ശ്രീമദ്വാല്മീകീയ രാമായണേ ബാലകാംഡമ് ।
അഥ ദ്വിസപ്തതിതമസ്സര്ഗഃ ।
തമുക്തവംതം വൈദേഹം വിശ്വാമിത്രോ മഹാമുനിഃ ।
ഉവാച വചനം വീരം വസിഷ്ഠസഹിതോ നൃപമ് ॥ 1 ॥
അചിംത്യാന്യപ്രമേയാനി കുലാനി നരപുംഗവ ।
ഇക്ഷ്വാകൂണാം വിദേഹാനാം നൈഷാം തുല്യോഽസ്തി കശ്ചന ॥ 2 ॥
സദൃശോ ധര്മസംബംധഃ സദൃശോ രൂപസംപദാ ।
രാമലക്ഷ്മണയോ രാജന് സീതാ ചോര്മിലയാ സഹ ॥ 3 ॥
വക്തവ്യം ച നരശ്രേഷ്ഠ ശ്രൂയതാം വചനം മമ ।
ഭ്രാതാ യവീയാന് ധര്മജ്ഞ ഏഷ രാജാ കുശധ്വജഃ ॥ 4 ॥
അസ്യ ധര്മാത്മനോ രാജന് രൂപേണാപ്രതിമം ഭുവി ।
സുതാദ്വയം നരശ്രേഷ്ഠ പത്ന്യര്ഥം വരയാമഹേ ॥ 5 ॥
ഭരതസ്യ കുമാരസ്യ ശത്രുഘ്നസ്യ ച ധീമതഃ ।
വരയാമസ്സുതേ രാജന് തയോരര്ഥേ മഹാത്മനോഃ ॥ 6 ॥
പുത്രാ ദശരഥസ്യേമേ രൂപയൌവനശാലിനഃ ।
ലോകപാലോപമാസ്സർവേ ദേവതുല്യപരാക്രമാഃ ॥ 7 ॥
ഉഭയോരപി രാജേംദ്ര സംബംധേനാനുബധ്യതാമ് ।
ഇക്ഷ്വാകോഃ കുലമവ്യഗ്രം ഭവതഃപുണ്യകര്മണഃ ॥ 8 ॥
വിശ്വാമിത്രവച ശ്ശൃത്വാ വസിഷ്ഠസ്യ മതേ തദാ ।
ജനകഃ പ്രാംജലിർവാക്യമുവാച മുനിപുംഗവൌ ॥ 9 ॥
കുലം ധന്യമിദം മന്യേ യേഷാം നോ മുനിപുംഗവൌ ।
സദൃശം കുലസംബംധം യദാജ്ഞാപയഥഃ സ്വയമ് ॥ 10 ॥
ഏവം ഭവതു ഭദ്രം വഃ കുശധ്വജസുതേ ഇമേ ।
പത്ന്യൌ ഭജേതാം സഹിതൌ ശത്രുഘ്നഭരതാവുഭൌ ॥ 11 ॥
ഏകാഹ്നാ രാജപുത്രീണാം ചതസൃണാം മഹാമുനേ ।
പാണീന് ഗൃഹ്ണംതു ചത്വാരോ രാജപുത്രാ മഹാബലാഃ ॥ 12 ॥
ഉത്തരേ ദിവസേ ബ്രഹ്മന് ഫല്ഗുനീഭ്യാം മനീഷിണഃ ।
വൈവാഹികം പ്രശംസംതി ഭഗോ യത്ര പ്രജാപതിഃ ॥ 13 ॥
ഏവമുക്ത്വാ വചസ്സൌമ്യം പ്രത്യുത്ഥായ കൃതാംജലിഃ ।
ഉഭൌ മുനിവരൌ രാജാ ജനകോ വാക്യമബ്രവീത് ॥ 14 ॥
പരോ ധര്മഃ കൃതോ മഹ്യം ശിഷ്യോഽസ്മിഭവതോ സദാ ।
ഇമാന്യാസനമുഖ്യാനി ആസാതാം മുനിപുംഗവൌ ॥ 15 ॥
യഥാ ദശരഥസ്യേയം തഥാഽയോധ്യാ പുരീ മമ ।
പ്രഭുത്വേ നാസ്തി സംദേഹോ യഥാര്ഹം കര്തുമര്ഹഥ ॥ 16 ॥
തഥാ ബ്രുവതി വൈദേഹേ ജനകേ രഘുനംദനഃ ।
രാജാ ദശരഥോ ഹൃഷ്ടഃ പ്രത്യുവാച മഹീപതിമ് ॥ 17 ॥
യുവാമസംഖ്യേയഗുണൌ ഭ്രാതരൌ മിഥിലേശ്വരൌ ।
ഋഷയോ രാജസംഘാശ്ച ഭവദ്ഭ്യാമഭിപൂജിതാഃ ॥ 18 ॥
സ്വസ്തി പ്രാപ്നുഹി ഭദ്രം തേ ഗമിഷ്യാമി സ്വമാലയമ് ।
ശ്രാദ്ധകര്മാണി സർവാണി വിധാസ്യാമീതി ചാബ്രവീത് ॥ 19 ॥
തമാപൃഷ്ട്വാ നരപതിം രാജാ ദശരഥസ്തദാ ।
മുനീംദ്രൌ തൌ പുരസ്കൃത്യ ജഗാമാശു മഹായശാഃ ॥ 20 ॥
സ ഗത്വാ നിലയം രാജാ ശ്രാദ്ധം കൃത്വാ വിധാനതഃ ।
പ്രഭാതേ കാല്യമുത്ഥായ ചക്രേ ഗോദാനമുത്തമമ് ॥ 21 ॥
ഗവാം ശതസഹസ്രാണി ബ്രാഹ്മണേഭ്യോ നരാധിപഃ ।
ഏകൈകശോ ദദൌ രാജാ പുത്രാനുദ്ദിശ്യ ധര്മതഃ ॥ 22 ॥
സുവര്ണശ്രുംഗാ സ്സംപന്നാ സ്സവത്സാഃ കാംസ്യദോഹനാഃ ।
ഗവാം ശതസഹസ്രാണി ചത്വാരി പുരുഷര്ഷഭഃ ॥ 23 ॥
വിത്തമന്യച്ച സുബഹുദ്വിജേഭ്യോ രഘുനംദനഃ ।
ദദൌ ഗോദാനമുദ്ദിശ്യ പുത്രാണാം പുത്രവത്സലഃ ॥ 24 ॥
സ സുതൈഃ കൃതഗോദാനൈർവൃതസ്തു നൃപതിസ്തദാ ।
ലോകപാലൈരിവാഭാതി വൃതഃ സ്സൌമ്യഃ പ്രജാപതിഃ ॥ 25 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ ദ്വിസപ്തതിതമസ്സര്ഗഃ ॥
