ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകാശീതിതമസ്സര്ഗഃ ।
തതോ നാംദീമുഖീം രാത്രിം ഭരതം സൂതമാഗധാഃ ।
തുഷ്ടുവുർവാഗ്വിശേഷജ്ഞാസ്സ്തവൈര്മംഗലസംഹിതൈഃ ॥ 1 ॥
സുവര്ണകോണാഭിഹതഃ പ്രാണദദ്യാമദുംദുഭിഃ ।
ദധ്മുശ്ശംഖാംശ്ച ശതശോ നാദാംശ്ചോച്ചാവചസ്വരാന് ॥ 2 ॥
സ തൂര്യഘോഷ സ്സുമഹാംദിവമാപൂരയന്നിവ ।
ഭരതം ശോകസംതപ്തം ഭൂയശ്ശോകൈരരംധ്രയത് ॥ 3 ॥
തതഃ പ്രബുദ്ധോ ഭരതസ്തം ഘോഷം സന്നിവര്ത്യ ച ।
നാഹം രാജേതി ചാപ്യുക്ത്വാ ശത്രുഘ്നമിദമബ്രവീത് ॥ 4 ॥
പശ്യ ശത്രുഘ്ന കൈകേയ്യാ ലോകസ്യാപകൃതം മഹത് ।
വിസൃജ്യ മയി ദുഃഖാനി രാജാ ദശരഥോ ഗതഃ ॥ 5 ॥
തസ്യൈഷാ ധര്മരാജസ്യ ധര്മമൂലാ മഹാത്മനഃ ।
പരിഭ്രമതി രാജ്യ ശ്രീര്നൌരിവാകര്ണികാ ജലേ ॥ 6 ॥
യോ ഹി ന സ്സുമഹാന്നാഥസ്സോഽപി പ്രവ്രാജിതോ വനമ് ।
അനയാ ധര്മമുത്സൃജ്യ മാത്രാ മേ രാഘവസ്സ്വയമ് ॥ 7 ॥
ഇത്യേവം ഭരതം പ്രേക്ഷ്യ വിലപംതം വിചേതനമ് ।
കൃപണം രുരുദുസ്സർവാസ്സസ്വരം യോഷിത സ്തദാ ॥ 8 ॥
തഥാ തസ്മിന്വിലപതി വസിഷ്ഠോ രാജധര്മവിത് ।
സഭാമിക്ഷ്വാകുനാഥസ്യ പ്രവിവേശ മഹായശാഃ ॥ 9 ॥
ശാതകുംഭമയീം രമ്യാം മണിരത്നസമാകുലാമ് ।
സുധര്മാമിവ ധര്മാത്മാ സഗണഃ പ്രത്യപദ്യത ॥ 10 ॥
സ കാംചനമയം പീഠം സുഖാസ്തരണസംവൃതമ് ।
അധ്യാസ്ത സർവവേദജ്ഞോ ദൂതാനനുശശാസ ച ॥ 11 ॥
ബ്രാഹ്മണാന് ക്ഷത്രിയാന്വൈശ്യനമാത്യാന്ഗണവല്ലഭാന് ।
ക്ഷിപ്രമാനയതാഽവ്യഗ്രാഃ കൃത്യമാത്യയികം ഹി നഃ ॥ 12 ॥
സരാജഭൃത്യം ശത്രുഘ്നം ഭരതം ച യശസ്വിനമ് ।
യുധാജിതം സുമംത്രം ച യേ ച തത്ര ഹിതാ ജനാഃ ॥ 13 ॥
തതോ ഹലഹലാശബ്ദസ്സുമഹാന്സമപദ്യത ।
രഥൈരശ്വൈര്ഗജൈശ്ചാപി ജനാനാമുപഗച്ഛതാമ് ॥ 14 ॥
തതോ ഭരതമായാംതം ശതക്രതുമിവാമരാഃ ।
പ്രത്യനംദന്പ്രകൃതയോ യഥാ ദശരഥം തഥാ ॥ 15 ॥
ഹ്രദ ഇവ തിമിനാഗസംവൃതഃ സ്തിമിതജലോ മണിശംഖശര്കരഃ ।
ദശരഥസുതശോഭിതാ സഭാ സദശരഥേവ ബഭൌ യഥാ പുരാ ॥ 16 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകാശീതിതമസ്സര്ഗഃ ॥
