ശ്രീമദ്വാല്മീകീയ രാമായണേ ബാലകാംഡമ് ।
അഥ ചതുർവിംശസ്സര്ഗഃ ।
തതഃ പ്രഭാതേ വിമലേ കൃതാഹ്നികമരിംദമൌ ।
വിശ്വാമിത്രം പുരസ്കൃത്യ നദ്യാസ്തീരമുപാഗതൌ ॥ 1 ॥
തേ ച സർവേ മഹാത്മാനോ മുനയസ്സംശ്രിതവ്രതാഃ ।
ഉപസ്ഥാപ്യ ശുഭാം നാവം വിശ്വാമിത്രമഥാബ്രുവന് ॥ 2 ॥
ആരോഹതു ഭവാന്നാവം രാജപുത്രപുരസ്കൃതഃ ।
അരിഷ്ടം ഗച്ഛ പംഥാനം മാ ഭൂത്കാലവിപര്യയഃ ॥ 3 ॥
വിശ്വാമിത്രസ്തഥേത്യുക്തവാ താനൃഷീനഭിപൂജ്യ ച ।
തതാര സഹിതസ്താഭ്യാം സരിതം സാഗരംഗമാമ് ॥ 4 ॥
തതശ്ശുശ്രാവ വൈ ശബ്ദമതിസംരംഭവര്ധിതമ് ।
മധ്യമാഗമ്യ തോയസ്യ സഹ രാമഃകനീയസാ ॥ 5 ॥
അഥ രാമസ്സരിന്മധ്യേ പപ്രച്ഛ മുനിപുംഗവമ് ।
വാരിണോ ഭിദ്യമാനസ്യ കിമയം തുമുലോ ധ്വനിഃ ॥ 6 ॥
രാഘവസ്യ വചശ്ശ്രുത്വാ കൌതൂഹലസമന്വിതഃ ।
കഥയാമാസ ധര്മാത്മാ തസ്യ ശബ്ദസ്യ നിശ്ചയമ് ॥ 7 ॥
കൈലാസപർവതേ രാമ മനസാ നിര്മിതം സരഃ ।
ബ്രഹ്മണാ നരശാര്ദൂല തേനേദം മാനസം സരഃ ॥ 8 ॥
തസ്മാത്സുസ്രാവ സരസസ്സായോധ്യാമുപഗൂഹതേ ।
സര പ്രവൃത്താ സരയൂഃ പുണ്യാ ബ്രഹ്മസരശ്ച്യുതാ ॥ 9 ॥
തസ്യായമതുലശ്ശബ്ദോ ജാഹ്നവീമഭിവര്തതേ ।
വാരിസംക്ഷോഭജോ രാമ പ്രണാമം നിയതഃകുരു ॥ 10 ॥
താഭ്യാം തു താവുഭൌ കൃത്വാ പ്രണാമമതിധാര്മികൌ ।
തീരം ദക്ഷിണമാസാദ്യ ജഗ്മതുര്ലഘുവിക്രമൌ ॥ 11 ॥
സ വനം ഘോരസംകാശം ദൃഷ്ട്വാ നൃപവരാത്മജഃ ।
അവിപ്രഹതമൈക്ഷ്വാകഃ പപ്രച്ഛ മുനിപുംഗവമ് ॥ 12 ॥
അഹോ വനമിദം ദുര്ഗം ഝില്ലികാഗണനാദിതമ് ।
ഭൈരവൈശ്ശപദൈഃ പൂര്ണം ശകുംതൈര്ദാരുണാരുതൈഃ ॥ 13 ॥
നാനാപ്രകാരൈശ്ശകുനൈ ർവാശ്യദ്ഭിര്ഭൈരവസ്വനൈഃ ।
സിംഹവ്യാഘ്രവരാഹൈശ്ച വാരണൈശ്ചോപശോഭിതമ് ॥ 14 ॥
ധവാശ്വകര്ണകകുഭൈര്ബില്വതിംദുകപാടലൈഃ ।
സംകീര്ണം ബദരീഭിശ്ച കിന്ന്വേതദ്ദാരുണം വനമ് ॥ 15 ॥
തമുവാച മഹാതേജാ വിശ്വാമിത്രോ മഹാമുനിഃ ।
ശ്രൂയതാം വത്സ കാകുത്സ്ഥ യസ്യൈതദ്ദാരുണം വനമ് ॥ 16 ॥
