શ્રીમદ્વાલ્મીકીય રામાયણે બાલકાંડમ્ ।
અથ ચતુર્વિંશસ્સર્ગઃ ।
તતઃ પ્રભાતે વિમલે કૃતાહ્નિકમરિંદમૌ ।
વિશ્વામિત્રં પુરસ્કૃત્ય નદ્યાસ્તીરમુપાગતૌ ॥ 1 ॥
તે ચ સર્વે મહાત્માનો મુનયસ્સંશ્રિતવ્રતાઃ ।
ઉપસ્થાપ્ય શુભાં નાવં વિશ્વામિત્રમથાબ્રુવન્ ॥ 2 ॥
આરોહતુ ભવાન્નાવં રાજપુત્રપુરસ્કૃતઃ ।
અરિષ્ટં ગચ્છ પંથાનં મા ભૂત્કાલવિપર્યયઃ ॥ 3 ॥
વિશ્વામિત્રસ્તથેત્યુક્તવા તાનૃષીનભિપૂજ્ય ચ ।
તતાર સહિતસ્તાભ્યાં સરિતં સાગરંગમામ્ ॥ 4 ॥
તતશ્શુશ્રાવ વૈ શબ્દમતિસંરંભવર્ધિતમ્ ।
મધ્યમાગમ્ય તોયસ્ય સહ રામઃકનીયસા ॥ 5 ॥
અથ રામસ્સરિન્મધ્યે પપ્રચ્છ મુનિપુંગવમ્ ।
વારિણો ભિદ્યમાનસ્ય કિમયં તુમુલો ધ્વનિઃ ॥ 6 ॥
રાઘવસ્ય વચશ્શ્રુત્વા કૌતૂહલસમન્વિતઃ ।
કથયામાસ ધર્માત્મા તસ્ય શબ્દસ્ય નિશ્ચયમ્ ॥ 7 ॥
કૈલાસપર્વતે રામ મનસા નિર્મિતં સરઃ ।
બ્રહ્મણા નરશાર્દૂલ તેનેદં માનસં સરઃ ॥ 8 ॥
તસ્માત્સુસ્રાવ સરસસ્સાયોધ્યામુપગૂહતે ।
સર પ્રવૃત્તા સરયૂઃ પુણ્યા બ્રહ્મસરશ્ચ્યુતા ॥ 9 ॥
તસ્યાયમતુલશ્શબ્દો જાહ્નવીમભિવર્તતે ।
વારિસંક્ષોભજો રામ પ્રણામં નિયતઃકુરુ ॥ 10 ॥
તાભ્યાં તુ તાવુભૌ કૃત્વા પ્રણામમતિધાર્મિકૌ ।
તીરં દક્ષિણમાસાદ્ય જગ્મતુર્લઘુવિક્રમૌ ॥ 11 ॥
સ વનં ઘોરસંકાશં દૃષ્ટ્વા નૃપવરાત્મજઃ ।
અવિપ્રહતમૈક્ષ્વાકઃ પપ્રચ્છ મુનિપુંગવમ્ ॥ 12 ॥
અહો વનમિદં દુર્ગં ઝિલ્લિકાગણનાદિતમ્ ।
ભૈરવૈશ્શપદૈઃ પૂર્ણં શકુંતૈર્દારુણારુતૈઃ ॥ 13 ॥
નાનાપ્રકારૈશ્શકુનૈ ર્વાશ્યદ્ભિર્ભૈરવસ્વનૈઃ ।
સિંહવ્યાઘ્રવરાહૈશ્ચ વારણૈશ્ચોપશોભિતમ્ ॥ 14 ॥
ધવાશ્વકર્ણકકુભૈર્બિલ્વતિંદુકપાટલૈઃ ।
સંકીર્ણં બદરીભિશ્ચ કિન્ન્વેતદ્દારુણં વનમ્ ॥ 15 ॥
તમુવાચ મહાતેજા વિશ્વામિત્રો મહામુનિઃ ।
શ્રૂયતાં વત્સ કાકુત્સ્થ યસ્યૈતદ્દારુણં વનમ્ ॥ 16 ॥
