ശ്രീമദ്വാല്മീകീയ രാമായണേ അരണ്യകാംഡമ് ।
അഥ ത്രയോദശസ്സര്ഗഃ ।
രാമ പ്രീതോഽസ്മി ഭദ്രം തേ പരിതുഷ്ടോഽസ്മി ലക്ഷ്മണ ।
അഭിവാദയിതും യന്മാം പ്രാപ്തൌ സ്ഥ സ്സഹ സീതയാ ॥ 1 ॥
അധ്വശ്രമേണ വാം ഖേദോ ബാധതേ പ്രചുരശ്രമഃ ।
വ്യക്തമുത്കംഠതേ വാപി മൈഥിലീ ജനകാത്മജാ ॥ 2 ॥
ഏഷാ ഹി സുകുമാരീ ച ദുഃഖൈശ്ച ന വിമാനിതാ ।
പ്രാജ്യദോഷം വനം പ്രാപ്താ ഭര്തൃസ്നേഹപ്രചോദിതാ ॥ 3 ॥
യഥൈഷാ രമതേ രാമ ഇഹ സീതാ തഥാ കുരു ।
ദുഷ്കരം കൃതവത്യേഷാ വനേ ത്വാമനുഗച്ഛതീ ॥ 4 ॥
ഏഷാ ഹി പ്രകൃതിഃ സ്ത്രീണാമാസൃഷ്ടേ രഘുനംദന ।
സമസ്ഥമനുരജ്യാംതി വിഷമസ്ഥം ത്യജംതി ച ॥ 5 ॥
ശതഹ്രദാനാം ലോലത്വം ശസ്ത്രാണാം തീക്ഷ്ണതാം തഥാ ।
ഗരൂഡാനിലയോശ്ശൈഘ്ര്യമനുഗച്ഛംതി യോഷിതഃ ॥ 6 ॥
ഇയം തു ഭവതോ ഭാര്യാ ദോഷൈരേതൈർവിവര്ജിതാ ।
ശ്ലാഘ്യാ ച വ്യപദേശ്യാ ച യഥാ ദേവീ ഹ്യരുംധതീ ॥ 7 ॥
അലംകൃതോഽയം ദേശശ്ച യത്ര സൌമിത്രിണാ സഹ ।
വൈദേഹ്യാ ചാനയാ രാമ വത്സ്യസി ത്വമരിംദമ ॥ 8 ॥
ഏവമുക്തസ്സമുനിനാ രാഘവസ്സംയതാംജലിഃ ।
ഉവാച പ്രശ്രിതം വാക്യമൃഷിം ദീപ്തമിവാനലമ് ॥ 9 ॥
ധന്യോഽസ്മ്യനുഗൃഹീതോഽസ്മി യസ്യ മേ മുനിപുംഗവഃ ।
ഗുണൈസ്സഭ്രാതൃഭാര്യസ്യ വരദഃ പരിതുഷ്യതി ॥ 10 ॥
കിംതു വ്യാദിശ മേ ദേശം സോദകം ബഹുകാനനമ് ।
യത്രാശ്രമപദം കൃത്വാ വസേയം നിരതസ്സുഖമ് ॥ 11 ॥
തതോഽബ്രവീന്മുനിശ്രേഷ്ഠശ്ശ്രുത്വാ രാമസ്യ തദ്വചഃ ।
ധ്യാത്വാ മുഹൂര്തം ധര്മാത്മാ ധീരോ ധീരതരം വചഃ ॥ 12 ॥
ഇതോ ദ്വിയോജനേ താത ബഹുമൂലഫലോദകഃ ।
ദേശോ ബഹുമൃഗശ്ശ്രീമാന്പംചവട്യഭിവിശ്രുതഃ ॥ 13 ॥
തത്ര ഗത്വാഽഽശ്രമപദം കൃത്വാ സൌമിത്രിണാ സഹ ।
രമസ്വ ത്വം പിതുർവാക്യം തഥോക്തമനുപാലയന് ॥ 14 ॥
കാലോഽയം ഗതഭൂയിഷ്ഠോ യഃ കാല സ്തവ രാഘവ ।
സമയോ യോ നരേംദ്രേണ കൃതോ ദശരഥേന തേ ॥ 15 ॥
തീര്ണപ്രതിജ്ഞഃ കാകുത്സ്ഥ സുഖം രാജ്യേ നിവത്സ്യസി ।
ധന്യസ്തേ ജനകോ രാമ സ രാജാ രഘുനംദന ॥ 16 ॥
യസ്ത്വയാ ജ്യേഷ്ഠപുത്രേണ യയാതിരിവ താരിതഃ ।
വിദിതോ ഹ്യേഷ വൃത്താംതോ മമ സർവസ്തവാനഘ ॥ 17 ॥
തപസശ്ച പ്രഭാവേണ സ്നേഹാദ്ദശരഥസ്യ ച ।
ഹൃദയസ്ഥശ്ച തേ ഛംദോ വിജ്ഞാതസ്തപസാ മയാ ॥ 18 ॥
ഇഹാവാസം പ്രതിജ്ഞായ മയാ സഹ തപോവനേ ।
അതശ്ച ത്വാമഹം ബ്രൂമി ഗച്ഛ പംചവടീമിതി ॥ 19 ॥
സ ഹി രമ്യോ വനോദ്ദേശോ മൈഥിലീ തത്ര രംസ്യതേ ।
സ ദേശശ്ശ്ലാഘനീയശ്ച നാതിദൂരേ ച രാഘവ ॥ 20 ॥
ഗോദാവര്യാസ്സമീപേ ച മൈഥിലീ തത്ര രംസ്യതേ ।
പ്രാജ്യമൂലഫലശ്ചൈവ നാനാദ്വിജഗണായുതഃ ॥ 21 ॥
വിവിക്തശ്ച മഹാബാഹോ പുണ്യോരമ്യസ്തഥൈവ ച ।
ഭവാനപി സദാരശ്ച ശക്തശ്ച പരിരക്ഷണേ ।
അപി ചാത്ര വസന്രാമ താപസാന്പാലയിഷ്യസി ॥ 22 ॥
ഏതദാലക്ഷ്യതേ വീര മധൂകാനാം മഹദ്വനമ് ।
ഉത്തരേണാസ്യ ഗംതവ്യം ന്യഗ്രോധമഭിഗച്ഛതാ ॥ 23 ॥
തതഃ സ്ഥലമുപാരുഹ്യ പർവതസ്യാവിദൂരതഃ ।
ഖ്യാതഃ പംചവടീത്യേവ നിത്യപുഷ്പിതകാനനഃ ॥ 24 ॥
അഗസ്ത്യേനൈവമുക്തസ്തു രാമസ്സൌമിത്രിണാ സഹ ।
സത്കൃത്യാമംത്രയാമാസ തമൃഷിം സത്യവാദിനമ് ॥ 25 ॥
തൌ തു തേനാഭ്യനുജ്ഞാതൌ കൃതപാദാഭിവംദനൌ ।
തദാശ്രമാത്പംചവടീം ജഗ്മതുസ്സീതയാ സഹ ॥ 26 ॥
ഗൃഹീതചാപൌ തു നരാധിപാത്മജൌ വിഷക്തതൂണൌ സമരേഷ്വകാതരൌ ।
യഥോപദിഷ്ടേന പഥാ മഹര്ഷിണാ പ്രജഗ്മതുഃ പംചവടീം സമാഹിതൌ ॥ 27 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാംഡേ ത്രയോദശസ്സര്ഗഃ ॥
