ശ്രീമദ്വാല്മീകീയ രാമായണേ യുദ്ധകാംഡമ് ।
അഥ ചതുഃപംചാശസ്സര്ഗഃ ।
സ്വബലസ്യ ച ഘാതേന അംഗദസ്യ ബലേന ച ।
രാഷസഃ ക്രോധമാവിഷ്ടോ വജ്രദംഷ്ട്രോ മഹാബലഃ ॥ 1 ॥
വിഷ്പാര്യചധനുര്ഘോരംശക്രാശനിസമസ്വനമ് ।
വാനരാണാമനീകാനിപ്രാകിരച്ഛരവൃഷ്ടിഭിഃ ॥ 2 ॥
രാക്ഷസാശ്ചാപിമുഖ്യാസ്തേരഥേഷുസമവസ്ഥിതാഃ ।
നാനാപ്രഹരണാശ്ശൂരാഃപ്രായുധ്യംതസ്തദാരണേ ॥ 3 ॥
വാനരാണാംചശൂരായേതേസർവേപ്ലവഗര്ഷഭാഃ ।
ആയുധ്യംതശിലാഹസ്താസ്സമവേതാസ്സമംതതഃ ॥ 4 ॥
തത്രായുധസഹസ്രാണിതസ്മിന്നായോധനേഭൃശമ് ।
രാക്ഷസാഃകപിമുഖ്യേഷുപാതയാംചക്രിരേതദാ ॥ 5 ॥
വാനരാശ്ചാപിരക്ഷസ്സുഗിരവൃക്ഷാന്മഹാശിലാഃ ।
പ്രവീരാഃപാതയാമാസുര്മത്തമാതംഗസന്നിഭാഃ ॥ 6 ॥
ശൂരാണാംയുദ്യമാനാനാംസമരേഷ്ന്വിവര്തിനാമ് ।
തദ്രാക്ഷസഗണാനാംചസുയുദ്ധംസമവര്തത ॥ 7 ॥
പ്രഭിന്നശിരസഃകേചിഛചിന്നൈഃപാദൈശ്ചബാഹുഭിഃ ।
ശസ്സ്രൈരര്ദിതദേഹാഭ്യരുധിരേണസമുക്ഷിതാഃ ॥ 8 ॥
ഹരയോ രാക്ഷസാശ്ചൈന ശേരതേ ഗാം സമാശ്രിതാഃ ।
കംകഗൃധ്രാബലാഢ്യശ്ച ഗോമായുകുലസംകുലാഃ ॥ 9 ॥
കബംധാനിസമുത്പേതുര്ഭീമാണാംഭീഷണാനിവൈ ।
ഭുജപാണിശിരശ്ഛിന്നകായാശ്ചഭൂതലേ ॥ 10 ॥
വാനരാരാക്ഷസാശ്ചാപിനിപേതുസ്തത്രവൈരണേ ।
തതോവാനരസൈന്യേനഹന്യമാനംനിശാചരമ് ॥ 11 ॥
പ്രാഭജ്യതബലംസർവംവജ്രദംഷ്ട്രസ്യപശ്യതഃ ।
രാക്ഷസാന്ഭയവിത്രസ്താന്ഹന്യമാനാന് പ്ലവംഗമൈഃ ॥ 12 ॥
ദൃഷ്ടവാസരോഷതാമ്രാക്ഷോവജ്രദംഷ്ട്രഃപ്രതാപവാന് ।
പ്രവിവേശധനുഷ്പാണിസ്ത്രാസയന്ഹരിവാഹിനീമ് ॥ 13 ॥
ശരൈർവിദാരയാമാസകംകപത്രൈരജിഹ്മഗൈഃ ।
ബിഭേദവാനരാംസ്തത്രസപ്താഷ്ടൌനവപംചച ॥ 14 ॥
വിവ്യാധപരമക്രുദ്ധോവജ്രദംഷ്ട്രഃപ്രതാപവാന് ।
ത്രസ്താഃസർവേഹരിഗണാഃശരൈഃസംകൃത്തകംദരാഃ ॥ 15 ॥
അംഗദംസംപ്രധാവംതിപ്രജാപതിമിവപ്രജാഃ ।
തതോഹരിഗണാന് ഭഗ്നാന് ദൃഷ്ടവാവാലിസുതസ്തദാ ॥ 16 ॥
ക്രോധേനവജ്രദംഷ്ട്രംതമുദീക്ഷംതമുദൈക്ഷത ।
വജ്രദംഷ്ട്രോഽംഗദശ്ചോഭൌസംഗതൌഹരിരാക്ഷസൌ ॥ 17 ॥
ചേരതുഃപരമക്രുദ്ധൌഹരിമത്തഗജാവിവ ।
തതശ്ശതസഹസ്രേണഹരിപുത്രംമഹാബലഃ ॥ 18 ॥
ജഘാനമര്മദേശേഷുമാതംഗമിവതോമരൈഃ ।
രുധിരോക്ഷിതസർവാംഗോവാലിസൂനുര്മഹാബലഃ ॥ 19 ॥
ചിക്ഷേപവജ്രദംഷ്ട്രായവൃക്ഷംഭീമപരാക്രമഃ ।
