ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ ദ്വിനവതിതമസ്സര്ഗഃ ।
തതസ്താം രജനീമുഷ്യ ഭരതസ്സപരിച്ഛദഃ ।
കൃതാതിഥ്യോ ഭരദ്വാജം കാമാദഭിജഗാമ ഹ ॥ 1 ॥
തം ഋഷിഃ പുരുഷവ്യാഘ്രം പ്രാംജലിം പ്രേക്ഷ്യ ചാഽഗതമ് ।
ഹുതാഗ്നിഹോത്രോ ഭരതം ഭരദ്വാജോഽഭ്യഭാഷത ॥ 2 ॥
കച്ചിദത്ര സുഖാ രാത്രിസ്തവാസ്മദ്വിഷയേ ഗതാ ।
സമഗ്രസ്തേ ജനഃ കച്ചിദാതിഥ്യേ ശംസ മേഽനഘ ॥ 3 ॥
തമുവാചാംജലിം കൃത്വാ ഭരതോഽഭിപ്രണമ്യ ച ।
ആശ്രമാദഭിനിഷ്ക്രാംതമൃഷിമുത്തമതേജസമ് ॥ 4 ॥
സസുഖോഷിതോഽസ്മി ഭഗവന്സമഗ്രബലവാഹനഃ ।
തര്പിതസ്സർവകാമൈശ്ച സാമാത്യോ ബലവത്ത്വയാ ॥ 5 ॥
അപേതക്ലമസംതാപാ സ്സുഭിക്ഷാസ്സുപ്രതിശ്രയാഃ ।
അപി പ്രേഷ്യാനുപാദായ സർവേ സ്മ സുസുഖോഷിതാഃ ॥ 6 ॥
ആമംത്രയേഽഹം ഭഗവന് കാമം ത്വാമൃഷിസത്തമഃ ।
സമീപം പ്രസ്ഥിതം ഭ്രാതുര്മൈത്രേണേക്ഷസ്വ ചക്ഷുഷാ ॥ 7 ॥
ആശ്രമം തസ്യ ധര്മജ്ഞ ധാര്മികസ്യ മഹാത്മനഃ ।
ആചക്ഷ്വ കതമോ മാര്ഗഃ കിയാനിതി ച ശംസ മേ ॥ 8 ॥
ഇതി പൃഷ്ടസ്തു ഭരതം ഭ്രാതൃദര്ശനലാലസമ് ।
പ്രത്യുവാച മഹാതേജാ ഭരദ്വാജോ മഹാതപാഃ ॥ 9 ॥
ഭരതാര്ധതൃതീയേഷു യോജനേഷ്വജനേ വനേ ।
ചിത്രകൂടോ ഗിരിസ്തത്ര രമ്യനിര്ഝരകാനനഃ ॥ 10 ॥
ഉത്തരം പാര്ശ്വമാസാദ്യ തസ്യ മംദാകിനീ നദീ ।
പുഷ്പിതദ്രുമസംഛന്നാ രമ്യപുഷ്പിതകാനനാ ॥ 11 ॥
അനംതരം തത്സരിതശ്ചിത്രകൂടശ്ച പർവതഃ ।
തയോഃ പര്ണകുടീ താത തത്ര തൌ വസതോ ധ്രുവമ് ॥ 12 ॥
ദക്ഷിണേനൈവ മാര്ഗേണ സവ്യദക്ഷിണമേവ വാ ।
ഗജവാജിരഥാകീര്ണാം വാഹിനീം വാഹിനീപതേ ॥ 13 ॥
വാഹയസ്വ മഹാഭാഗ തതോ ദ്രക്ഷ്യസി രാഘവമ് ।
പ്രയാണമിതി തച്ഛ്രുത്വാ രജരാജസ്യ യോഷിതഃ ।
ഹിത്വാ യാനാനി യാനാര്ഹാഃ ബ്രാഹ്മണം പര്യവാരയന് ॥ 14 ॥
വേപമാനാ കൃശാ ദീനാ സഹ ദേവ്യാ സുമിത്രയാ ।
കൌസല്യാ തത്ര ജഗ്രാഹ കരാഭ്യാം ചരണൌ മുനേഃ ॥ 15 ॥
അസമൃദ്ധേന കാമേന സർവലോകസ്യ ഗര്ഹിതാ ।
കൈകേയീ തസ്യ ജഗ്രാഹ ചരണൌ സവ്യപത്രപാ ॥ 16 ॥
തം പ്രദക്ഷിണമാഗമ്യ ഭഗവംതം മഹാമുനിമ് ।
അദൂരാര്ഭരതസ്യൈവ തസ്ഥൌ ദീനമനാസ്തദാ ॥ 17 ॥
തതഃ പപ്രച്ഛ ഭരതം ഭരദ്വാജോ ദൃഢവ്രതഃ ।
വിശേഷം ജ്ഞാതുമിച്ഛാമി മാത്രൂണാം തവ രാഘവ ॥ 18 ॥
ഏവമുക്തസ്തു ഭരതോ ഭരദ്വാജേന ധീമതാ ।
ഉവാച പ്രാംജലിര്ഭൂത്വാ വാക്യം വചനകോവിദഃ ॥ 19 ॥
യാമിമാം ഭഗവന് ദീനാം ശോകാനശനകര്ശിതാമ് ।
പിതുര്ഹി മഹിഷീം ദേവീം ദേവതാമിവ പശ്യസി ॥ 20 ॥
