ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଦ୍ଵିସପ୍ତତିତମସ୍ସର୍ଗଃ ।
ତମୁକ୍ତଵଂତଂ ଵୈଦେହଂ ଵିଶ୍ଵାମିତ୍ରୋ ମହାମୁନିଃ ।
ଉଵାଚ ଵଚନଂ ଵୀରଂ ଵସିଷ୍ଠସହିତୋ ନୃପମ୍ ॥ 1 ॥
ଅଚିଂତ୍ୟାନ୍ୟପ୍ରମେୟାନି କୁଲାନି ନରପୁଂଗଵ ।
ଇକ୍ଷ୍ଵାକୂଣାଂ ଵିଦେହାନାଂ ନୈଷାଂ ତୁଲ୍ୟୋଽସ୍ତି କଶ୍ଚନ ॥ 2 ॥
ସଦୃଶୋ ଧର୍ମସଂବଂଧଃ ସଦୃଶୋ ରୂପସଂପଦା ।
ରାମଲକ୍ଷ୍ମଣୟୋ ରାଜନ୍ ସୀତା ଚୋର୍ମିଲୟା ସହ ॥ 3 ॥
ଵକ୍ତଵ୍ୟଂ ଚ ନରଶ୍ରେଷ୍ଠ ଶ୍ରୂୟତାଂ ଵଚନଂ ମମ ।
ଭ୍ରାତା ୟଵୀୟାନ୍ ଧର୍ମଜ୍ଞ ଏଷ ରାଜା କୁଶଧ୍ଵଜଃ ॥ 4 ॥
ଅସ୍ୟ ଧର୍ମାତ୍ମନୋ ରାଜନ୍ ରୂପେଣାପ୍ରତିମଂ ଭୁଵି ।
ସୁତାଦ୍ଵୟଂ ନରଶ୍ରେଷ୍ଠ ପତ୍ନ୍ୟର୍ଥଂ ଵରୟାମହେ ॥ 5 ॥
ଭରତସ୍ୟ କୁମାରସ୍ୟ ଶତ୍ରୁଘ୍ନସ୍ୟ ଚ ଧୀମତଃ ।
ଵରୟାମସ୍ସୁତେ ରାଜନ୍ ତୟୋରର୍ଥେ ମହାତ୍ମନୋଃ ॥ 6 ॥
ପୁତ୍ରା ଦଶରଥସ୍ୟେମେ ରୂପୟୌଵନଶାଲିନଃ ।
ଲୋକପାଲୋପମାସ୍ସର୍ଵେ ଦେଵତୁଲ୍ୟପରାକ୍ରମାଃ ॥ 7 ॥
ଉଭୟୋରପି ରାଜେଂଦ୍ର ସଂବଂଧେନାନୁବଧ୍ୟତାମ୍ ।
ଇକ୍ଷ୍ଵାକୋଃ କୁଲମଵ୍ୟଗ୍ରଂ ଭଵତଃପୁଣ୍ୟକର୍ମଣଃ ॥ 8 ॥
ଵିଶ୍ଵାମିତ୍ରଵଚ ଶ୍ଶୃତ୍ଵା ଵସିଷ୍ଠସ୍ୟ ମତେ ତଦା ।
ଜନକଃ ପ୍ରାଂଜଲିର୍ଵାକ୍ୟମୁଵାଚ ମୁନିପୁଂଗଵୌ ॥ 9 ॥
କୁଲଂ ଧନ୍ୟମିଦଂ ମନ୍ୟେ ୟେଷାଂ ନୋ ମୁନିପୁଂଗଵୌ ।
ସଦୃଶଂ କୁଲସଂବଂଧଂ ୟଦାଜ୍ଞାପୟଥଃ ସ୍ଵୟମ୍ ॥ 10 ॥
ଏଵଂ ଭଵତୁ ଭଦ୍ରଂ ଵଃ କୁଶଧ୍ଵଜସୁତେ ଇମେ ।
ପତ୍ନ୍ୟୌ ଭଜେତାଂ ସହିତୌ ଶତ୍ରୁଘ୍ନଭରତାଵୁଭୌ ॥ 11 ॥
ଏକାହ୍ନା ରାଜପୁତ୍ରୀଣାଂ ଚତସୃଣାଂ ମହାମୁନେ ।
ପାଣୀନ୍ ଗୃହ୍ଣଂତୁ ଚତ୍ଵାରୋ ରାଜପୁତ୍ରା ମହାବଲାଃ ॥ 12 ॥
ଉତ୍ତରେ ଦିଵସେ ବ୍ରହ୍ମନ୍ ଫଲ୍ଗୁନୀଭ୍ୟାଂ ମନୀଷିଣଃ ।
ଵୈଵାହିକଂ ପ୍ରଶଂସଂତି ଭଗୋ ୟତ୍ର ପ୍ରଜାପତିଃ ॥ 13 ॥