ഏതൌ ജനപദൌ സ്ഫീതൌ പൂർവമാസ്താം നരോത്തമ ।
മലദാശ്ച കരൂശാശ്ച ദേവനിര്മാണനിര്മിതൌ ॥ 17 ॥
പുരാ വൃത്രവധേ രാമ മലേന സമഭിപ്ലുതമ് ।
ക്ഷുധാ ചൈവ സഹസ്രാക്ഷം ബ്രഹ്മഹത്യാ സമാവിശത് ॥ 18 ॥
തമിംദ്രം സ്നാപയന് ദേവാ ഋഷയശ്ച തപോധനാഃ ।
കലശൈസ്സ്നാപയാമാസുര്മലം ചാസ്യ പ്രമോചയന് ॥ 19 ॥
ഇഹ ഭൂമ്യാം മലം ദത്വാ ദത്വാ കാരൂശമേവ ച ।
ശരീരജം മഹേംദ്രസ്യ തതോ ഹര്ഷം പ്രപേദിരേ ॥ 20 ॥
നിര്മലോ നിഷ്കരൂശശ്ച ശുചിരിംംദ്രോ യദാഭവത് ।
ദദൌ ദേശസ്യ സുപ്രീതോ വരം പ്രഭുരനുത്തമമ് ॥ 21 ॥
ഇമൌ ജനപദൌ സ്ഫീതൌ ഖ്യാതിം ലോകേ ഗമിഷ്യതഃ ।
മലദാശ്ച കരൂശാശ്ച മമാംഗമലധാരിണൌ ॥ 22 ॥
സാധു സാധ്വിതി തം ദേവാഃ പാകശാസനമബ്രുവന് ।
ദേശസ്യ പൂജാം താം ദൃഷ്ട്വാ കൃതാം ശക്രേണ ധീമതാ ॥ 23 ॥
ഏതൌ ജനപദൌ സ്ഫീതൌ ദീര്ഘകാലമരിംദമ ।
മലദാശ്ച കരൂശാശ്ച മുദിതൌ ധനധാന്യതഃ ॥ 24 ॥
കസ്യചിത്ത്വഥ കാലസ്യ യക്ഷീ വൈ കാമരൂപിണീ ।
ബലം നാഗസഹസ്രസ്യ ധാരയംതീ തദാ ഹ്യഭൂത് ॥ 25 ॥
താടകാ നാമ ഭദ്രം തേ ഭാര്യാ സുംദസ്യ ധീമതഃ ।
2 മാരീചോ രാക്ഷസഃ പുത്രോ യസ്യാശ്ശക്രപരാക്രമഃ ॥ 26 ॥
വൃത്തബാഹുര്മഹാവീര്യോ വിപുലാസ്യ തനുര്മഹാന് ।
രാക്ഷസോ ഭൈരവാകാരോ നിത്യം ത്രാസയതേ പ്രജാഃ ॥ 27 ॥
ഇമൌ ജനപദൌ നിത്യം വിനാശയതി രാഘവ ।
മലദാംശ്ച കരൂശാംശ്ച താടകാ ദുഷ്ടചാരിണീ ॥ 28 ॥
സേയം പംഥാനമാവൃത്യ വസത്യധ്യര്ധയോജനേ ।
അത ഏവ ന ഗംതവ്യം താടകായാ വനം യതഃ ॥ 29 ॥
സ്വബാഹുബലമാശ്രിത്യ ജഹീമാം ദുഷ്ടചാരിണീമ് ।
മന്നിയോഗാദിമം ദേശം കുരു നിഷ്കംടകം പുനഃ ॥ 30 ॥
ന ഹി കശ്ചിദിമം ദേശം ശക്നോത്യാഗംതുമീദൃശമ് ।
യക്ഷിണ്യാ ഘോരയാ രാമ ഉത്സാദിതമസഹ്യയാ ॥ 31 ॥
ഏതത്തേ സർവമാഖ്യാതം യഥൈതദ്ദാരുണം വനമ് ।
യക്ഷ്യാ ചോത്സാദിതം സർവമദ്യാപി ന നിവര്തതേ ॥ 32 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ചതുർവിംശസ്സര്ഗഃ ॥
