ଶ୍ରୀମଦ୍ଵାଲ୍ମୀକୀୟ ରାମାୟଣେ ଅରଣ୍ୟକାଂଡମ୍ ।
ଅଥ ତ୍ରୟୋଦଶସ୍ସର୍ଗଃ ।
ରାମ ପ୍ରୀତୋଽସ୍ମି ଭଦ୍ରଂ ତେ ପରିତୁଷ୍ଟୋଽସ୍ମି ଲକ୍ଷ୍ମଣ ।
ଅଭିଵାଦୟିତୁଂ ୟନ୍ମାଂ ପ୍ରାପ୍ତୌ ସ୍ଥ ସ୍ସହ ସୀତୟା ॥ 1 ॥
ଅଧ୍ଵଶ୍ରମେଣ ଵାଂ ଖେଦୋ ବାଧତେ ପ୍ରଚୁରଶ୍ରମଃ ।
ଵ୍ୟକ୍ତମୁତ୍କଂଠତେ ଵାପି ମୈଥିଲୀ ଜନକାତ୍ମଜା ॥ 2 ॥
ଏଷା ହି ସୁକୁମାରୀ ଚ ଦୁଃଖୈଶ୍ଚ ନ ଵିମାନିତା ।
ପ୍ରାଜ୍ୟଦୋଷଂ ଵନଂ ପ୍ରାପ୍ତା ଭର୍ତୃସ୍ନେହପ୍ରଚୋଦିତା ॥ 3 ॥
ୟଥୈଷା ରମତେ ରାମ ଇହ ସୀତା ତଥା କୁରୁ ।
ଦୁଷ୍କରଂ କୃତଵତ୍ୟେଷା ଵନେ ତ୍ଵାମନୁଗଚ୍ଛତୀ ॥ 4 ॥
ଏଷା ହି ପ୍ରକୃତିଃ ସ୍ତ୍ରୀଣାମାସୃଷ୍ଟେ ରଘୁନଂଦନ ।
ସମସ୍ଥମନୁରଜ୍ୟାଂତି ଵିଷମସ୍ଥଂ ତ୍ୟଜଂତି ଚ ॥ 5 ॥
ଶତହ୍ରଦାନାଂ ଲୋଲତ୍ଵଂ ଶସ୍ତ୍ରାଣାଂ ତୀକ୍ଷ୍ଣତାଂ ତଥା ।
ଗରୂଡାନିଲୟୋଶ୍ଶୈଘ୍ର୍ୟମନୁଗଚ୍ଛଂତି ୟୋଷିତଃ ॥ 6 ॥
ଇୟଂ ତୁ ଭଵତୋ ଭାର୍ୟା ଦୋଷୈରେତୈର୍ଵିଵର୍ଜିତା ।
ଶ୍ଲାଘ୍ୟା ଚ ଵ୍ୟପଦେଶ୍ୟା ଚ ୟଥା ଦେଵୀ ହ୍ୟରୁଂଧତୀ ॥ 7 ॥
ଅଲଂକୃତୋଽୟଂ ଦେଶଶ୍ଚ ୟତ୍ର ସୌମିତ୍ରିଣା ସହ ।
ଵୈଦେହ୍ୟା ଚାନୟା ରାମ ଵତ୍ସ୍ୟସି ତ୍ଵମରିଂଦମ ॥ 8 ॥
ଏଵମୁକ୍ତସ୍ସମୁନିନା ରାଘଵସ୍ସଂୟତାଂଜଲିଃ ।
ଉଵାଚ ପ୍ରଶ୍ରିତଂ ଵାକ୍ୟମୃଷିଂ ଦୀପ୍ତମିଵାନଲମ୍ ॥ 9 ॥
ଧନ୍ୟୋଽସ୍ମ୍ୟନୁଗୃହୀତୋଽସ୍ମି ୟସ୍ୟ ମେ ମୁନିପୁଂଗଵଃ ।
ଗୁଣୈସ୍ସଭ୍ରାତୃଭାର୍ୟସ୍ୟ ଵରଦଃ ପରିତୁଷ୍ୟତି ॥ 10 ॥
କିଂତୁ ଵ୍ୟାଦିଶ ମେ ଦେଶଂ ସୋଦକଂ ବହୁକାନନମ୍ ।
ୟତ୍ରାଶ୍ରମପଦଂ କୃତ୍ଵା ଵସେୟଂ ନିରତସ୍ସୁଖମ୍ ॥ 11 ॥
ତତୋଽବ୍ରଵୀନ୍ମୁନିଶ୍ରେଷ୍ଠଶ୍ଶ୍ରୁତ୍ଵା ରାମସ୍ୟ ତଦ୍ଵଚଃ ।
ଧ୍ୟାତ୍ଵା ମୁହୂର୍ତଂ ଧର୍ମାତ୍ମା ଧୀରୋ ଧୀରତରଂ ଵଚଃ ॥ 12 ॥
ଇତୋ ଦ୍ଵିୟୋଜନେ ତାତ ବହୁମୂଲଫଲୋଦକଃ ।
ଦେଶୋ ବହୁମୃଗଶ୍ଶ୍ରୀମାନ୍ପଂଚଵଟ୍ୟଭିଵିଶ୍ରୁତଃ ॥ 13 ॥
ତତ୍ର ଗତ୍ଵାଽଽଶ୍ରମପଦଂ କୃତ୍ଵା ସୌମିତ୍ରିଣା ସହ ।
