શ્રીમદ્વાલ્મીકીય રામાયણે અયોધ્યાકાંડમ્ ।
અથ એકાધિકશતતમસ્સર્ગઃ ।
રામસ્ય વચનં શ્રુત્વા ભરતઃ પ્રત્યુવાચ હ ।
કિં મે ધર્માદ્વિહીનસ્ય રાજધર્મઃ કરિષ્યતિ ॥ 1 ॥
કિં એતદ્ ઇગ્ચ્છેયં અહં શ્રોતું પ્રવ્યાહૃતં ત્વયા ।
યસ્માત્ ત્વં આગતો દેશં ઇમં ચીર જટા અજિની ॥ 2 ॥
સ સમૃદ્ધાં મયા સાર્ધમયોધ્યાં ગચ્છ રાઘવ ।
અભિષેચયચાત્માનં કુલસ્યાસ્ય ભવાય નઃ ॥ 3 ॥
રાજાનં માનુષં પ્રાહુ ર્દેવત્વે સમ્મતો મમ ।
યસ્ય ધર્માર્થસહિતં વૃત્તમાહુરમાનુષમ્ ॥ 4 ॥
કેકયસ્થે ચ મયિ તુ ત્વયિ ચારણ્ય માશ્રિતે ।
દિવમાર્યો ગતો રાજા યાયજૂકઃ સતાં મતઃ ॥ 5 ॥
નિષ્ક્રાંતમાત્રે ભવતિ સસીતે સહલક્ષ્મણે ।
દુઃખશોકાભિભૂતસ્તુ રાજા ત્રિદિવમભ્યગાત્ ॥ 6 ॥
ઉત્તિષ્ઠ પુરુષવ્યાઘ્ર ક્રિયતામુદકં પિતુઃ ।
અહં ચાયં ચ શત્રુઘ્નઃ પૂર્વમેવ કૃતોદકૌ ॥ 7 ॥
પ્રિયેણ કિલ દત્તં હિ પિતૃલોકેષુ રાઘવ ।
અક્ષય્યં ભવતીત્યાહુર્ભવાંશ્ચૈવ પિતુઃ પ્રિયઃ ॥ 8 ॥
ત્વામેવ શોચંસ્તવ દર્શનેપ્સુસ્ત્વય્યેવ સક્તામનિવર્ત્ય બુદ્ધિમ્ ।
ત્વયા વિહીન સ્તવ શોકમગ્નસ્ત્વાં સંસ્મરન્નસ્તમિતઃ પિતા તે ॥ 9 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે એકાધિકશતતમસ્સર્ગઃ ॥
