ശ്രീമദ്വാല്മീകീയ രാമായണേ ബാലകാംഡമ് ।
അഥ ഷോഡശസ്സര്ഗഃ ।
തതോ നാരായണോ ദേവോ നിയുക്തസ്സുരസത്തമൈഃ ।
ജാനന്നപി സുരാനേവം ശ്ലക്ഷ്ണം വചനമബ്രവീത് ॥ 1 ॥
ഉപായഃ കോ വധേ തസ്യ രാവണസ്യ ദുരാത്മനഃ ।
യമഹം തം സമാസ്ഥായ നിഹന്യാമൃഷികംടകമ് ॥ 2 ॥
ഏവമുക്താസ്സുരാസ്സർവേ പ്രത്യൂചുർവിഷ്ണുമവ്യയമ് ।
മാനുഷീം തനുമാസ്ഥായ രാവണം ജഹി സംയുഗേ ॥ 3 ॥
സ ഹി തേപേ തപസ്തീവ്രം ദീര്ഘകാലമരിംദമ ।
യേന തുഷ്ടോഽഭവദ്ബ്രഹ്മാ ലോകകൃല്ലോകപൂർവജഃ ॥ 4 ॥
സംതുഷ്ടഃ പ്രദദൌ തസ്മൈ രാക്ഷസായ വരം പ്രഭുഃ ।
04 നാനാവിധേഭ്യോ ഭൂതേഭ്യോ ഭയം നാന്യത്ര മാനുഷാത് ॥ 5 ॥
അവജ്ഞാതാഃ പുരാ തേന വരദാനേ ഹി മാനവാഃ ।
105 ഏവം പിതാമഹാത്തസ്മാദ്വരം പ്രാപ്യ സ ദര്പിതഃ ॥ 6 ॥
ഉത്സാദയതി ലോകാംത്രീന് സ്ത്രിയശ്ചാപ്യപകര്ഷതി ।
തസ്മാത്തസ്യ വധോ ദൃഷ്ടോ മാനുഷേഭ്യഃ പരംതപ ॥ 7 ॥
ഇത്യേതദ്വചനം ശ്രുത്വാ സുരാണാം വിഷ്ണുരാത്മവാന് ।
പിതരം രോചയാമാസ തദാ ദശരഥം നൃപമ് ॥ 8 ॥
സ ചാപ്യപുത്രോ നൃപതിസ്തസ്മിന്കാലേ മഹാദ്യുതിഃ ।
അയജത്പുത്രിയാമിഷ്ടിം പുത്രേപ്സുരരിസൂദനഃ ॥ 9 ॥
സ കൃത്വാ നിശ്ചയം വിഷ്ണുരാമംത്ര്യ ച പിതാമഹമ് ।
അംതര്ധാനം ഗതോ ദേവൈഃ പൂജ്യമാനോ മഹര്ഷിഭിഃ ॥ 10 ॥
തോ വൈ യജമാനസ്യ പാവകാദതുലപ്രഭമ് ।
പ്രാദുര്ഭൂതം മഹദ്ഭൂതം മഹാവീര്യം മഹാബലമ് ॥ 11 ॥
കൃഷ്ണം രക്താംബരധരം രക്താസ്യം ദുംദുഭിസ്വനമ് ।
സ്നിഗ്ധഹര്യക്ഷതനുജശ്മശ്രുപ്രവരമൂര്ധജമ് ॥ 12 ॥
ശുഭലക്ഷണസംപന്നം ദിവ്യാഭരണഭൂഷിതമ് ।
ശൈലശൃംഗസമുത്സേഥം ദൃപ്തശാര്ദൂലവിക്രമമ് ॥ 13 ॥
ദിവാകരസമാകാരം ദീപ്താനലശിഖോപമമ് ।
തപ്തജാംബൂനദമയീം രാജതാംതപരിച്ഛദാമ് ॥ 14 ॥
ദിവ്യപായസസംപൂര്ണാം പാത്രീം പത്നീമിവ പ്രിയാമ് ।
പ്രഗൃഹ്യ വിപുലാം ദോര്ഭ്യാം സ്വയം മായാമയീമിവ ॥ 15 ॥
സമവേക്ഷ്യാബ്രവീദ്വാക്യമിദം ദശരഥം നൃപമ് ।
പ്രാജാപത്യം നരം വിദ്ധി മാമിഹാഭ്യാഗതം നൃപ ॥ 16 ॥
തതഃ പരം തദാ രാജാ പ്രത്യുവാച കൃതാംജലിഃ ।
