śrīmadvālmīkīya rāmāyaṇē araṇyakāṇḍam ।
atha trayōdaśassargaḥ ।
rāma prītō'smi bhadraṃ tē parituṣṭō'smi lakṣmaṇa ।
abhivādayituṃ yanmāṃ prāptau stha ssaha sītayā ॥ 1 ॥
adhvaśramēṇa vāṃ khēdō bādhatē prachuraśramaḥ ।
vyaktamutkaṇṭhatē vāpi maithilī janakātmajā ॥ 2 ॥
ēṣā hi sukumārī cha duḥkhaiścha na vimānitā ।
prājyadōṣaṃ vanaṃ prāptā bhartṛsnēhaprachōditā ॥ 3 ॥
yathaiṣā ramatē rāma iha sītā tathā kuru ।
duṣkaraṃ kṛtavatyēṣā vanē tvāmanugachChatī ॥ 4 ॥
ēṣā hi prakṛtiḥ strīṇāmāsṛṣṭē raghunandana ।
samasthamanurajyānti viṣamasthaṃ tyajanti cha ॥ 5 ॥
śatahradānāṃ lōlatvaṃ śastrāṇāṃ tīkṣṇatāṃ tathā ।
garūḍānilayōśśaighryamanugachChanti yōṣitaḥ ॥ 6 ॥
iyaṃ tu bhavatō bhāryā dōṣairētairvivarjitā ।
ślāghyā cha vyapadēśyā cha yathā dēvī hyarundhatī ॥ 7 ॥
alaṅkṛtō'yaṃ dēśaścha yatra saumitriṇā saha ।
vaidēhyā chānayā rāma vatsyasi tvamarindama ॥ 8 ॥
ēvamuktassamuninā rāghavassaṃyatāñjaliḥ ।
uvācha praśritaṃ vākyamṛṣiṃ dīptamivānalam ॥ 9 ॥
dhanyō'smyanugṛhītō'smi yasya mē munipuṅgavaḥ ।
guṇaissabhrātṛbhāryasya varadaḥ parituṣyati ॥ 10 ॥
kintu vyādiśa mē dēśaṃ sōdakaṃ bahukānanam ।
yatrāśramapadaṃ kṛtvā vasēyaṃ niratassukham ॥ 11 ॥
tatō'bravīnmuniśrēṣṭhaśśrutvā rāmasya tadvachaḥ ।
dhyātvā muhūrtaṃ dharmātmā dhīrō dhīrataraṃ vachaḥ ॥ 12 ॥
itō dviyōjanē tāta bahumūlaphalōdakaḥ ।
dēśō bahumṛgaśśrīmānpañchavaṭyabhiviśrutaḥ ॥ 13 ॥
tatra gatvā''śramapadaṃ kṛtvā saumitriṇā saha ।
ramasva tvaṃ piturvākyaṃ tathōktamanupālayan ॥ 14 ॥
kālō'yaṃ gatabhūyiṣṭhō yaḥ kāla stava rāghava ।
samayō yō narēndrēṇa kṛtō daśarathēna tē ॥ 15 ॥
tīrṇapratijñaḥ kākutstha sukhaṃ rājyē nivatsyasi ।
dhanyastē janakō rāma sa rājā raghunandana ॥ 16 ॥
yastvayā jyēṣṭhaputrēṇa yayātiriva tāritaḥ ।
viditō hyēṣa vṛttāntō mama sarvastavānagha ॥ 17 ॥
tapasaścha prabhāvēṇa snēhāddaśarathasya cha ।
hṛdayasthaścha tē Chandō vijñātastapasā mayā ॥ 18 ॥
ihāvāsaṃ pratijñāya mayā saha tapōvanē ।
ataścha tvāmahaṃ brūmi gachCha pañchavaṭīmiti ॥ 19 ॥
sa hi ramyō vanōddēśō maithilī tatra raṃsyatē ।
sa dēśaśślāghanīyaścha nātidūrē cha rāghava ॥ 20 ॥
gōdāvaryāssamīpē cha maithilī tatra raṃsyatē ।
prājyamūlaphalaśchaiva nānādvijagaṇāyutaḥ ॥ 21 ॥
viviktaścha mahābāhō puṇyōramyastathaiva cha ।
bhavānapi sadāraścha śaktaścha parirakṣaṇē ।
api chātra vasanrāma tāpasānpālayiṣyasi ॥ 22 ॥
ētadālakṣyatē vīra madhūkānāṃ mahadvanam ।
uttarēṇāsya gantavyaṃ nyagrōdhamabhigachChatā ॥ 23 ॥
tataḥ sthalamupāruhya parvatasyāvidūrataḥ ।
khyātaḥ pañchavaṭītyēva nityapuṣpitakānanaḥ ॥ 24 ॥
agastyēnaivamuktastu rāmassaumitriṇā saha ।
satkṛtyāmantrayāmāsa tamṛṣiṃ satyavādinam ॥ 25 ॥
tau tu tēnābhyanujñātau kṛtapādābhivandanau ।
tadāśramātpañchavaṭīṃ jagmatussītayā saha ॥ 26 ॥
gṛhītachāpau tu narādhipātmajau viṣaktatūṇau samarēṣvakātarau ।
yathōpadiṣṭēna pathā maharṣiṇā prajagmatuḥ pañchavaṭīṃ samāhitau ॥ 27 ॥
ityārṣē śrīmadrāmāyaṇē vālmīkīya ādikāvyē araṇyakāṇḍē trayōdaśassargaḥ ॥
