍ଵଜନସ୍ୟ ଚ ରକ୍ଷିତା ।
ରକ୍ଷିତା ଜୀଵଲୋକସ୍ୟ ଧର୍ମସ୍ୟ ଚ ପରଂତପଃ ॥ 7 ॥
ତସ୍ୟ ସତ୍ୟାଭିସଂଧସ୍ୟ ଵୃଦ୍ଧସ୍ୟ ଵଚନାତ୍ପିତୁଃ ।
ସଭାର୍ୟସ୍ସହ ଚ ଭ୍ରାତ୍ରା ଵୀରଃ ପ୍ରଵ୍ରାଜିତୋ ଵନମ୍ ॥ 8 ॥
ତେନ ତତ୍ର ମହାରଣ୍ୟେ ମୃଗୟାଂ ପରିଧାଵତା ।
ରାକ୍ଷସା ନିହତାଶ୍ଶୂରା ବହଵଃ କାମରୂପିଣଃ ॥ 9 ॥
ଜନସ୍ଥାନଵଧଂ ଶ୍ରୁତ୍ଵା ହତୌ ଚ ଖରଦୂଷଣୌ ।
ତତସ୍ତ୍ଵମର୍ଷାପହୃତା ଜାନକୀ ରାଵଣେନ ତୁ ॥ 10 ॥
ଵଂଚୟିତ୍ଵା ଵନେ ରାମଂ ମୃଗରୂପେଣ ମାୟୟା ।
ସ ମାର୍ଗମାଣସ୍ତାଂ ଦେଵୀଂ ରାମସ୍ସୀତାମନିଂଦିତାମ୍ ॥ 11 ॥
ଆସସାଦ ଵନେ ମିତ୍ରଂ ସୁଗ୍ରୀଵଂ ନାମ ଵାନରମ୍ ।
ତତ ସ୍ସ ଵାଲିନଂ ହତ୍ଵା ରାମଃ ପରପୁରଂଜୟଃ ॥ 12 ॥
ପ୍ରାୟଚ୍ଛତ୍କପିରାଜ୍ୟଂ ତତ୍ସୁଗ୍ରୀଵାୟ ମହାବଲଃ ।
ସୁଗ୍ରୀଵେଣାପି ସଂଦିଷ୍ଟା ହରୟଃ କାମରୂପିଣଃ ॥ 13 ॥
ଦିକ୍ଷୁ ସର୍ଵାସୁ ତାଂ ଦେଵୀଂ ଵିଚିନ୍ଵଂତି ସହସ୍ରଶଃ ।
ଅହଂ ସଂପାତିଵଚନାଚ୍ଛତୟୋଜନମାୟତମ୍ ॥ 14 ॥
ଅସ୍ୟା ହେତୋର୍ଵିଶାଲାକ୍ଷ୍ୟାଃ ସାଗରଂ ଵେଗଵାନ୍ପ୍ଲୁତଃ ।
ୟଥାରୂପାଂ ୟଥାଵର୍ଣାଂ ୟଥାଲକ୍ଷ୍ମୀଵତୀଂ ଚ ନିଶ୍ଚିତାମ୍ ॥ 15 ॥
ଅଶ୍ରୌଷଂ ରାଘଵସ୍ୟାହଂ ସେୟମାସାଦିତା ମୟା ।
ଵିରରାମୈଵମୁକ୍ତ୍ଵାସୌ ଵାଚଂ ଵାନରପୁଂଗଵଃ ॥ 16 ॥
ଜାନକୀ ଚାପି ତଚ୍ଛ୍ରୁତ୍ଵା ପରଂ ଵିସ୍ମୟମାଗତା ।
ତତସ୍ସା ଵକ୍ରକେଶାଂତା ସୁକେଶୀ କେଶସଂଵୃତମ୍ ॥ 17 ॥
ଉନ୍ନମ୍ୟ ଵଦନଂ ଭୀରୁଶ୍ଶିଂଶୁପାଵୃକ୍ଷମୈକ୍ଷତ ।
ନିଶମ୍ୟ ସୀତା ଵଚନଂ କପେଶ୍ଚ ଦିଶଶ୍ଚ ସର୍ଵାଃ ପ୍ରଦିଶଶ୍ଚ ଵୀକ୍ଷ୍ୟ ।
ସ୍ଵୟଂ ପ୍ରହର୍ଷଂ ପରମଂ ଜଗାମ ସର୍ଵାତ୍ମନା ରାମମନୁସ୍ମରଂତୀ ॥ 18 ॥
ସା ତିର୍ୟଗୂର୍ଧ୍ଵଂ ଚ ତଥାପ୍ୟଧସ୍ତାନ୍ନିରୀକ୍ଷମାଣା ତମଚିଂତ୍ୟବୁଦ୍ଧିମ୍ ।
ଦଦର୍ଶ ପିଂଗାଧିପତେରମାତ୍ୟଂ ଵାତାତ୍ମଜଂ ସୂର୍ୟମିଵୋଦୟସ୍ଥମ୍ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ଏକତ୍ରିଂଶସ୍ସର୍ଗଃ ॥