ഭഗവന് സ്വാഗതം തേഽസ്തു കിമഹം കരവാണി തേ ॥ 17 ॥
അഥോ പുനരിദം വാക്യം പ്രാജാപത്യോ നരോഽബ്രവീത് ।
രാജന്നര്ചയതാ ദേവാനദ്യ പ്രാപ്തമിദം ത്വയാ ॥ 18 ॥
ഇദം തു നൃപശാര്ദൂല പായസം ദേവനിര്മിതമ് ।
പ്രജാകരം ഗൃഹാണ ത്വം ധന്യമാരോഗ്യവര്ധനമ് ॥ 19 ॥
ഭാര്യാണാമനുരൂപാണാമശ്നീതേതി പ്രയച്ഛ വൈ ।
താസു ത്വം പ്രാപ്സ്യസേ പുത്രാന്യദര്ഥം യജസേ നൃപ ॥ 20 ॥
തഥേതി നൃപതിഃ പ്രീതശ്ശിരസാ പ്രതിഗൃഹ്യതാമ് ।
പാത്രീം ദേവാന്നസംപൂര്ണാം ദേവദത്താം ഹിരണ്മയീമ് ॥ 21 ॥
അഭിവാദ്യ ച തദ്ഭൂതമദ്ഭുതം പ്രിയദര്ശനമ് ।
മുദാ പരമയാ യുക്തശ്ചകാരാഭിപ്രദക്ഷിണമ് ॥ 22 ॥
തതോ ദശരഥഃ പ്രാപ്യ പായസം ദേവനിര്മിതമ് ।
ബഭൂവ പരമപ്രീതഃ പ്രാപ്യ വിത്തമിവാധനഃ ॥ 23 ॥
തതസ്തദദ്ഭുതപ്രഖ്യം ഭൂതം പരമഭാസ്വരമ് ।
സംവര്തയിത്വാ തത്കര്മ തത്രൈവാംതരധീയത ॥ 24 ॥
ഹര്ഷരശ്മിഭിരുദ്യോതം തസ്യാംതഃപുരമാബഭൌ ।
ശാരദസ്യാഭിരാമസ്യ ചംദ്രസ്യേവ നഭോംഽശുഭിഃ ॥ 25 ॥
സോഽംതഃപുരം പ്രവിശ്യൈവ കൌസല്യാമിദമബ്രവീത് ।
പായസം പ്രതിഗൃഹ്ണീഷ്വ പുത്രീയം ത്വിദമാത്മനഃ ॥ 26 ॥
കൌസല്യായൈ നരപതിഃ പായസാര്ധം ദദൌ തദാ ।
അര്ധാദര്ധം ദദൌ ചാപി സുമിത്രായൈ നരാധിപഃ ॥ 27 ॥
കൈകേയ്യൈ ചാവശിഷ്ടാര്ധം ദദൌ പുത്രാര്ഥകാരണാത് ।
പ്രദദൌ ചാവശിഷ്ടാര്ധം പായസസ്യാമൃതോപമമ് ॥ 28 ॥
അനുചിംത്യ സുമിത്രായൈ പുനരേവ മഹീപതിഃ ।
ഏവം താസാം ദദൌ രാജാ ഭാര്യാണാം പായസം പൃഥക് ॥ 29 ॥
താസ്ത്വേതത്പായസം പ്രാപ്യ നരേംദ്രസ്യോത്തമാസ്സ്ത്രയഃ ।
സമ്മാനം മേനിരേ സർവാംഃ പ്രഹര്ഷോദിതചേതസഃ ॥ 30 ॥
തതസ്തു താഃ പ്രാശ്യ തദുത്തമാസ്ത്രിയോ മഹീപതേരുത്തമപായസം പൃഥക് ।
ഹുതാശനാദിത്യസമാനതേജസോ ഽചിരേണ ഗര്ഭാന്പ്രതിപേദിരേ തദാ ॥ 31 ॥
തതസ്തു രാജാ പ്രസമീക്ഷ്യ താഃ സ്ത്രിയഃ പ്രരൂഢഗര്ഭാഃ പ്രതിലബ്ധമാനസഃ ।
ബഭൂവ ഹൃഷ്ടസ്ത്രിദിവേ യഥാ ഹരിഃ സുരേംദ്രസിദ്ധര്ഷിഗണാഭിപൂജിതഃ ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ഷോഡശസ്സര്ഗഃ ॥
