ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ സപ്തവിംശസ്സര്ഗഃ ।
ഏവമുക്താ തു വൈദേഹീ പ്രിയാര്ഹാ പ്രിയവാദിനീ ।
പ്രണയാദേവ സംക്രുദ്ധാ ഭര്താരമിദമബ്രവീത് ॥ 1 ॥
കിമിദം ഭാഷസേ രാമ വാക്യം ലഘുതയാ ധ്രുവമ് ।
ത്വയാ യദപഹാസ്യം മേ ശ്രുത്വാ നരവരാത്മജ ॥ 2 ॥
ആര്യപുത്ര പിതാ മാതാ ഭ്രാതാ പുത്രസ്തഥാ സ്നുഷാ ।
സ്വാനി പുണ്യാനി ഭുംജാനാഃ സ്വം സ്വം ഭാഗ്യമുപാസതേ ॥ 3 ॥
ഭര്തുര്ഭാഗ്യം തു ഭാര്യൈകാ പ്രാപ്നോതി പുരുഷര്ഷഭ ।
അതശ്ചൈവാഹമാദിഷ്ടാ വനേ വസ്തവ്യമിത്യപി ॥ 4 ॥
ന പിതാ നാത്മജോ നാത്മാ ന മാതാ ന സഖീജനഃ ।
ഇഹ പ്രേത്യ ച നാരീണാം പതിരേകോ ഗതിസ്സദാ ॥ 5 ॥
യദി ത്വം പ്രസ്ഥിതോ ദുര്ഗം വനമദ്യൈവ രാഘവ ।
അഗ്രതസ്തേ ഗമിഷ്യാമി മൃദ്നംതീ കുശകംടകാന് ॥ 6 ॥
ഈര്ഷ്യാരോഷൌ ബഹിഷ്കൃത്യ ഭുക്തശേഷമിവോദകമ് ।
നയ മാം വീര വിസ്രബ്ധഃ പാപം മയി ന വിദ്യതേ ॥ 7 ॥
പ്രാസാദാഗ്രൈർവിമാനൈർവാ വൈഹായസഗതേന വാ ।
സർവാവസ്ഥാഗതാ ഭര്തുഃ പാദച്ഛായാ വിശിഷ്യതേ ॥ 8 ॥
അനുശിഷ്ടാഽസ്മി മാത്രാ ച പിത്രാ ച വിവിധാശ്രയമ് ।
നാഽസ്മി സംപ്രതി വക്തവ്യാ വര്തിതവ്യം യഥാ മയാ ॥ 9 ॥
അഹം ദുര്ഗം ഗമിഷ്യാമി വനം പുരുഷവര്ജിതമ് ।
നാനാമൃഗഗണാകീര്ണം ശാര്ദൂലവൃകസേവിതമ് ॥ 10 ॥
സുഖം വനേ നിവത്സ്യാമി യഥൈവ ഭവനേ പിതുഃ ।
അചിംതയംതീ ത്രീന്ലോകാംശ്ച്ചിംതയംതീ പതിവ്രതമ് ॥ 11 ॥
ശുശ്രൂഷമാണാ തേ നിത്യം നിയതാ ബ്രഹ്മചാരിണീ ।
സഹ രംസ്യേ ത്വയാ വീര വനേഷു മധുഗംധിഷു ॥ 12 ॥
ത്വം ഹി ശക്തോ വനേ കര്തും രാമ സംപരിപാലനമ് ।
അന്യസ്യാപി ജനസ്യേഹ കിം പുനര്മമ മാനദ ॥ 13 ॥
സഹ ത്വയാ ഗമിഷ്യാമി വനമദ്യ ന സംശയഃ ।
നാഹം ശക്യാ മഹാഭാഗ നിവര്തയിതുമുദ്യതാ ॥ 14 ॥
ഫലമൂലാശനാ നിത്യം ഭവിഷ്യാമി ന സംശയഃ ।
ന തേ ദുഃഖം കരിഷ്യാമി നിവസംതീ സഹ ത്വയാ ॥ 15 ॥
ഇച്ഛാമി സരിതശ്ശൈലാന്പല്വലാനി വനാനി ച ।
ദ്രഷ്ടും സർവത്ര നിര്ഭീതാ ത്വയാ നാഥേന ധീമതാ ॥ 16 ॥
ഹംസകാരംഡവാകീര്ണാഃ പദ്മിനീസ്സാധുപുഷ്പിതാഃ ।
ഇച്ഛേയം സുഖിനീ ദ്രഷ്ടും ത്വയാ വീരേണ സംഗതാ ॥ 17 ॥
അഭിഷേകം കരിഷ്യാമി താസു നിത്യം യതവ്രതാ ।
സഹ ത്വയാ വിശാലാക്ഷ രംസ്യേ പരമനംദിനീ ॥ 18 ॥
ഏവം വര്ഷസഹസ്രാണാം ശതം വാഽഹം ത്വയാ സഹ ।
വ്യതിക്രമം ന വേത്സ്യാമി സ്വര്ഗോഽപി ന ഹി മേ മതഃ ॥ 19 ॥
സ്വര്ഗേഽപി ച വിനാ വാസോ ഭവിതാ യദി രാഘവ ।
ത്വയാ മമ നരവ്യാഘ്ര നാഹം തമപി രോചയേ ॥ 20 ॥
അഹം ഗമിഷ്യാമി വനം സുദുര്ഗമം മൃഗായുതം വാനരവാരണൈര്യുതമ് ।
വനേ നിവത്സ്യാമി യഥാ പിതുര്ഗൃഹേ തവൈവ പാദാവുപഗൃഹ്യ സംയതാ ॥ 21 ॥
അനന്യഭാവാമനുരക്തചേതസം ത്വയാ വിയുക്താം മരണായനിശ്ചിതാമ് ।
നയസ്വ മാം സാധു കുരുഷ്വ യാചനാം ന തേ മയാഽതോ ഗുരുതാ ഭവിഷ്യതി ॥ 22 ॥
തഥാ ബ്രുവാണാമപി ധര്മവത്സലോ ന ച സ്മ സീതാം നൃവരോ നിനീഷതി ।
ഉവാച ചൈനാം ബഹു സന്നിവര്തനേ വനേ നിവാസസ്യ ച ദുഃഖിതാം പ്രതി ॥ 23 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ സപ്തവിംശസ്സര്ഗഃ ॥
