śrīmadvālmīkīya rāmāyaṇē sundarakāṇḍam ।
atha ēkatriṃśassargaḥ ।
ēvaṃ bahuvidhāṃ chintāṃ chintayitvā mahākapiḥ ।
saṃśravē madhuraṃ vākyaṃ vaidēhyā vyājahāra ha ॥ 1 ॥
rājā daśarathō nāma rathakuñjaravājimān ।
puṇyaśīlō mahākīrtirikṣvākūṇāṃ mahāyaśāḥ ॥ 2 ॥
rājarṣīṇāṃ guṇaśrēṣṭhastapasā charṣibhi ssamaḥ ।
chakravartikulē jātaḥ purandarasamō balē ॥ 3 ॥
ahiṃsāratirakṣudrō ghṛṇī satyaparākramaḥ ।
mukhyaśchēkṣvākuvaṃśasya lakṣmīvān lakṣmivardhanaḥ ॥ 4 ॥
pārthivavyañjanairyuktaḥ pṛthuśrīḥ pārthivarṣabhaḥ ।
pṛthivyāṃ chaturantāyāṃ viśrutassukhadassukhī ॥ 5 ॥
tasya putraḥ priyō jyēṣṭhastārādhipanibhānanaḥ ।
rāmō nāma viśēṣajñaḥ śrēṣṭha ssarvadhanuṣmatām ॥ 6 ॥
rakṣitā svasya dharmasya svajanasya cha rakṣitā ।
rakṣitā jīvalōkasya dharmasya cha parantapaḥ ॥ 7 ॥
tasya satyābhisandhasya vṛddhasya vachanātpituḥ ।
sabhāryassaha cha bhrātrā vīraḥ pravrājitō vanam ॥ 8 ॥
tēna tatra mahāraṇyē mṛgayāṃ paridhāvatā ।
rākṣasā nihatāśśūrā bahavaḥ kāmarūpiṇaḥ ॥ 9 ॥
janasthānavadhaṃ śrutvā hatau cha kharadūṣaṇau ।
tatastvamarṣāpahṛtā jānakī rāvaṇēna tu ॥ 10 ॥
vañchayitvā vanē rāmaṃ mṛgarūpēṇa māyayā ।
sa mārgamāṇastāṃ dēvīṃ rāmassītāmaninditām ॥ 11 ॥
āsasāda vanē mitraṃ sugrīvaṃ nāma vānaram ।
tata ssa vālinaṃ hatvā rāmaḥ parapurañjayaḥ ॥ 12 ॥
prāyachChatkapirājyaṃ tatsugrīvāya mahābalaḥ ।
sugrīvēṇāpi sandiṣṭā harayaḥ kāmarūpiṇaḥ ॥ 13 ॥
dikṣu sarvāsu tāṃ dēvīṃ vichinvanti sahasraśaḥ ।
ahaṃ sampātivachanāchChatayōjanamāyatam ॥ 14 ॥
asyā hētōrviśālākṣyāḥ sāgaraṃ vēgavānplutaḥ ।
yathārūpāṃ yathāvarṇāṃ yathālakṣmīvatīṃ cha niśchitām ॥ 15 ॥
aśrauṣaṃ rāghavasyāhaṃ sēyamāsāditā mayā ।
virarāmaivamuktvāsau vāchaṃ vānarapuṅgavaḥ ॥ 16 ॥
jānakī chāpi tachChrutvā paraṃ vismayamāgatā ।
tatassā vakrakēśāntā sukēśī kēśasaṃvṛtam ॥ 17 ॥
unnamya vadanaṃ bhīruśśiṃśupāvṛkṣamaikṣata ।
niśamya sītā vachanaṃ kapēścha diśaścha sarvāḥ pradiśaścha vīkṣya ।
svayaṃ praharṣaṃ paramaṃ jagāma sarvātmanā rāmamanusmarantī ॥ 18 ॥
sā tiryagūrdhvaṃ cha tathāpyadhastānnirīkṣamāṇā tamachintyabuddhim ।
dadarśa piṅgādhipatēramātyaṃ vātātmajaṃ sūryamivōdayastham ॥ 19 ॥
ityārṣē śrīmadrāmāyaṇē vālmīkīya ādikāvyē sundarakāṇḍē ēkatriṃśassargaḥ ॥