ଏଵମୁକ୍ତ୍ଵା ଵଚସ୍ସୌମ୍ୟଂ ପ୍ରତ୍ୟୁତ୍ଥାୟ କୃତାଂଜଲିଃ ।
ଉଭୌ ମୁନିଵରୌ ରାଜା ଜନକୋ ଵାକ୍ୟମବ୍ରଵୀତ୍ ॥ 14 ॥
ପରୋ ଧର୍ମଃ କୃତୋ ମହ୍ୟଂ ଶିଷ୍ୟୋଽସ୍ମିଭଵତୋ ସଦା ।
ଇମାନ୍ୟାସନମୁଖ୍ୟାନି ଆସାତାଂ ମୁନିପୁଂଗଵୌ ॥ 15 ॥
ୟଥା ଦଶରଥସ୍ୟେୟଂ ତଥାଽୟୋଧ୍ୟା ପୁରୀ ମମ ।
ପ୍ରଭୁତ୍ଵେ ନାସ୍ତି ସଂଦେହୋ ୟଥାର୍ହଂ କର୍ତୁମର୍ହଥ ॥ 16 ॥
ତଥା ବ୍ରୁଵତି ଵୈଦେହେ ଜନକେ ରଘୁନଂଦନଃ ।
ରାଜା ଦଶରଥୋ ହୃଷ୍ଟଃ ପ୍ରତ୍ୟୁଵାଚ ମହୀପତିମ୍ ॥ 17 ॥
ୟୁଵାମସଂଖ୍ୟେୟଗୁଣୌ ଭ୍ରାତରୌ ମିଥିଲେଶ୍ଵରୌ ।
ଋଷୟୋ ରାଜସଂଘାଶ୍ଚ ଭଵଦ୍ଭ୍ୟାମଭିପୂଜିତାଃ ॥ 18 ॥
ସ୍ଵସ୍ତି ପ୍ରାପ୍ନୁହି ଭଦ୍ରଂ ତେ ଗମିଷ୍ୟାମି ସ୍ଵମାଲୟମ୍ ।
ଶ୍ରାଦ୍ଧକର୍ମାଣି ସର୍ଵାଣି ଵିଧାସ୍ୟାମୀତି ଚାବ୍ରଵୀତ୍ ॥ 19 ॥
ତମାପୃଷ୍ଟ୍ଵା ନରପତିଂ ରାଜା ଦଶରଥସ୍ତଦା ।
ମୁନୀଂଦ୍ରୌ ତୌ ପୁରସ୍କୃତ୍ୟ ଜଗାମାଶୁ ମହାୟଶାଃ ॥ 20 ॥
ସ ଗତ୍ଵା ନିଲୟଂ ରାଜା ଶ୍ରାଦ୍ଧଂ କୃତ୍ଵା ଵିଧାନତଃ ।
ପ୍ରଭାତେ କାଲ୍ୟମୁତ୍ଥାୟ ଚକ୍ରେ ଗୋଦାନମୁତ୍ତମମ୍ ॥ 21 ॥
ଗଵାଂ ଶତସହସ୍ରାଣି ବ୍ରାହ୍ମଣେଭ୍ୟୋ ନରାଧିପଃ ।
ଏକୈକଶୋ ଦଦୌ ରାଜା ପୁତ୍ରାନୁଦ୍ଦିଶ୍ୟ ଧର୍ମତଃ ॥ 22 ॥
ସୁଵର୍ଣଶ୍ରୁଂଗା ସ୍ସଂପନ୍ନା ସ୍ସଵତ୍ସାଃ କାଂସ୍ୟଦୋହନାଃ ।
ଗଵାଂ ଶତସହସ୍ରାଣି ଚତ୍ଵାରି ପୁରୁଷର୍ଷଭଃ ॥ 23 ॥
ଵିତ୍ତମନ୍ୟଚ୍ଚ ସୁବହୁଦ୍ଵିଜେଭ୍ୟୋ ରଘୁନଂଦନଃ ।
ଦଦୌ ଗୋଦାନମୁଦ୍ଦିଶ୍ୟ ପୁତ୍ରାଣାଂ ପୁତ୍ରଵତ୍ସଲଃ ॥ 24 ॥
ସ ସୁତୈଃ କୃତଗୋଦାନୈର୍ଵୃତସ୍ତୁ ନୃପତିସ୍ତଦା ।
ଲୋକପାଲୈରିଵାଭାତି ଵୃତଃ ସ୍ସୌମ୍ୟଃ ପ୍ରଜାପତିଃ ॥ 25 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଦ୍ଵିସପ୍ତତିତମସ୍ସର୍ଗଃ ॥
