śrīmadvālmīkīya rāmāyaṇē bālakāṇḍam ।
atha dvisaptatitamassargaḥ ।
tamuktavantaṃ vaidēhaṃ viśvāmitrō mahāmuniḥ ।
uvācha vachanaṃ vīraṃ vasiṣṭhasahitō nṛpam ॥ 1 ॥
achintyānyapramēyāni kulāni narapuṅgava ।
ikṣvākūṇāṃ vidēhānāṃ naiṣāṃ tulyō'sti kaśchana ॥ 2 ॥
sadṛśō dharmasambandhaḥ sadṛśō rūpasampadā ।
rāmalakṣmaṇayō rājan sītā chōrmilayā saha ॥ 3 ॥
vaktavyaṃ cha naraśrēṣṭha śrūyatāṃ vachanaṃ mama ।
bhrātā yavīyān dharmajña ēṣa rājā kuśadhvajaḥ ॥ 4 ॥
asya dharmātmanō rājan rūpēṇāpratimaṃ bhuvi ।
sutādvayaṃ naraśrēṣṭha patnyarthaṃ varayāmahē ॥ 5 ॥
bharatasya kumārasya śatrughnasya cha dhīmataḥ ।
varayāmassutē rājan tayōrarthē mahātmanōḥ ॥ 6 ॥
putrā daśarathasyēmē rūpayauvanaśālinaḥ ।
lōkapālōpamāssarvē dēvatulyaparākramāḥ ॥ 7 ॥
ubhayōrapi rājēndra sambandhēnānubadhyatām ।
ikṣvākōḥ kulamavyagraṃ bhavataḥpuṇyakarmaṇaḥ ॥ 8 ॥
viśvāmitravacha śśṛtvā vasiṣṭhasya matē tadā ।
janakaḥ prāñjalirvākyamuvācha munipuṅgavau ॥ 9 ॥
kulaṃ dhanyamidaṃ manyē yēṣāṃ nō munipuṅgavau ।
sadṛśaṃ kulasambandhaṃ yadājñāpayathaḥ svayam ॥ 10 ॥
ēvaṃ bhavatu bhadraṃ vaḥ kuśadhvajasutē imē ।
patnyau bhajētāṃ sahitau śatrughnabharatāvubhau ॥ 11 ॥
ēkāhnā rājaputrīṇāṃ chatasṛṇāṃ mahāmunē ।
pāṇīn gṛhṇantu chatvārō rājaputrā mahābalāḥ ॥ 12 ॥
uttarē divasē brahman phalgunībhyāṃ manīṣiṇaḥ ।
vaivāhikaṃ praśaṃsanti bhagō yatra prajāpatiḥ ॥ 13 ॥
ēvamuktvā vachassaumyaṃ pratyutthāya kṛtāñjaliḥ ।
ubhau munivarau rājā janakō vākyamabravīt ॥ 14 ॥
parō dharmaḥ kṛtō mahyaṃ śiṣyō'smibhavatō sadā ।
imānyāsanamukhyāni āsātāṃ munipuṅgavau ॥ 15 ॥
yathā daśarathasyēyaṃ tathā'yōdhyā purī mama ।
prabhutvē nāsti sandēhō yathārhaṃ kartumarhatha ॥ 16 ॥
tathā bruvati vaidēhē janakē raghunandanaḥ ।
rājā daśarathō hṛṣṭaḥ pratyuvācha mahīpatim ॥ 17 ॥
yuvāmasaṅkhyēyaguṇau bhrātarau mithilēśvarau ।
ṛṣayō rājasaṅghāścha bhavadbhyāmabhipūjitāḥ ॥ 18 ॥
svasti prāpnuhi bhadraṃ tē gamiṣyāmi svamālayam ।
śrāddhakarmāṇi sarvāṇi vidhāsyāmīti chābravīt ॥ 19 ॥
tamāpṛṣṭvā narapatiṃ rājā daśarathastadā ।
munīndrau tau puraskṛtya jagāmāśu mahāyaśāḥ ॥ 20 ॥
sa gatvā nilayaṃ rājā śrāddhaṃ kṛtvā vidhānataḥ ।
prabhātē kālyamutthāya chakrē gōdānamuttamam ॥ 21 ॥
gavāṃ śatasahasrāṇi brāhmaṇēbhyō narādhipaḥ ।
ēkaikaśō dadau rājā putrānuddiśya dharmataḥ ॥ 22 ॥
suvarṇaśruṅgā ssampannā ssavatsāḥ kāṃsyadōhanāḥ ।
gavāṃ śatasahasrāṇi chatvāri puruṣarṣabhaḥ ॥ 23 ॥
vittamanyachcha subahudvijēbhyō raghunandanaḥ ।
dadau gōdānamuddiśya putrāṇāṃ putravatsalaḥ ॥ 24 ॥
sa sutaiḥ kṛtagōdānairvṛtastu nṛpatistadā ।
lōkapālairivābhāti vṛtaḥ ssaumyaḥ prajāpatiḥ ॥ 25 ॥
ityārṣē śrīmadrāmāyaṇē vālmīkīya ādikāvyē bālakāṇḍē dvisaptatitamassargaḥ ॥