ରମସ୍ଵ ତ୍ଵଂ ପିତୁର୍ଵାକ୍ୟଂ ତଥୋକ୍ତମନୁପାଲୟନ୍ ॥ 14 ॥
କାଲୋଽୟଂ ଗତଭୂୟିଷ୍ଠୋ ୟଃ କାଲ ସ୍ତଵ ରାଘଵ ।
ସମୟୋ ୟୋ ନରେଂଦ୍ରେଣ କୃତୋ ଦଶରଥେନ ତେ ॥ 15 ॥
ତୀର୍ଣପ୍ରତିଜ୍ଞଃ କାକୁତ୍ସ୍ଥ ସୁଖଂ ରାଜ୍ୟେ ନିଵତ୍ସ୍ୟସି ।
ଧନ୍ୟସ୍ତେ ଜନକୋ ରାମ ସ ରାଜା ରଘୁନଂଦନ ॥ 16 ॥
ୟସ୍ତ୍ଵୟା ଜ୍ୟେଷ୍ଠପୁତ୍ରେଣ ୟୟାତିରିଵ ତାରିତଃ ।
ଵିଦିତୋ ହ୍ୟେଷ ଵୃତ୍ତାଂତୋ ମମ ସର୍ଵସ୍ତଵାନଘ ॥ 17 ॥
ତପସଶ୍ଚ ପ୍ରଭାଵେଣ ସ୍ନେହାଦ୍ଦଶରଥସ୍ୟ ଚ ।
ହୃଦୟସ୍ଥଶ୍ଚ ତେ ଛଂଦୋ ଵିଜ୍ଞାତସ୍ତପସା ମୟା ॥ 18 ॥
ଇହାଵାସଂ ପ୍ରତିଜ୍ଞାୟ ମୟା ସହ ତପୋଵନେ ।
ଅତଶ୍ଚ ତ୍ଵାମହଂ ବ୍ରୂମି ଗଚ୍ଛ ପଂଚଵଟୀମିତି ॥ 19 ॥
ସ ହି ରମ୍ୟୋ ଵନୋଦ୍ଦେଶୋ ମୈଥିଲୀ ତତ୍ର ରଂସ୍ୟତେ ।
ସ ଦେଶଶ୍ଶ୍ଲାଘନୀୟଶ୍ଚ ନାତିଦୂରେ ଚ ରାଘଵ ॥ 20 ॥
ଗୋଦାଵର୍ୟାସ୍ସମୀପେ ଚ ମୈଥିଲୀ ତତ୍ର ରଂସ୍ୟତେ ।
ପ୍ରାଜ୍ୟମୂଲଫଲଶ୍ଚୈଵ ନାନାଦ୍ଵିଜଗଣାୟୁତଃ ॥ 21 ॥
ଵିଵିକ୍ତଶ୍ଚ ମହାବାହୋ ପୁଣ୍ୟୋରମ୍ୟସ୍ତଥୈଵ ଚ ।
ଭଵାନପି ସଦାରଶ୍ଚ ଶକ୍ତଶ୍ଚ ପରିରକ୍ଷଣେ ।
ଅପି ଚାତ୍ର ଵସନ୍ରାମ ତାପସାନ୍ପାଲୟିଷ୍ୟସି ॥ 22 ॥
ଏତଦାଲକ୍ଷ୍ୟତେ ଵୀର ମଧୂକାନାଂ ମହଦ୍ଵନମ୍ ।
ଉତ୍ତରେଣାସ୍ୟ ଗଂତଵ୍ୟଂ ନ୍ୟଗ୍ରୋଧମଭିଗଚ୍ଛତା ॥ 23 ॥
ତତଃ ସ୍ଥଲମୁପାରୁହ୍ୟ ପର୍ଵତସ୍ୟାଵିଦୂରତଃ ।
ଖ୍ୟାତଃ ପଂଚଵଟୀତ୍ୟେଵ ନିତ୍ୟପୁଷ୍ପିତକାନନଃ ॥ 24 ॥
ଅଗସ୍ତ୍ୟେନୈଵମୁକ୍ତସ୍ତୁ ରାମସ୍ସୌମିତ୍ରିଣା ସହ ।
ସତ୍କୃତ୍ୟାମଂତ୍ରୟାମାସ ତମୃଷିଂ ସତ୍ୟଵାଦିନମ୍ ॥ 25 ॥
ତୌ ତୁ ତେନାଭ୍ୟନୁଜ୍ଞାତୌ କୃତପାଦାଭିଵଂଦନୌ ।
ତଦାଶ୍ରମାତ୍ପଂଚଵଟୀଂ ଜଗ୍ମତୁସ୍ସୀତୟା ସହ ॥ 26 ॥
ଗୃହୀତଚାପୌ ତୁ ନରାଧିପାତ୍ମଜୌ ଵିଷକ୍ତତୂଣୌ ସମରେଷ୍ଵକାତରୌ ।
ୟଥୋପଦିଷ୍ଟେନ ପଥା ମହର୍ଷିଣା ପ୍ରଜଗ୍ମତୁଃ ପଂଚଵଟୀଂ ସମାହିତୌ ॥ 27 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅରଣ୍ୟକାଂଡେ ତ୍ରୟୋଦଶସ୍ସର୍ଗଃ ॥
