śrīmadvālmīkīya rāmāyaṇē bālakāṇḍam ।
atha chaturviṃśassargaḥ ।
tataḥ prabhātē vimalē kṛtāhnikamarindamau ।
viśvāmitraṃ puraskṛtya nadyāstīramupāgatau ॥ 1 ॥
tē cha sarvē mahātmānō munayassaṃśritavratāḥ ।
upasthāpya śubhāṃ nāvaṃ viśvāmitramathābruvan ॥ 2 ॥
ārōhatu bhavānnāvaṃ rājaputrapuraskṛtaḥ ।
ariṣṭaṃ gachCha panthānaṃ mā bhūtkālaviparyayaḥ ॥ 3 ॥
viśvāmitrastathētyuktavā tānṛṣīnabhipūjya cha ।
tatāra sahitastābhyāṃ saritaṃ sāgaraṅgamām ॥ 4 ॥
tataśśuśrāva vai śabdamatisaṃrambhavardhitam ।
madhyamāgamya tōyasya saha rāmaḥkanīyasā ॥ 5 ॥
atha rāmassarinmadhyē paprachCha munipuṅgavam ।
vāriṇō bhidyamānasya kimayaṃ tumulō dhvaniḥ ॥ 6 ॥
rāghavasya vachaśśrutvā kautūhalasamanvitaḥ ।
kathayāmāsa dharmātmā tasya śabdasya niśchayam ॥ 7 ॥
kailāsaparvatē rāma manasā nirmitaṃ saraḥ ।
brahmaṇā naraśārdūla tēnēdaṃ mānasaṃ saraḥ ॥ 8 ॥
tasmātsusrāva sarasassāyōdhyāmupagūhatē ।
sara pravṛttā sarayūḥ puṇyā brahmasaraśchyutā ॥ 9 ॥
tasyāyamatulaśśabdō jāhnavīmabhivartatē ।
vārisaṅkṣōbhajō rāma praṇāmaṃ niyataḥkuru ॥ 10 ॥
tābhyāṃ tu tāvubhau kṛtvā praṇāmamatidhārmikau ।
tīraṃ dakṣiṇamāsādya jagmaturlaghuvikramau ॥ 11 ॥
sa vanaṃ ghōrasaṅkāśaṃ dṛṣṭvā nṛpavarātmajaḥ ।
aviprahatamaikṣvākaḥ paprachCha munipuṅgavam ॥ 12 ॥
ahō vanamidaṃ durgaṃ jhillikāgaṇanāditam ।
bhairavaiśśapadaiḥ pūrṇaṃ śakuntairdāruṇārutaiḥ ॥ 13 ॥
nānāprakāraiśśakunai rvāśyadbhirbhairavasvanaiḥ ।
siṃhavyāghravarāhaiścha vāraṇaiśchōpaśōbhitam ॥ 14 ॥
dhavāśvakarṇakakubhairbilvatindukapāṭalaiḥ ।
saṅkīrṇaṃ badarībhiścha kinnvētaddāruṇaṃ vanam ॥ 15 ॥
tamuvācha mahātējā viśvāmitrō mahāmuniḥ ।
śrūyatāṃ vatsa kākutstha yasyaitaddāruṇaṃ vanam ॥ 16 ॥
ētau janapadau sphītau pūrvamāstāṃ narōttama ।
maladāścha karūśāścha dēvanirmāṇanirmitau ॥ 17 ॥
purā vṛtravadhē rāma malēna samabhiplutam ।
kṣudhā chaiva sahasrākṣaṃ brahmahatyā samāviśat ॥ 18 ॥
tamindraṃ snāpayan dēvā ṛṣayaścha tapōdhanāḥ ।
kalaśaissnāpayāmāsurmalaṃ chāsya pramōchayan ॥ 19 ॥
iha bhūmyāṃ malaṃ datvā datvā kārūśamēva cha ।
śarīrajaṃ mahēndrasya tatō harṣaṃ prapēdirē ॥ 20 ॥
nirmalō niṣkarūśaścha śuchirinndrō yadābhavat ।
dadau dēśasya suprītō varaṃ prabhuranuttamam ॥ 21 ॥
imau janapadau sphītau khyātiṃ lōkē gamiṣyataḥ ।
maladāścha karūśāścha mamāṅgamaladhāriṇau ॥ 22 ॥
sādhu sādhviti taṃ dēvāḥ pākaśāsanamabruvan ।
dēśasya pūjāṃ tāṃ dṛṣṭvā kṛtāṃ śakrēṇa dhīmatā ॥ 23 ॥
ētau janapadau sphītau dīrghakālamarindama ।
maladāścha karūśāścha muditau dhanadhānyataḥ ॥ 24 ॥
kasyachittvatha kālasya yakṣī vai kāmarūpiṇī ।
balaṃ nāgasahasrasya dhārayantī tadā hyabhūt ॥ 25 ॥
tāṭakā nāma bhadraṃ tē bhāryā sundasya dhīmataḥ ।
2 mārīchō rākṣasaḥ putrō yasyāśśakraparākramaḥ ॥ 26 ॥
vṛttabāhurmahāvīryō vipulāsya tanurmahān ।
rākṣasō bhairavākārō nityaṃ trāsayatē prajāḥ ॥ 27 ॥
imau janapadau nityaṃ vināśayati rāghava ।
maladāṃścha karūśāṃścha tāṭakā duṣṭachāriṇī ॥ 28 ॥
sēyaṃ panthānamāvṛtya vasatyadhyardhayōjanē ।
ata ēva na gantavyaṃ tāṭakāyā vanaṃ yataḥ ॥ 29 ॥
svabāhubalamāśritya jahīmāṃ duṣṭachāriṇīm ।
manniyōgādimaṃ dēśaṃ kuru niṣkaṇṭakaṃ punaḥ ॥ 30 ॥
na hi kaśchidimaṃ dēśaṃ śaknōtyāgantumīdṛśam ।
yakṣiṇyā ghōrayā rāma utsāditamasahyayā ॥ 31 ॥
ētattē sarvamākhyātaṃ yathaitaddāruṇaṃ vanam ।
yakṣyā chōtsāditaṃ sarvamadyāpi na nivartatē ॥ 32 ॥
ityārṣē śrīmadrāmāyaṇē vālmīkīya ādikāvyē bālakāṇḍē chaturviṃśassargaḥ ॥