એતૌ જનપદૌ સ્ફીતૌ પૂર્વમાસ્તાં નરોત્તમ ।
મલદાશ્ચ કરૂશાશ્ચ દેવનિર્માણનિર્મિતૌ ॥ 17 ॥
પુરા વૃત્રવધે રામ મલેન સમભિપ્લુતમ્ ।
ક્ષુધા ચૈવ સહસ્રાક્ષં બ્રહ્મહત્યા સમાવિશત્ ॥ 18 ॥
તમિંદ્રં સ્નાપયન્ દેવા ઋષયશ્ચ તપોધનાઃ ।
કલશૈસ્સ્નાપયામાસુર્મલં ચાસ્ય પ્રમોચયન્ ॥ 19 ॥
ઇહ ભૂમ્યાં મલં દત્વા દત્વા કારૂશમેવ ચ ।
શરીરજં મહેંદ્રસ્ય તતો હર્ષં પ્રપેદિરે ॥ 20 ॥
નિર્મલો નિષ્કરૂશશ્ચ શુચિરિંંદ્રો યદાભવત્ ।
દદૌ દેશસ્ય સુપ્રીતો વરં પ્રભુરનુત્તમમ્ ॥ 21 ॥
ઇમૌ જનપદૌ સ્ફીતૌ ખ્યાતિં લોકે ગમિષ્યતઃ ।
મલદાશ્ચ કરૂશાશ્ચ મમાંગમલધારિણૌ ॥ 22 ॥
સાધુ સાધ્વિતિ તં દેવાઃ પાકશાસનમબ્રુવન્ ।
દેશસ્ય પૂજાં તાં દૃષ્ટ્વા કૃતાં શક્રેણ ધીમતા ॥ 23 ॥
એતૌ જનપદૌ સ્ફીતૌ દીર્ઘકાલમરિંદમ ।
મલદાશ્ચ કરૂશાશ્ચ મુદિતૌ ધનધાન્યતઃ ॥ 24 ॥
કસ્યચિત્ત્વથ કાલસ્ય યક્ષી વૈ કામરૂપિણી ।
બલં નાગસહસ્રસ્ય ધારયંતી તદા હ્યભૂત્ ॥ 25 ॥
તાટકા નામ ભદ્રં તે ભાર્યા સુંદસ્ય ધીમતઃ ।
2 મારીચો રાક્ષસઃ પુત્રો યસ્યાશ્શક્રપરાક્રમઃ ॥ 26 ॥
વૃત્તબાહુર્મહાવીર્યો વિપુલાસ્ય તનુર્મહાન્ ।
રાક્ષસો ભૈરવાકારો નિત્યં ત્રાસયતે પ્રજાઃ ॥ 27 ॥
ઇમૌ જનપદૌ નિત્યં વિનાશયતિ રાઘવ ।
મલદાંશ્ચ કરૂશાંશ્ચ તાટકા દુષ્ટચારિણી ॥ 28 ॥
સેયં પંથાનમાવૃત્ય વસત્યધ્યર્ધયોજને ।
અત એવ ન ગંતવ્યં તાટકાયા વનં યતઃ ॥ 29 ॥
સ્વબાહુબલમાશ્રિત્ય જહીમાં દુષ્ટચારિણીમ્ ।
મન્નિયોગાદિમં દેશં કુરુ નિષ્કંટકં પુનઃ ॥ 30 ॥
ન હિ કશ્ચિદિમં દેશં શક્નોત્યાગંતુમીદૃશમ્ ।
યક્ષિણ્યા ઘોરયા રામ ઉત્સાદિતમસહ્યયા ॥ 31 ॥
એતત્તે સર્વમાખ્યાતં યથૈતદ્દારુણં વનમ્ ।
યક્ષ્યા ચોત્સાદિતં સર્વમદ્યાપિ ન નિવર્તતે ॥ 32 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે ચતુર્વિંશસ્સર્ગઃ ॥
