ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ഏകാധികശതതമസ്സര്ഗഃ ।
രാമസ്യ വചനം ശ്രുത്വാ ഭരതഃ പ്രത്യുവാച ഹ ।
കിം മേ ധര്മാദ്വിഹീനസ്യ രാജധര്മഃ കരിഷ്യതി ॥ 1 ॥
കിം ഏതദ് ഇഗ്ച്ഛേയം അഹം ശ്രോതും പ്രവ്യാഹൃതം ത്വയാ ।
യസ്മാത് ത്വം ആഗതോ ദേശം ഇമം ചീര ജടാ അജിനീ ॥ 2 ॥
സ സമൃദ്ധാം മയാ സാര്ധമയോധ്യാം ഗച്ഛ രാഘവ ।
അഭിഷേചയചാത്മാനം കുലസ്യാസ്യ ഭവായ നഃ ॥ 3 ॥
രാജാനം മാനുഷം പ്രാഹു ര്ദേവത്വേ സമ്മതോ മമ ।
യസ്യ ധര്മാര്ഥസഹിതം വൃത്തമാഹുരമാനുഷമ് ॥ 4 ॥
കേകയസ്ഥേ ച മയി തു ത്വയി ചാരണ്യ മാശ്രിതേ ।
ദിവമാര്യോ ഗതോ രാജാ യായജൂകഃ സതാം മതഃ ॥ 5 ॥
നിഷ്ക്രാംതമാത്രേ ഭവതി സസീതേ സഹലക്ഷ്മണേ ।
ദുഃഖശോകാഭിഭൂതസ്തു രാജാ ത്രിദിവമഭ്യഗാത് ॥ 6 ॥
ഉത്തിഷ്ഠ പുരുഷവ്യാഘ്ര ക്രിയതാമുദകം പിതുഃ ।
അഹം ചായം ച ശത്രുഘ്നഃ പൂർവമേവ കൃതോദകൌ ॥ 7 ॥
പ്രിയേണ കില ദത്തം ഹി പിതൃലോകേഷു രാഘവ ।
അക്ഷയ്യം ഭവതീത്യാഹുര്ഭവാംശ്ചൈവ പിതുഃ പ്രിയഃ ॥ 8 ॥
ത്വാമേവ ശോചംസ്തവ ദര്ശനേപ്സുസ്ത്വയ്യേവ സക്താമനിവര്ത്യ ബുദ്ധിമ് ।
ത്വയാ വിഹീന സ്തവ ശോകമഗ്നസ്ത്വാം സംസ്മരന്നസ്തമിതഃ പിതാ തേ ॥ 9 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ഏകാധികശതതമസ്സര്ഗഃ ॥