ദൃഷ്ടാപതംതംതംവൃക്ഷമസംഭ്രാംതശ്ചരാക്ഷസഃ ॥ 20 ॥
ചിച്ഛേദബഹുധാസോഽപിമഥിതഃപ്രാദതദ്ഭുവി ।
തംദൃഷ്ടവാവജ്രദംഷ്ട്രസ്യവിക്രമംപ്ലവഗര്ഷഭ ॥ 21 ॥
പ്രഗൃഹ്യവിപുലംശൈലംചിക്ഷേപചനനാദച ।
സമാപതംതംദൃഷ്ടവാസരഥാദാപ്ലുത്യവീര്യവാന് ॥ 22 ॥
ഗദാപാണിരസംഭ്രാംതഃപൃഥിവ്യാംസമതിഷ്ഠത ।
സാംഗദേനഗദാക്ഷിപ്താഗത്വാതുരണമൂര്ധനി ॥ 23 ॥
സചക്രകൂബരംസാശ്വംപ്രമമാഥരഥംതദാ ।
തതോഽന്യച്ഛിഖരംഗൃഹ്യവിപുലംദ്രുമഭൂഷിതമ് ॥ 24 ॥
വജ്രദംഷ്ട്രസ്യശിരസിപാതയാമാസസാഽംഗദഃ ।
അഭവച്ഛോണിതോദ്ഗാരീവജ്രദംഷ്ട്രസ്സമൂര്ഛിതഃ ॥ 25 ॥
മുഹൂര്തമഭവന്മൂഢോഗദാമാലിങ് ഗ്യനിശ്ശ്വസന് ।
സംലബ്ദസംജ്ഞോഗദയാവാലിപുത്രമവസ്ഥിതമ് ॥ 26 ॥
ജഘാനപരമക്രുദ്ധോവക്ഷോദേശേനിശാചരഃ ।
ഗദാംത്യക്ത്വാതതസ്തത്രമുഷ്ടിയുദ്ധമവര്തത ॥ 27 ॥
അന്യോന്യംജഘ്നതുസ്തത്രതാവുഭൌഹരിരാക്ഷസൌ ।
രുധിരോദ്ഗാരിണൌതൌതുപ്രഹാരൈര്ജനിതശ്രമൌ ॥ 28 ॥
ബഭൂവതുസ്സുവിക്രാംതാവംഗാരകബുധാവിവ ।
തതഃപരമതേജസ്വീഅംഗദഃപ്ലവഗര്ഷഭഃ ॥ 29 ॥
ഉത്പാട്യവൃക്ഷംസ്ഥിതവാന് ബഹുപുഷ്പഫലാംചിതമ് ।
ജഗ്രാഹചാര്ഷഭംചര്മഖഡഗംചവിപുലംശുഭമ് ॥ 30 ॥
കിംകിണാജാലസംഛന്നംചര്മണാചപരിഷ്കൃതമ് ।
ചിത്രാംശ്ചരുചിരാന്മാര്ഗാംശ്ചേരതുഃകപിരാക്ഷസൌ ॥ 31 ॥
ജഘ്നതുശ്ചതദാന്യോന്യംനിര്ദയംജയകാങ് ക്ഷിണൌ ।
വ്രണൈസ്സാസ്ത്രൈരശോഭേതാംപുഷ്പിതാവിവകിംശുകൌ ॥ 32 ॥
യുധ്യമാനൌ പരിശ്രാനൌ ജാനുഭ്യാമവനീം ഗതൌ ।
നിമേഷാംതരമാത്രേണ അംഗദഹ് കപികുംജരഃ ॥ 33 ॥
ഉദതിഷ്ഠത ദീപ്താക്ഷോ ദംഡാഹത ഇവോരഗഃ ।
നിര്മലേന സുധൌതേന ഖഡ്ഗേനാസ്യ മഹച്ഛിരഃ ॥ 34 ॥
ജഘാനവജ്രദംഷ്ട്രസ്യവാലിസൂമര്മഹാബലഃ ।
രുധിരോക്ഷിതഗാത്രസ്യബഭൂവപതിതംദ്വിധാ ॥ 35 ॥
സരോഷപരിവൃത്താക്ഷംശുഭംഖഡഗഹതംശിരഃ ।
വജ്രദംഷ്ട്രംഹതംദൃഷ്ടവാരാക്ഷസാഭയമോഹിതാഃ ॥ 36 ॥
ത്രസ്താഹ്യഭ്യദ്രവന് ലംകാംവധ്യമാനാഃപ്ലവംഗമൈഃ ।
വിഷണ്ണവദനാഃ ദീനാഹ്രിയാകിംചിദവാങ്മുഖാഃ ॥ 37 ॥
നിഹത്യതംവജ്രധരപ്രതാപഃസവാലിസൂനുഃകപിസൈന്യമധ്യേ ।
ജഗാമഹര്ഷംമഹിതോമഹാബലഃസഹസ്രനേത്രസ്ത്രിദശൈരിവാവൃതഃ ॥ 38 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ യുദ്ധകാംഡേ ചതുഃപംചാശസ്സര്ഗഃ ॥
