śrīmadvālmīkīya rāmāyaṇē ayōdhyākāṇḍam ।
atha ēkāśītitamassargaḥ ।
tatō nāndīmukhīṃ rātriṃ bharataṃ sūtamāgadhāḥ ।
tuṣṭuvurvāgviśēṣajñāsstavairmaṅgalasaṃhitaiḥ ॥ 1 ॥
suvarṇakōṇābhihataḥ prāṇadadyāmadundubhiḥ ।
dadhmuśśaṅkhāṃścha śataśō nādāṃśchōchchāvachasvarān ॥ 2 ॥
sa tūryaghōṣa ssumahāndivamāpūrayanniva ।
bharataṃ śōkasantaptaṃ bhūyaśśōkairarandhrayat ॥ 3 ॥
tataḥ prabuddhō bharatastaṃ ghōṣaṃ sannivartya cha ।
nāhaṃ rājēti chāpyuktvā śatrughnamidamabravīt ॥ 4 ॥
paśya śatrughna kaikēyyā lōkasyāpakṛtaṃ mahat ।
visṛjya mayi duḥkhāni rājā daśarathō gataḥ ॥ 5 ॥
tasyaiṣā dharmarājasya dharmamūlā mahātmanaḥ ।
paribhramati rājya śrīrnaurivākarṇikā jalē ॥ 6 ॥
yō hi na ssumahānnāthassō'pi pravrājitō vanam ।
anayā dharmamutsṛjya mātrā mē rāghavassvayam ॥ 7 ॥
ityēvaṃ bharataṃ prēkṣya vilapantaṃ vichētanam ।
kṛpaṇaṃ rurudussarvāssasvaraṃ yōṣita stadā ॥ 8 ॥
tathā tasminvilapati vasiṣṭhō rājadharmavit ।
sabhāmikṣvākunāthasya pravivēśa mahāyaśāḥ ॥ 9 ॥
śātakumbhamayīṃ ramyāṃ maṇiratnasamākulām ।
sudharmāmiva dharmātmā sagaṇaḥ pratyapadyata ॥ 10 ॥
sa kāñchanamayaṃ pīṭhaṃ sukhāstaraṇasaṃvṛtam ।
adhyāsta sarvavēdajñō dūtānanuśaśāsa cha ॥ 11 ॥
brāhmaṇān kṣatriyānvaiśyanamātyāngaṇavallabhān ।
kṣipramānayatā'vyagrāḥ kṛtyamātyayikaṃ hi naḥ ॥ 12 ॥
sarājabhṛtyaṃ śatrughnaṃ bharataṃ cha yaśasvinam ।
yudhājitaṃ sumantraṃ cha yē cha tatra hitā janāḥ ॥ 13 ॥
tatō halahalāśabdassumahānsamapadyata ।
rathairaśvairgajaiśchāpi janānāmupagachChatām ॥ 14 ॥
tatō bharatamāyāntaṃ śatakratumivāmarāḥ ।
pratyanandanprakṛtayō yathā daśarathaṃ tathā ॥ 15 ॥
hrada iva timināgasaṃvṛtaḥ stimitajalō maṇiśaṅkhaśarkaraḥ ।
daśarathasutaśōbhitā sabhā sadaśarathēva babhau yathā purā ॥ 16 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē ēkāśītitamassargaḥ ॥
