ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଅଷ୍ଟତ୍ରିଂଶସ୍ସର୍ଗଃ ।
ତସ୍ୟାଂ ଚୀରଂ ଵସାନାୟାଂ ନାଥଵତ୍ୟାମନାଥଵତ୍ ।
ପ୍ରଚୁକ୍ରୋଶ ଜନସ୍ସର୍ଵୋ ଧିକ୍ତ୍ଵାଂ ଦଶରଥଂ ତ୍ଵିତି ॥ 1 ॥
ତେନ ତତ୍ର ପ୍ରଣାଦେନ ଦୁଃଖିତସ୍ସ ମହୀପତିଃ ।
ଚିଚ୍ଛେଦ ଜୀଵିତେ ଶ୍ରଦ୍ଧାଂ ଧର୍ମେ ୟଶସି ଚାତ୍ମନଃ ॥ 2 ॥
ସ ନିଃଶ୍ଵସ୍ୟୋଷ୍ଣମୈକ୍ଷ୍ଵାକ ସ୍ତାଂ ଭାର୍ୟାମିଦମବ୍ରଵୀତ୍ ।
କୈକେୟି କୁଶଚୀରେଣ ନ ସୀତା ଗଂତୁମର୍ହତି ॥ 3 ॥
ସୁକୁମାରୀ ଚ ବାଲା ଚ ସତତଂ ଚ ସୁଖୋଚିତା ।
ନେୟଂ ଵନସ୍ୟ ୟୋଗ୍ୟେତି ସତ୍ୟମାହ ଗୁରୁର୍ମମ ॥ 4 ॥
ଇୟଂ ହି କସ୍ୟାପକରୋତି କିଂଚି ତ୍ତପସ୍ଵିନୀ ରାଜଵରସ୍ୟ କନ୍ୟା ।
ୟା ଚୀରମାସାଦ୍ୟ ଜନସ୍ୟ ମଧ୍ୟେ ସ୍ଥିତା ଵିସଂଜ୍ଞାଶ୍ରମଣୀଵ କାଚିତ୍ ॥ 5 ॥
ଚୀରାଣ୍ୟପାସ୍ୟାଜ୍ଜନକସ୍ୟ କନ୍ୟା ନେୟଂ ପ୍ରତିଜ୍ଞା ମମ ଦତ୍ତପୂର୍ଵା ।
ୟଥାସୁଖଂ ଗଚ୍ଛତୁ ରାଜପୁତ୍ରୀ ଵନଂ ସମଗ୍ରା ସହ ସର୍ଵରତ୍ନୈଃ ॥ 6 ॥
ଅଜୀଵନାର୍ହେଣ ମୟା ନୃଶଂସା କୃତା ପ୍ରତିଜ୍ଞା ନିୟମେନ ତାଵତ୍ ।
ତଵୟା ହି ବାଲ୍ୟାତ୍ ପ୍ରତିପନ୍ନମେତତ୍ ତନ୍ମାଂ ଦହେଦ୍ଵେଣୁମିଵାତ୍ମପୁଷ୍ପମ୍ ॥ 7 ॥
ରାମେଣ ୟଦି ତେ ପାପେ କିଂଚିତ୍କୃତମଶୋଭନମ୍ ।
ଅପକାରଃ କ ଇହ ତେ ଵୈଦେହ୍ୟା ଦର୍ଶିତୋଽଧମେ ॥ 8 ॥
ମୃଗୀଵୋତ୍ଫୁଲ୍ଲନୟନା ମୃଦୁଶୀଲା ତପସ୍ଵୀନୀ ।
ଅପକାରଂ କମିହ ତେ କରୋତି ଜନକାତ୍ମଜା ॥ 9 ॥
ନନୁ ପର୍ୟାପ୍ତ ମେତତ୍ତେ ପାପେ ରାମଵିଵାସନମ୍ ।
କିମେଭିଃ କୃପଣୈର୍ଭୂୟଃ ପାତକୈରପି ତେ କୃତୈଃ ॥ 10 ॥
ପ୍ରତିଜ୍ଞାତଂ ମୟା ତାଵତ୍ ତ୍ଵୟୋକ୍ତଂ ଦେଵି ଶୃଣ୍ଵତା ।
ରାମଂ ୟଦଭିଷେକାୟ ତ୍ଵମିହାଗତମବ୍ରଵୀଃ ॥ 11 ॥
ତତ୍ତ୍ଵେତତ୍ସମତିକ୍ରମ୍ୟ ନିରୟଂ ଗଂତୁମିଚ୍ଛସି ।
ମୈଥିଲୀମପି ୟା ହି ତ୍ଵମୀକ୍ଷସେ ଚୀରଵାସିନୀମ୍ ॥ 12 ॥
ଇତୀଵ ରାଜା ଵିଲପନ୍ମହାତ୍ମା ଶୋକସ୍ୟ ନାଂତଂ ସ ଦଦର୍ଶ କିଂଚିତ୍ ।
ଭୃଶାତୁରତ୍ଵାଚ୍ଚ ପପାତ ଭୂମୌ ତେନୈଵ ପୁତ୍ରଵ୍ୟସନେନ ମଗ୍ନଃ ॥ 13 ॥
ଏଵଂ ବ୍ରୁଵଂତଂ ପିତରଂ ରାମସ୍ସଂପ୍ରସ୍ଥିତୋ ଵନମ୍ ।
ଅଵାକ୍ଛିରସମାସୀନମିଦଂ ଵଚନମବ୍ରଵୀତ୍ ॥ 14 ॥
ୟଂ ଧାର୍ମିକ କୌଶଲ୍ୟା ମମ ମାତା ୟଶସ୍ଵିନୀ ।
ଵୃଦ୍ଧା ଚାକ୍ଷୁଦ୍ରଶୀଲା ଚ ନ ଚ ତ୍ଵାଂ ଦେଵ ଗର୍ହତେ ॥ 15 ॥
ମୟା ଵିହୀନାଂ ଵରଦ ପ୍ରପନ୍ନାଂ ଶୋକସାଗରମ୍ ।
ଅଦୃଷ୍ଟପୂର୍ଵଵ୍ୟସନାଂ ଭୂୟସ୍ସମ୍ମଂତୁମର୍ହସି ॥ 16 ॥
ପୁତ୍ରଶୋକଂ ୟଥା ନର୍ଚ୍ଛେତ୍ତ୍ଵୟା ପୂଜ୍ୟେନ ପୂଜିତା ।
ମାଂ ହି ସଂଚିଂତୟଂତୀ ସା ତ୍ଵୟି ଜୀଵେତ୍ତପସ୍ଵିନୀ ॥ 17 ॥
ଇମାଂ ମହେଂଂଦ୍ରୋପମ ଜାତଗର୍ଧିନୀଂ ତଥା ଵିଧାତୁଂ ଜନନୀଂ ମମାର୍ହସି ।
ୟଥା ଵନସ୍ଥେ ମୟି ଶୋକକର୍ଶିତା ନ ଜୀଵିତଂ ନ୍ୟସ୍ୟ ୟମକ୍ଷୟଂ ଵ୍ରଜେତ୍ ॥ 18 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଅଷ୍ଟତ୍ରିଂଶସ୍ସର୍ଗଃ ॥