ഏഷാ തം പുരഷവ്യാഘ്രം സിംഹവിക്രാംതഗാമിനമ് ।
കൌസല്യാ സുഷുവേ രാമം ധാതാരമദിതിര്യഥാ ॥ 21 ॥
അസ്യാ വാമഭുജം ശ്ലിഷ്ടാ യൈഷാ തിഷ്ഠതി ദുര്മനാഃ ।
കര്ണികാരസ്യ ശാഖേവ ശീര്ണപുഷ്പാ വനാംതരേ ॥ 22 ॥
ഏതസ്യാസ്തു സുതൌ ദേവ്യാഃ കുമാരൌ ദേവവര്ണിനൌ ।
ഉഭൌ ലക്ഷ്മണശത്രുഘ്നൌ വീരൌ സത്യപരാക്രമൌ ॥ 23 ॥
യസ്യാഃ കൃതേ നരവ്യാഘ്രൌ ജീവനാശമിതോ ഗതൌ ।
രാജപുത്രവിഹീനശ്ച സ്വര്ഗം ദശരഥോ ഗതഃ ॥ 24 ॥
ക്രോധനാമകൃതപ്രജ്ഞാം ദൃപ്താം സുഭഗമാനിനീമ് ।
ഐശ്വര്യകാമാം കൈകേയീമനാര്യാമാര്യാരൂപിണീമ് ॥ 25 ॥
മമൈതാം മാതരം വിദ്ധി നൃശംസാം പാപനിശ്ചയാമ് ।
യതോമൂലം ഹി പശ്യാമി വ്യസനം മഹദാത്മനഃ ॥ 26 ॥
ഇത്യുക്ത്വാ നരശാര്ദൂലോ ബാഷ്പഗദ്ഗദയാ ഗിരാ ।
സ നിശ്സ്വാസ താമ്രാക്ഷോ നാഗഃ കൃദ്ധ ഇവ ശ്വസന് ॥ 27 ॥
ഭരദ്വാജോ മഹര്ഷിസ്തം ബ്രുവംതം ഭരതം തഥാ ।
പ്രത്യുവാച മഹാബുദ്ധിരിദം വചനമര്ഥവത് ॥ 28 ॥
ന ദോഷേണാവഗംതവ്യാ കൈകേയീ ഭരത ത്വയാ ।
രാമപ്രവ്രാജനം ഹ്യേതത്സുഖോദര്കം ഭവിഷ്യതി ॥ 29 ॥
ദേവാനാം ദാനവാനാം ച ഋഷീണാം ഭാവിതാത്മനാമ് ।
ഹിതമേവ ഭവിഷ്യദ്ധി രാമപ്രവ്രാജനാദിഹ ॥ 30 ॥
അഭിവാദ്യ തു സംസിദ്ധഃ കൃത്വാ ചൈനം പ്രദക്ഷിണമ് ।
ആമംത്ര്യ ഭരത സ്സൈന്യം യുജ്യതാമിത്യചോദയത് ॥ 31 ॥
തതോ വാജിരഥാന്യുക്താന് ദിവ്യാന്ഹേമപരിഷ്കൃതാന് ।
അധ്യാരോഹത്പ്രയാണാര്ഥീ ബഹൂന്ബഹുവിധോ ജനഃ ॥ 32 ॥
ഗജകന്യാ ഗജാശ്ചൈവ ഹേമകക്ഷ്യാഃ പതാകിനഃ ।
ജീമൂതാ ഇവ ഘര്മാംതേ സഘോഷാസ്സംപ്രതസ്ഥിരേ ॥ 33 ॥
വിവിധാന്യപി യാനാനി മഹംതി ച ലഘൂനി ച ।
പ്രയയു സ്സുമഹാര്ഹാണി പാദൈ രേവ പദാതയഃ ॥ 34 ॥
അഥ യാനപ്രവേകൈസ്തു കൌസല്യാപ്രമുഖാഃ സ്ത്രിയഃ ।
രാമദര്ശനകാംക്ഷിണ്യഃ പ്രയയുര്മുദിതാസ്തദാ ॥ 35 ॥
ചംദ്രാര്കതരുണാഭാസാം നിര്യുക്താം ശിബികാം ശുഭാമ് ।
ആസ്ഥായ പ്രയയൌ ശ്രീമാന്ഭരത സ്സപരിച്ഛദഃ ॥ 36 ॥
സാ പ്രയാതാ മഹാസേനാ ഗജവാജിരഥാകുലാ ।
ദക്ഷിണാം ദിശമാവൃത്യ മഹാമേഘ ഇവോത്ഥിതഃ ॥ 37 ॥
വനാനി തു വ്യതിക്രമ്യ ജുഷ്ടാനി മൃഗപക്ഷിഭിഃ ।
ഗംഗായാഃ പരവേലായാം ഗിരിഷ്വപി നദീഷു ച ॥ 38 ॥
സാ സംപ്രഹൃഷ്ടദ്വിപവാജിയോധാ വിത്രാസയംതീ മൃഗപക്ഷിസംഘാന് ।
മഹദ്വനം തത്പ്രതിഗാഹമാനാ രരാജ സേനാ ഭരതസ്യ തത്ര ॥ 39 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ ദ്വിനവതിതമസ്സര്ഗഃ ॥
