શ્રીમદ્વાલ્મીકીય રામાયણે બાલકાંડમ્ ।
અથ દ્વિસપ્તતિતમસ્સર્ગઃ ।
તમુક્તવંતં વૈદેહં વિશ્વામિત્રો મહામુનિઃ ।
ઉવાચ વચનં વીરં વસિષ્ઠસહિતો નૃપમ્ ॥ 1 ॥
અચિંત્યાન્યપ્રમેયાનિ કુલાનિ નરપુંગવ ।
ઇક્ષ્વાકૂણાં વિદેહાનાં નૈષાં તુલ્યોઽસ્તિ કશ્ચન ॥ 2 ॥
સદૃશો ધર્મસંબંધઃ સદૃશો રૂપસંપદા ।
રામલક્ષ્મણયો રાજન્ સીતા ચોર્મિલયા સહ ॥ 3 ॥
વક્તવ્યં ચ નરશ્રેષ્ઠ શ્રૂયતાં વચનં મમ ।
ભ્રાતા યવીયાન્ ધર્મજ્ઞ એષ રાજા કુશધ્વજઃ ॥ 4 ॥
અસ્ય ધર્માત્મનો રાજન્ રૂપેણાપ્રતિમં ભુવિ ।
સુતાદ્વયં નરશ્રેષ્ઠ પત્ન્યર્થં વરયામહે ॥ 5 ॥
ભરતસ્ય કુમારસ્ય શત્રુઘ્નસ્ય ચ ધીમતઃ ।
વરયામસ્સુતે રાજન્ તયોરર્થે મહાત્મનોઃ ॥ 6 ॥
પુત્રા દશરથસ્યેમે રૂપયૌવનશાલિનઃ ।
લોકપાલોપમાસ્સર્વે દેવતુલ્યપરાક્રમાઃ ॥ 7 ॥
ઉભયોરપિ રાજેંદ્ર સંબંધેનાનુબધ્યતામ્ ।
ઇક્ષ્વાકોઃ કુલમવ્યગ્રં ભવતઃપુણ્યકર્મણઃ ॥ 8 ॥
વિશ્વામિત્રવચ શ્શૃત્વા વસિષ્ઠસ્ય મતે તદા ।
જનકઃ પ્રાંજલિર્વાક્યમુવાચ મુનિપુંગવૌ ॥ 9 ॥
કુલં ધન્યમિદં મન્યે યેષાં નો મુનિપુંગવૌ ।
સદૃશં કુલસંબંધં યદાજ્ઞાપયથઃ સ્વયમ્ ॥ 10 ॥
એવં ભવતુ ભદ્રં વઃ કુશધ્વજસુતે ઇમે ।
પત્ન્યૌ ભજેતાં સહિતૌ શત્રુઘ્નભરતાવુભૌ ॥ 11 ॥
એકાહ્ના રાજપુત્રીણાં ચતસૃણાં મહામુને ।
પાણીન્ ગૃહ્ણંતુ ચત્વારો રાજપુત્રા મહાબલાઃ ॥ 12 ॥
ઉત્તરે દિવસે બ્રહ્મન્ ફલ્ગુનીભ્યાં મનીષિણઃ ।
વૈવાહિકં પ્રશંસંતિ ભગો યત્ર પ્રજાપતિઃ ॥ 13 ॥
એવમુક્ત્વા વચસ્સૌમ્યં પ્રત્યુત્થાય કૃતાંજલિઃ ।
ઉભૌ મુનિવરૌ રાજા જનકો વાક્યમબ્રવીત્ ॥ 14 ॥
પરો ધર્મઃ કૃતો મહ્યં શિષ્યોઽસ્મિભવતો સદા ।
ઇમાન્યાસનમુખ્યાનિ આસાતાં મુનિપુંગવૌ ॥ 15 ॥
યથા દશરથસ્યેયં તથાઽયોધ્યા પુરી મમ ।
પ્રભુત્વે નાસ્તિ સંદેહો યથાર્હં કર્તુમર્હથ ॥ 16 ॥
તથા બ્રુવતિ વૈદેહે જનકે રઘુનંદનઃ ।
રાજા દશરથો હૃષ્ટઃ પ્રત્યુવાચ મહીપતિમ્ ॥ 17 ॥
યુવામસંખ્યેયગુણૌ ભ્રાતરૌ મિથિલેશ્વરૌ ।
ઋષયો રાજસંઘાશ્ચ ભવદ્ભ્યામભિપૂજિતાઃ ॥ 18 ॥
સ્વસ્તિ પ્રાપ્નુહિ ભદ્રં તે ગમિષ્યામિ સ્વમાલયમ્ ।
શ્રાદ્ધકર્માણિ સર્વાણિ વિધાસ્યામીતિ ચાબ્રવીત્ ॥ 19 ॥
તમાપૃષ્ટ્વા નરપતિં રાજા દશરથસ્તદા ।
મુનીંદ્રૌ તૌ પુરસ્કૃત્ય જગામાશુ મહાયશાઃ ॥ 20 ॥
સ ગત્વા નિલયં રાજા શ્રાદ્ધં કૃત્વા વિધાનતઃ ।
પ્રભાતે કાલ્યમુત્થાય ચક્રે ગોદાનમુત્તમમ્ ॥ 21 ॥
ગવાં શતસહસ્રાણિ બ્રાહ્મણેભ્યો નરાધિપઃ ।
એકૈકશો દદૌ રાજા પુત્રાનુદ્દિશ્ય ધર્મતઃ ॥ 22 ॥
સુવર્ણશ્રુંગા સ્સંપન્ના સ્સવત્સાઃ કાંસ્યદોહનાઃ ।
ગવાં શતસહસ્રાણિ ચત્વારિ પુરુષર્ષભઃ ॥ 23 ॥
વિત્તમન્યચ્ચ સુબહુદ્વિજેભ્યો રઘુનંદનઃ ।
દદૌ ગોદાનમુદ્દિશ્ય પુત્રાણાં પુત્રવત્સલઃ ॥ 24 ॥
સ સુતૈઃ કૃતગોદાનૈર્વૃતસ્તુ નૃપતિસ્તદા ।
લોકપાલૈરિવાભાતિ વૃતઃ સ્સૌમ્યઃ પ્રજાપતિઃ ॥ 25 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે દ્વિસપ્તતિતમસ્સર્ગઃ ॥
